କୋମନା, ୧୧ା୨ (ଡି.ଏନ୍.ଏ.)-
କେନ୍ଦ୍ର ଆର ରାଏଜ୍ ଉଭଏ ସରକାର ଗରିବ୍ ଦୁଖି, ଅସାହା, ଭୂମିହୀନ ପରିବାରମାନକୁ ଆବାସ ଯୋଜନାରେ ପକାଘର ଯୁଗେଇ ଦେଉଛନ୍। ହେଲେ ଅନେକ ଜାଗାରେ ସରକାରୀ ଅଧ୍କାରୀ, କରମଚାରୀକଁର ଉଦାସୀନତା ଲାଗି ହକ୍ଦାର ଗରିବ୍ ଦୁଖି ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ସେମାନେ ପଁଚେତ୍ରୁ ବ୍ଲକ ତକ୍ ଗୁହାରି କରୁଥିଲେ ବି କେହି ତାକର କଥା ନାଇଁ ଶୁନୁଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ନୂଆପଡ଼ା ଜିଲା କୋମନା ବ୍ଲକ ଗଣ୍ଡାମେର ପଁଚେତ୍ ଅଧୀନ କେନ୍ଦୁଭଟା ଗଁାର ବୁରୁଧ୍ କାଶୀରାମ ନାଗ(୭୦)। ପରିବାର କହିଲେ ମାଏକିନା ଫଗନୀ ନାଗ(୬୫) ଆର ପୁଓ ସନ୍ତୋଷ(୩୫)କେ ନେଇ ସଁସାର। କାଶୀରାମ ଆର ଫଗନୀ ଦିବ୍ୟାଙ୍ଗ ଆଏ। ପେଟ୍ପାଟନାର ଲାଗି ସନ୍ତୋଷ ବଛରର ବଡ଼ଭାଗି ସମିଆ ଦାଦନ ଖଟିଯାଉଛନ୍। ସେ ଟଁକା ପଠାଲେ ଯାଇ ବୁରୁଧ୍ ମା’ବାପ୍ ଚଲୁଛନ୍। ଇଆଡ଼େ କାଶୀରାମକଁର ଜମିବାଡ଼ି ବଲି କିଛି ନାଇଁ। ବଲବଏସ ଥିଲାବେଲେ ପରହର କାମ୍ବୁତା କରି କୁଟୁମ ପୁଷୁଥିଲେ। ଏହେଦେ ରୋଗ୍ ବେମାରି ସଂଗେ ବଏସ୍ ଅଧ୍କା ହେବାର ଲାଗି ବୁରୁଧ୍ ଦମ୍ପତି ଭିନ୍ନକ୍ଷମ ପାଲଟିଯାଇଛନ୍। ଇ ଦିବ୍ୟାଙ୍ଗ ଦମ୍ପତି ସରକାରୀ ଯୋଜନାରେ ପଁଚେତ୍ରୁ ମାସିକ ୧୦ କେ.ଜି. ଚାଉଲ ଆର ୫ଶହ ଟଁକା ଲେଖେଁ ଭତା ପାଉଛନ୍। ହେଲେ ଫିମାସ ୫ କି.ମି. ଦୂରିଆ ପଁଚେତ୍ ଅଫିସରୁ ଚାଉଲ ଆନ୍ବାର ଲାଗି କାଶୀରାମ ବଡ଼ା ହଇରାନ ହରକତ ହେଉଥିବାର କହିଛନ୍। ଭତା ଟଁକାରେ ବୁରୁଧ୍ ଦମ୍ପତି ନିଜର ଉଷୋକଷାରେ ଖରଚ୍ କରୁଥିଲାବେଲେ ତେଲନୁନ୍, କପଡ଼ାଲତା ଖରଚ୍ ତୁଲାଲାବେଲେ ଭିଡ଼ ପଡ଼ିଯାଉଛେ। ଫଗନୀ ରୋଗ୍ ବେମାରି ଲାଗି ଚଲାବୁଲା, ଉଠାବସା କରି ନାଇଁ ପାରବାର। ଏନ୍ତାଥି କାଶୀରାମ ବଡ଼ା ଦୁଖେ ଭାତଦୁରା ରଁାଧୁଛନ୍। ଏନ୍ତା ଅଭାବିଆ ପରିସ୍ଥିତିରେ ନିଜର ପୁରନା ଘରଟାକେ ବି ମରାମତି କରି ନାଇଁପାରବାର। ବରଷା ଦିନେ ଦରୋ ଦରୋ ପାଏନ୍ ଗଲୁଛେ। ବୁଢ଼ାବୁଢ଼ୀ ବଡ଼ା ଦୁଖେ ଜୀବନ୍ ବିତଉଛୁଁ ବଲି କାଶୀରାମ କହିଛନ୍। ଇ ବୁରୁଧ୍ ଦମ୍ପତି ଉପରେ ଜିଲା ଆର ବ୍ଲକ ପରଶାସନ ଦୁରୁଷ୍ଟି ଦେଇ ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ଗଁାବାସୀ ଦାବି କରିଛନ୍।