ନୂଆଦିଲ୍ଲୀ,୧୬।୫(ପି.ଟି.): ପାକିସ୍ତାନର ହିନ୍ଦୁ କ୍ରିକେଟର ଡାନିସ କାନେରିଆ ଶେଷରେ ମୁହଁ ଖୋଲିଛନ୍ତି। ପୂର୍ବତନ ଅଲରାଉଣ୍ଡର ତଥା ଅଧିନାୟକ ସହିଦ ଆଫ୍ରିଦିଙ୍କ ବିରୋଧରେ ସେ ମହା ଅଭିଯୋଗ ଆଣିଛନ୍ତି। ସାରା କ୍ୟାରିୟରରେ ଆଫ୍ରିଦି ମୋତେ ଖରାପ୍ ବ୍ୟବହାର କରିଛନ୍ତି ଓ ମୋ ଦିନିକିଆ କ୍ୟାରିୟର ନଷ୍ଟ କରିବାରେ ମୁଖ୍ୟ ଭୂମିକା ଗ୍ରହଣ କରିଛନ୍ତି।
ଦ୍ୱିତୀୟ ହିନ୍ଦୁ କ୍ରିକେଟର ଭାବେ କାନେରିଆ ପାକିସ୍ତାନ ପାଇଁ ଖେଳିଛନ୍ତି। ପୂର୍ବରୁ ତାଙ୍କ ମାମୁଁ ଅନିଲ ଦଳପତ୍ ପାକିସ୍ତାନ ପାଇଁ ଅନ୍ତର୍ଜାତୀୟ କ୍ରିକେଟ ଖେଳିଥିଲେ। କାନେରିଆ ୩୪. ୭୯ ରନ ହାରରେ ୬୧ଟି ଟେଷ୍ଟ ୨୬୧ଟି ଉଇକେଟ ହାସଲ କରିଥିଲେ। ତେବେ ୨୦୦୦ରୁ ୨୦୧୦ ମଧ୍ୟରେ ସେ ଦିନିକିଆ ଫର୍ମାଟରେ ମାତ୍ର ୧୮ଟି ମ୍ୟାଚ୍ ଖେଳିଥିଲେ। ଧାର୍ମିକ କାରଣରୁ ଆଫ୍ରିଦି ତାଙ୍କୁ ସବୁବେଳେ ଖରାପ୍ ବ୍ୟବହାର କରିଛନ୍ତି। ଏହାର ଅନ୍ୟ କୌଣସି କାରଣ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ପୂର୍ବରୁ ସେ ହିନ୍ଦୁ ହୋଇଥିବାରୁ ଏଭଳି ଅଣଦେଖାରେ ଶିକାର ହୋଇଥିଲେ ବୋଲି ପାକିସ୍ତାନ ପୂର୍ବତନ ଦ୍ରୁତ ବୋଲର ସୋଏବ ଅଖତର ମନ୍ତବ୍ୟ ଦେଇ ବିବାଦ ସୃଷ୍ଟି କରିଥିଲେ। ଯଦି ଆଫ୍ରିଦ ନ ଥାନ୍ତେ ତାହାଲେ ଅଧିକ ସଂଖ୍ୟାରେ ଦିନିକିଆ ଖେଳିପାରି ଥାନ୍ତି ବୋଲି ସେ କହିଛନ୍ତି। ଘରୋଇ କ୍ରିକେଟ ଖେଳିବା ବେଳେ ଆଫ୍ରିଦି ଅଧିନାୟକ ଥିଲେ। ସେ ସବୁବେଳେ ମୋତେ ଦଳ ବାହାର ରଖିବାକୁ ପ୍ରୟାସ କରିଥିଲେ। ଦିନିକିଆରେ ମଧ୍ୟ ସେ ଏପରି ଆଚରଣ ପ୍ରଦର୍ଶନ କରିଥିଲେ। ଦିନିକିଆରେ ତାଙ୍କ ଯୋଗୁ ହିଁ ଅଧିକ ମ୍ୟାଚ୍ ଖେଳିପାରି ନ ଥିଲି। ମୁଁ ଜଣେ ଲେଗ୍ ସ୍ପିନର ଥିଲି। ଏହା ମଧ୍ୟ ଅନ୍ୟ କାରଣ ହୋଇପାରେ। ଦଳରେ ଜଣେ ସ୍ପିନର ଖେଳିବେ ଓ ମୋ ଦୁର୍ବଳ ଫିଲ୍ଡିଂକୁ ଏଥିପାଇଁ ଦାୟୀ କରାଯାଉଛି। କିନ୍ତୁ ସେତେବେଳେ ପାକିସ୍ତାନ ଦଳରେ ଭଲ ଫିଲ୍ଡର ନ ଥିଲେ ବୋଲି କାନେରିଆ କହିଛନ୍ତି। ତେବେ ଇଞ୍ଜାମାମ ଉଲ ହକ୍ ଓ ୟୁନିସ୍ ଖାଁ ମୋତେ ବହୁତ ସମର୍ଥନ କରିଛନ୍ତି। ସର୍ବଜନୀନ ଭାବେ ମୋ ବିଷୟ ସକାରାତ୍ମକ କଥା କହି ନ ଥିଲେ ମଧ୍ୟ ଇଞ୍ଜାମାମ ମୋତେ ସମର୍ଥନ ଜଣାଇଥିଲେ। ତାଙ୍କ ନେତୃତ୍ୱରେ ଆଗକୁ ବଢିବାର ସୁଯୋଗ ପାଇଥିଲି ବୋଲି କାନେରିଆ କହିଛନ୍ତି।