ବରଗଡ଼ ଅଫିସ,୭ା୫: ଭୂତାଣୁ ସଂକ୍ରମଣକୁ ନେଇ ଲକ୍ଡାଉନ୍ କଟକଣା ଲାଗୁ ହୋଇଛି। ଏହି କଟକଣା ପରେ ପ୍ରବାସୀ ଶ୍ରମିକଙ୍କ ଦୁଃଖଦୁର୍ଦ୍ଦଶା ବଢ଼ିଯାଇଛି । ଏଭଳି ଭାବେ ଆନ୍ଧ୍ରପ୍ରଦେଶର ଗୁଣ୍ଟୁର ଜିଲା ଚଉଡ଼ାଫାର୍ମ ନିକଟରେ ରହିଥିବା ବଳରାମ କ୍ରିଷ୍ଣା ସ୍ପିନିଂ ମିଲ୍ରେ ବରଗଡ଼ ଓ ବଲାଙ୍ଗୀର ଜିଲାର ୨୦୨ ଶ୍ରମିକ ଫସି ରହିଛନ୍ତି । ସ୍ପିନିଂ ମିଲ୍ ବନ୍ଦ ହୋଇଯାଇଥିବାରୁ ଶ୍ରମିକଙ୍କ ରୋଜଗାର ମଧ୍ୟ ବନ୍ଦ ହୋଇଯାଇଛି। ସେହିପରି ଦୋକାନ, ବଜାର ବନ୍ଦ ଥିବାରୁ ସେମାନଙ୍କ ଖାଇବା, ପିଇବାରେ ଅସୁବିଧା ପରିଲକ୍ଷିତ ହୋଇଛି। ଏଭଳି ସ୍ଥଳେ ସେମାନେ ଘରକୁ ଫେରିବାକୁ ଚାହୁଁଛନ୍ତି । ମାତ୍ର ଟ୍ରେନ୍ ଏବଂ ବସ୍ ଚାଲୁ ନ ଥିବାରୁ ସେମାନେ ଘରକୁ ଫେରି ପାରୁ ନାହାନ୍ତି । ତେବେ ଏହା ଜାଣିବା ପରେ ବରଗଡ଼ର ସାମାଜିକ କର୍ମୀ ଦିବସ କୁମାର ସାହୁ ଓଡ଼ିଶାର ମୁଖ୍ୟମନ୍ତ୍ରୀ, ଆଇଜି ଅମିତାଭ ଠାକୁର ପ୍ରମୁଖଙ୍କୁ ଟୁଇଟ୍ କରି ନିଦେଦନ କରିଥିଲେ। ଏହାପରେ ସମ୍ପୃକ୍ତ ଶ୍ରମିକଙ୍କୁ ଉଦ୍ଧାର ପ୍ରକ୍ରିୟା ଆରମ୍ଭ ହୋଇଥିବା ସୂଚନା ମିଳିଛି। ଫସି ରହିଥିବା ଶ୍ରମିକଙ୍କ ନିକଟରେ ଗୁରୁବାର ଆନ୍ଧ୍ରପ୍ରଦେଶର ୪ ଜଣ ଅଧିକାରୀ ପହଞ୍ଚିଥିଲେ। ଆସନ୍ତା ୭ ଦିନ ମଧ୍ୟରେ ଟ୍ରେନ୍ ଯୋଗେ ଓଡ଼ିଶାରେ ପହଞ୍ଚାଇବା ପାଇଁ ବ୍ୟବସ୍ଥା କରାଯିବ ବୋଲି ଅଧିକାରୀମାନେ ଶ୍ରମିକମାନଙ୍କୁ କହିଥିବା ପ୍ରକାଶ।