ସିନାପାଲି, ୨୮।୩ (ଡି.ଏନ.ଏ.): କରୋନା ଭାଇରସକୁ ନେଇ ସାରା ଦେଶରେ ଲକ୍ ଡାଉନ (ତାଲା ବନ୍ଦ) ରହିଛି। ହେଲେ ପେଟପାଟଣା ପାଇଁ ଯାଇଥିବା ନୂଆପଡ଼ା ଜିଲା ସିନାପାଲି ଓ ବୋଡେନ ଅଞ୍ଚଳର ୩୦ଜଣ ଦାଦନ ଶ୍ରମିକ ଆନ୍ଧ୍ରପ୍ରଦେଶରେ ଏବେ ଫସି ରହିଛନ୍ତି । ସେମାନେ ସେଠାରେ ବହୁ ଅସୁବିଧାରେ ରହୁଛନ୍ତି। ଉଦ୍ଧାର ପାଇଁ ନିବେଦନ କରିଛନ୍ତି । ଆନ୍ଧ୍ରପ୍ରଦେଶର ଗୁଣ୍ଠୁର ଜିଲାର ପଲିସି ଶ୍ୟାମସୁନ୍ଦର ତମ୍ବାଖୁ ପ୍ରାଇଭେଟ ଲିମିଟେଡ ନାମକ କମ୍ପାନୀରେ ଏମାନେ ଶ୍ରମିକ ଭାବେ କାମ କରୁଥିଲେ। ସାରା ଦେଶରେ ଲକ୍ ଡାଉନ ହେବା ପରେ କମ୍ପାନୀରେ କାମ ବନ୍ଦ ହୋଇଗଲା । ଯାନବାହାନ ଚଳାଚଳ ମଧ୍ୟ ବନ୍ଦ ରହିଛି । ସେମାନେ ସେଠାରେ ବହୁ ଅସୁବିଧାର ସମ୍ମୁଖୀନ ହେଉଥିବା ଆମ ପ୍ରତିନିଧିଙ୍କୁ ଫୋନ୍ ଯୋଗେ ଜଣାଇଛନ୍ତି।
