ସାରା ବିଶ୍ୱରେ ମେ’ ୧୮ରେ ଆନ୍ତର୍ଜାତିକ ସଂଗ୍ରହାଳୟ ଦିବସ ପାଳନ କରାଯାଉଛି। ଅନ୍ତର୍ରାଷ୍ଟ୍ରୀୟ ସଂଗ୍ରହାଳୟ ପରିଷଦ(ଆଇସିଓଏମ୍) ସଂଯୋଜନାରେ ପାଳିତ ଏହି ଦିବସ ପ୍ରତିବର୍ଷ ଏକ ସ୍ଲୋଗାନ ନେଇ ଲକ୍ଷ୍ୟ ପୂରଣ କରିବା ଦିଗରେ ଅଗ୍ରସର ହେଉଛି। ଆଇସିଓଏମ୍ ବିପର୍ଯ୍ୟୟ ସମୟରେ ସଂଗ୍ରହାଳୟକୁ ସୁରକ୍ଷା ଓ ସହାୟତା ଯୋଗାଇଦେବାରେ ପ୍ରମୁଖ ଭୂମିକା ନିଭାଏ। ୧୯୭୭ରେ ଆଇସିଓଏମ୍ ଦ୍ୱାରା ଆନ୍ତର୍ଜାତିକ ସଂଗ୍ରହାଳୟ ଦିବସ ପ୍ରଥମେ ଆରମ୍ଭ କରାଯାଇଥିଲା। ଲୋକମାନଙ୍କୁ ସଂଗ୍ରହାଳୟ ପ୍ରତି ଆକର୍ଷିତ କରିବା ଓ ଜୀବନରେ ଏହାର ଆବଶ୍ୟକତା ସମ୍ପର୍କରେ ସଚେତନ କରିବା ଏହି ଦିବସର ଉଦ୍ଦେଶ୍ୟ। ବିଭିନ୍ନ ଦେଶରେ ଭିନ୍ନ ଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଇ ଛାତ୍ର, ଗବେଷକ ତଥା ସାଧାରଣ ଲୋକଙ୍କୁ ସଂଗ୍ରହାଳୟରେ ଉପଲବ୍ଧ ସମୃଦ୍ଧ ସାଂସ୍କୃତିକ ଭଣ୍ଡାର ସମ୍ବନ୍ଧରେ ଅବଗତ କରିବା ଏହି ଦିବସର ମୁଖ୍ୟ ଲକ୍ଷ୍ୟ। ୨୦୦୯ରେ ଏହି ଦିବସରେ ବିଶ୍ୱର ୯୦ରୁ ଊର୍ଦ୍ଧ୍ୱ ଦେଶର ୨୦,୦୦୦ ମ୍ୟୁଜିୟମ ଅଂଶଗ୍ରହଣ କରିଥିଲେ। ୨୦୧୦ରେ ୯୮ ଓ ୨୦୧୧ରେ ୧୦୦ଟି ଦେଶ ଏଥିତ୍ରେ ଭାଗ ନେଇଥିଲେ। ୨୦୧୨ରେ ୧୨୯ଟି ଦେଶରୁ ୩୦, ୦୦୦ ମ୍ୟୁଜିୟମ ଏହି ଦିବସ ଅବସରରେ ଭାଗ ନେବା ଥିଲା ଏକ ଉଲ୍ଲେଖନୀୟ ଘଟଣା। ଉକ୍ତ ଦିବସ ଅବସରରେ ଏବେ ବିଶ୍ୱର ୩୮ଟି ଭାଷାରେ ପୋଷ୍ଟର ଅନୁବାଦ କରାଯାଇ ଲୋକମାନଙ୍କୁ ବିଭିନ୍ନ ସୂଚନା ପ୍ରଦାନ କରାଯାଉଛି। ଏହ ଅବସରରେ ସଂଗ୍ରହାଳୟ କର୍ମଚାରୀମାନେ ଲୋକମାନଙ୍କୁ ସାକ୍ଷାତ କରି ଏବକାର ସମୟରେ ସଂଗ୍ରହାଳୟ ଯେଉଁ ସବୁ ଆହ୍ବାନର ସମ୍ମୁଖୀନ ହେଉଛି ସେ ସମ୍ପର୍କରେ ଅବଗତ କରିଥାନ୍ତି। ସମାଜରେ ବିନା ଲାଭରେ ଏକ ସ୍ଥାୟୀ ସଂସ୍ଥା ଭାବେ ମ୍ୟୁଜିୟମ ସମାଜର ସେବା ତଥା ବିକାଶରେ ପ୍ରମୁଖ ଭୂମିକା ନେଉଛି କହିଲେ ଅତ୍ୟୁକ୍ତି ହେବ ନାହିଁ। ଶିକ୍ଷା, ଗବେଷଣା, ଇତିହାସ ଆଦି କ୍ଷେତ୍ରରେ ସଂଗ୍ରହାଳୟ ଯେଉଁ ଭୂମିକା ନିର୍ବାହ କରିଆସୁଛି ତାହା ବଜାୟ ରଖିବାକୁ ହେଲେ ସଂଗ୍ରହାଳୟର ସୁରକ୍ଷା ଲୋଡ଼ା। ଏହି ଦିବସରେ ବିଶ୍ୱର ଅନେକ ଦେଶର ସଂଗ୍ରହାଳୟରେ ନିଃଶୁଳ୍କ ପ୍ରବେଶ ବ୍ୟବସ୍ଥା କରାଯାଏ। ଭାରତରେ ବି ଏଭଳି ବ୍ୟବସ୍ଥା କରାଯାଇଥାଏ।