ଅନୁଗୋଳ ଅଫିସ, ୨୯।୫- ଅନୁଗୋଳ ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ଜିଲାସ୍ତରୀୟ ପ୍ରାକୃତିକ ବିପର୍ଯ୍ୟୟ ପରିଚାଳନା କମିଟି ବୈଠକ ଶନିବାର ଅନୁଷ୍ଠିତ ହୋଇଯାଇଛି। ଆସନ୍ତା ମୌସୁମୀ ବର୍ଷା ଓ ସମ୍ଭାବ୍ୟ ବନ୍ୟା ପରିସ୍ଥିତିର ଠିକ୍ ମୁକାବିଲା ପାଇଁ ବିଭିନ୍ନ ବିଭାଗ ସମସ୍ତ ପ୍ରକାର ଆନୁଷଙ୍ଗିକ ବ୍ୟବସ୍ଥା ସହ ସଜାଗ ରହିବାକୁ ଜିଲାପାଳ ବୈଠକରେ ନିର୍ଦ୍ଦେଶ ଦେଇଥିଲେ। ଏପରି କି ବନ୍ୟା ପରିସ୍ଥିତି ସୃଷ୍ଟି ହେଲେ ମଧ୍ୟ ଜନସାଧାରଣଙ୍କର ଯେପରି ସର୍ବନିମ୍ନ କ୍ଷତି ହୁଏ ସେଥିପାଇଁ ବିଶେଷ ଧ୍ୟାନ ଜିଲାପାଳ ପରାମର୍ଶ ଦେଇଥିଲେ।
ବର୍ଷା ଦିନ ପୂର୍ବରୁ ସମସ୍ତ ନଦୀ ଓ ନାଳର ପୁରୁଣା ଘାଇ ସହ ବର୍ଷାମାପକ ଯନ୍ତ୍ର ମରାମତି, ବୃଷ୍ଟିପାତର ସବିଶେଷ ଓ ଠିକ୍ ରିପୋର୍ଟ ନିୟମିତ ପ୍ରଦାନ ଉପରେ ଜିଲାପାଳ ଗୁରୁତ୍ୱ ଦେଇଥିଲେ। ଜିଲାସ୍ତରୀୟ ଅଧିକାରୀମାନେ ଟିକରପଡ଼ା ଓ ଆଠମଲ୍ଲିକର ଅଇଡ଼ା ଅଞ୍ଚଳକୁ ଆଗୁଆ ଗସ୍ତ କରି ବିଭିନ୍ନ ଆନୁଷଙ୍ଗିକ ବ୍ୟବସ୍ଥା ଅନୁଧ୍ୟାନ କରିବା, ପର୍ଯ୍ୟାପ୍ତ ଖାଦ୍ୟ, ପଲିଥିନ ସହ ବନ୍ୟା ଆଶ୍ରୟସ୍ଥଳ ଗୁଡ଼ିକୁ ପ୍ରସ୍ତୁତ ରଖିବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ। ସେହିପରି ନଳକୂପ ଓ ଜଳ ଉତ୍ସ ଗୁଡ଼ିକୁ ବିଶୋଧନ ସହ ସମସ୍ତ ଡାକ୍ତରଖାନାରେ ସାପ କାମୁଡ଼ା ଇଞ୍ଜେକଶନ୍, ବ୍ଲିଚିଂ, ହାଲୋଜିନ୍ ବଟିକା, ଓଆର୍ଏସ୍ ଓ ଜୀବନରକ୍ଷାକାରୀ ଔଷଧ ଗଚ୍ଛିତ ରଖିବାକୁ କୁହାଯାଇଥିଲା। ଜୁନ ୧ରୁ ନଭେମ୍ବର ୩୦ ପର୍ଯ୍ୟନ୍ତ ଜିଲା ଓ ଅନ୍ୟାନ୍ୟ ବିଭାଗୀୟ କାର୍ଯ୍ୟାଳୟରେ କଣ୍ଟ୍ରୋଲ ରୁମ୍ କାର୍ଯ୍ୟ କରିବ। ଅତିରିକ୍ତ ଜିଲାପାଳ ତପନ କୁମାର ଶତପଥୀ ଓଡ଼ିଶା ମଧ୍ୟକୁ ଆସୁଥିବା ଫଙ୍ଗପାଳ କୀଟମାନଙ୍କ ପ୍ରତିରୋଧ ପାଇଁ ଆଗୁଆ ପଦକ୍ଷେପ ନେବାକୁ କୃଷି ବିଭାଗକୁ ପରାମର୍ଶ ଦେଇଥିଲେ। ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ, ଅତିରିକ୍ତ ଜିଲାପାଳ (ରାଜସ୍ବ), ଅନୁଗୋଳ ସହ ବିଭିନ୍ନ ଉପଖଣ୍ଡର ଉପଜିଲାପାଳ ପ୍ରମୁଖ ବୈଠକରେ ଯୋଗଦେଇଥିଲେ।