ନୂଆଦିଲ୍ଲୀ, ୩-୯: ଆଧାରରେ ଆୟକର ରିଟର୍ନ ପୈଠ କଲେ ଟିକସଦାତାଙ୍କୁ ସିଧାସଳଖ ପାନ୍ ଜାରି କରାଯିବ। ଆୟକର ବିଭାଗ ଏଭଳି ଟିକସଦାତାଙ୍କ ଲାଗି ନୂଆ ପଦକ୍ଷେପ ଗ୍ରହଣ କରିଛି। ଆଧାର ଏବଂ ପାନ୍ ଡାଟାବେସ ସଂଯୋଗ ଦ୍ୱାରା ବିଭାଗ ଏଭଳି ସୁବିଧା କରିବ ବୋଲି ଜଣାପଡିଛି। ଅଗଷ୍ଟ ୩୦ରେ ଆୟକର ବିଭାଗ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତି ମୁତାବକ, ପାନ୍ ନ ଥାଇ ଯେଉଁ ବ୍ୟକ୍ତିଙ୍କର ଆଧାର ରହିଛି ଏବଂ ସେଥିରେ ସେ ରିଟର୍ନ ଫାଇଲ କରିଥିଲେ ପାନ୍ ପାଇବାକୁ ତାଙ୍କୁ ଦର୍ଶାଇବାକୁ ହେବ। ଏଥି ଲାଗି କୌଣସି ଅଲଗା ଦସ୍ତାବିଜ ଦେବାକୁ ପଡିବ ନାହିଁ। ସେପ୍ଟେମ୍ବର ପହିଲାରୁ ନୂଆ ନିୟମ କାର୍ଯ୍ୟକାରୀ ହେବ ବୋଲି ବିଭାଗ ପକ୍ଷରୁ କୁହାଯାଇଛି। ୟୁନିକ୍ ଆଇଡେଣ୍ଟିଫିକେଶନ ଅଥରିଟି ଅଫ୍ ଇଣ୍ଡିଆ(ୟୁଆଇଡିଏଆଇ)ର ସୂଚନା ବ୍ୟବହାରରେ ବ୍ୟକ୍ତି ବିଶେଷଙ୍କ ଲାଗି ଆୟକର ବିଭାଗ ପାନ୍ ଜାରି କରିବ। ଆଧାର ପାନ୍ ଡାଟାବେସ ସଂଯୋଗ ହେବା ପରେ ଲୋକଙ୍କୁ ଏହି ସୁବିଧା ଦେବା ସହଜ ହେବ ବୋଲି କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି)ର ଅଧ୍ୟକ୍ଷ ପି.ସି. ମୋଦି ଜୁଲାଇରେ ଗଣମାଧ୍ୟମକୁ ଏକ ସାକ୍ଷାତକାରରେ ସୂଚନା ଦେଇଥିଲେ। ପାନ୍ ନ ଥିବା କ୍ଷେତ୍ରରେ ଏହା ହେବ ବୋଲି ସେ କହିଥିଲେ। ଏଭଳି କ୍ଷେତ୍ରରେ ଆସେସିଂ ଅଫିସର ପ୍ରତ୍ୟକ୍ଷ ଭାବେ ପାନ୍ ଜାରି କରି ପାରିବେ ବୋଲି ଆଇନରେ ଉଲ୍ଲେଖ ରହିଛି।