ଭୁବନେଶ୍ୱର, ୧୯।୫(କ୍ରୀଡ଼ା ପ୍ରତିନିଧି)-
କେନ୍ଦ୍ର ସରକାରଙ୍କ ନୂଆ ଗାଇଡଲାଇନ୍ ଅନୁସାରେ ସ୍ଥାନୀୟ କଳିଙ୍ଗ ଷ୍ଟାଡିୟମକୁ ଆଥଲେଟ୍ଙ୍କ ଟ୍ରେନିଂ ପାଇଁ ଉନ୍ମୁକ୍ତ ରଖା ଯିବାକୁ ନିଷ୍ପତ୍ତି ହୋଇଛି। ରାଜ୍ୟ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା ଏ ସମ୍ପର୍କରେ ସ୍ପଷ୍ଟ କରିଛନ୍ତି। ”ନୂଆ ଗାଇଡଲାଇନ୍ ଅନୁସାରେ ଆଥଲେଟ୍ଙ୍କ ଟ୍ରେନିଂ ପାଇଁ କଳିଙ୍ଗ ଷ୍ଟାଡିୟମକୁ ଉନ୍ମୁକ୍ତ କରାଯିବ। ତେବେ ସାଥି କ୍ରୀଡ଼ାବିତ୍, ଟ୍ରେନର ଏବଂ ସପୋର୍ଟ ଷ୍ଟାଫ୍ଙ୍କ ସହିତ ଭାବର ଆଦାନ ପ୍ରଦାନ ସମୟରେ ସାମାଜିତ ଦୂରତ୍ୱ ନିୟମ ପାଳନ, ମାସ୍କ ପିନ୍ଧିବା, ହାତ ଧୋଇବା ସହ ବ୍ୟକ୍ତିଗତ ସୁରକ୍ଷା ସମ୍ପର୍କରେ ସଚେତନ ହେବାକୁ ପଡ଼ିବ। ଯଦି କୌଣସି ଆଥଲେଟ୍ ଜ୍ୱରରେ ପୀଡ଼ିତ ହୋଇଥିବା ଅନୁଭବ କରନ୍ତି ତେବେ ସେମାନେ ବାହାରେ ବୁଲିବା କିମ୍ବା ଷ୍ଟାଡିୟମକୁ ଟ୍ରେନିଂ ପାଇଁ ଆସିବେ ନାହିଁ। ଆଗାମୀ କିଛି ସପ୍ତାହ ମଧ୍ୟରେ ସ୍ପୋଟର୍ସ ଇକୋ ସିଷ୍ଟମକୁ ଶକ୍ତିଶାଳୀ କରିବା ଦିଗରେ ଆମେ କାର୍ଯ୍ୟ କରୁଛୁ“ ବୋଲି କ୍ରୀଡ଼ାମନ୍ତ୍ରୀ ପ୍ରକାଶ କରିଛନ୍ତି। ପ୍ରକାଶ ଯୋଗ୍ୟ ଯେ, କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ କଟକଣା ପାଇଁ ଗତ ମାର୍ଚ୍ଚ ମାସରୁ ଖେଳାଳିମାନେ ଘର ବାହାରକୁ ବାହାରିପାରୁ ନ ଥିଲେ। ଫଳରେ ସେମାନଙ୍କ ଟ୍ରେନିଂ ବାଧାପ୍ରାପ୍ତ ହୋଇଥିଲା। ଘରର ସୀମିତ ପରିସରରେ ସମସ୍ତ ଟ୍ରେନିଂ ସମ୍ଭବ ହେଉ ନ ଥିଲା। ସରକାରଙ୍କ ନୂଆ ଗାଇଡଲାଇନ୍ ଆଥଲେଟଙ୍କ ମନରେ ନୂଆ ଆଶା ଭରି ଦେଇଛି। ଏବେ ସେମାନେ ପଡ଼ିଆକୁ ଯାଇ ପାରମ୍ପରିକ ଟ୍ରେନିଂ ସହ ଆଗାମୀ ଦିନ ପାଇଁ ନିଜକୁ ପ୍ରସ୍ତୁତ ରଖିପାରିବେ ।