ନୂଆଦିଲ୍ଲୀ,୭-୨: ଆଧାର ତଥ୍ୟ ପ୍ରଦାନ ଦ୍ୱାରା ତ୍ୱରିତ ଭିତ୍ତିରେ ଅନ୍ଲାଇନରେ ପାନ୍ କାର୍ଡ ପ୍ରଦାନ ବ୍ୟବସ୍ଥା ଚଳିତ ମାସରୁ ଆରମ୍ଭ କରାଯିବ। ରାଜସ୍ବ ସଚିବ ଅଜୟ ଭୂଷଣ ପାଣ୍ଡେ ଏ ନେଇ ଗୁରୁବାର ସୂଚନା ଦେଇଛନ୍ତି। ବଜେଟ ୨୦୨୦-୨୧ରେ ଏନେଇ ପ୍ରସ୍ତାବ ରଖାଯାଇଛି। ବିନା କୌଣସି ଆବେଦନ ଫର୍ମ ପୂରଣ ମାଧ୍ୟମରେ ଆଧାର ତଥ୍ୟ ଦ୍ୱାରା ଅନ୍ଲାଇନ ପାନ୍ ପ୍ରଦାନ ଧାରା ତ୍ୱରିତ କରିବାକୁ ଏଭଳି ପଦକ୍ଷେପ ସରକାର ଘୋଷଣା କରିଛନ୍ତି। ଏ ସଂକ୍ରାନ୍ତ ସିଷ୍ଟମ ପ୍ରସ୍ତୁତ ହୋଇ ରହିଥିବା ବେଳେ ଚଳିତ ମାସରେ ସେବା ଆରମ୍ଭ ହେବ ବୋଲି ପାଣ୍ଡେ ସ୍ପଷ୍ଟ କରିଛନ୍ତି। ଆୟକର ବିଭାଗ ଓ୍ବେବସାଇଟକୁ ଯାଇ ଆଧାର ନମ୍ବର ପ୍ରଦାନ କରିବାକୁ ହେବ। ଆଧାର ପଞ୍ଜୀକୃତ ମୋବାଇଲ ନମ୍ବରକୁ ଏକ ଓ୍ବାନ ଟାଇମ ପାସଓ୍ବାର୍ଡ (ଓଟିପି) ଆସିବ। ଆଧାର ତଥ୍ୟ ଯାଞ୍ଚ ଲାଗି ଓଟିପି ବ୍ୟବହାର କରାଯିବ। ଏଭଳି ଧାରାକୁ ବ୍ୟବହାର କରି ତ୍ୱରିତ ପାନ୍ ପ୍ରଦାନ କରାଯିବ। ବ୍ୟକ୍ତିବିଶେଷ ଇ-ପାନ କାର୍ଡକୁ ଡାଉନଲୋଡ ମଧ୍ୟ କରିପାରିବେ।