ଭୁବନେଶ୍ୱର,୧୨।୪: ଲକ୍ଡାଉନ ସ୍ଥିତିରେ ଆବଶ୍ୟକ ସାମଗ୍ରୀ ପରିବହନ ଲାଗି ରେଲଓ୍ବେ ପକ୍ଷରୁ ନିରନ୍ତର ସେବା ଯୋଗାଣ ହେଉଛି। ଶନିବାର ସକାଳୁ ବିଶାଖାପାଟଣା ରେଳଷ୍ଟେଶନରୁ ସ୍ବତନ୍ତ୍ର ପାର୍ସଲ ଏକ୍ସପ୍ରେସ ଦ୍ୱାରା ଔଷଧ ସାମଗ୍ରୀ ବୋଝେଇ କରି ପଲାସା, ବ୍ରହ୍ମପୁର, ବଲାଙ୍ଗୀର, ବରଗଡ଼, ସମ୍ବଲପୁର ଓ ରାୟଗଡ଼ା ଆଦି ଷ୍ଟେଶନରେ ଖଲାସ କରାଯାଇଛି। ଏହାବାଦ କେସିଙ୍ଗାରେ ମେଡିକାଲ ଯନ୍ତ୍ରପାତି ଖଲାସ କରାଯାଇଛି। ଏହାବାଦ ବିଶାଖାପାଟଣାରୁ ଦୁଗ୍ଧ ପାଉଡର ଏବଂ ଅନ୍ୟାନ୍ୟ ଔଷଧ ସାମଗ୍ରୀ ବ୍ରହ୍ମପୁର ରେଳ ଷ୍ଟେଶନରେ ଖଲାସ କରାଯାଇଛି। ବିଜୟନଗରମରୁ ପଇଡ଼ ବଲାଙ୍ଗୀର ଏବଂ ଟିଟିଲାଗଡ଼ ପଠାଯାଇଛି। ସେହିଭଳି ବିଜୟନଗରମକୁ ଗ୍ରସେରି ରାୟଗଡ଼ା ଆସିଛି।
ଭାରତୀୟ ଖାଦ୍ୟ ନିଗମ ଦ୍ୱାରା ୩୩୬୪ ଟନ୍ ଗହମ ୮୮ଟି ଓ୍ବାଗନରେ ମଧ୍ୟପ୍ରଦେଶର ଗର୍ହା ଷ୍ଟେଶନରୁ କଟକ ଷ୍ଟେଶନ ଆସି ସେଠାରେ ଖଲାସ ହୋଇଛି। ଦେଶର ବିଭିନ୍ନ ପ୍ରାନ୍ତକୁ ସାମଗ୍ରୀ ପହଞ୍ଚାଇବା ନେଇ ଗୁରୁଦାୟିତ୍ୱ ଗ୍ରହଣ କରିଥିବା ରେଲଓ୍ବେ ପକ୍ଷରୁ ସୂଚନା ରହିଛି। ଏହି କାର୍ଯ୍ୟ ଲାଗି ରେଳପଥ ମାଲବାହୀ ଟ୍ରେନ, ପାର୍ସଲ ଏକ୍ସପ୍ରେସ ଚଳାଚଳ କରାଉଛି। ଖାଦ୍ୟଶସ୍ୟ, ପେଟ୍ରୋଲିୟମ, କୋଇଲା, ଫଳ, ପନିପରିବା, ଦୁଗ୍ଧ, ଜାଳେଣି ତୈଳ, ଚିନି, ଲୁଣ, ଔଷଧ ଇଦ୍ୟାଦି ସାମଗ୍ରୀ ବର୍ତ୍ତମାନ ରେଳପଥ ପକ୍ଷରୁ ପରିବହନ ହେଉଥିବା ସୂଚନା ରହିଛି। ସେହିଭଳି ରେଲଓ୍ବେ ୧୦ ଲକ୍ଷରୁ ଊର୍ଦ୍ଧ୍ୱ ଲୋକଙ୍କୁ ରନ୍ଧାଖାଦ୍ୟ ପ୍ରଦାନ କରିଛି। ଲକ୍ଡାଉନ ସମୟରେ ମଧ୍ୟ ଯାତ୍ରୀ ସୂଚନା ପ୍ରଦାନ ବ୍ୟବସ୍ଥାକୁ ଏହା ଅବ୍ୟାହତ ରଖିଛି।