ଜହ୍ନାପଙ୍କ, ୨୦।୩ (ଡି.ଏନ୍.ଏ.)-
କେନ୍ଦ୍ର ଆର ରାଏଜ୍ ଉଭଏ ସରକାର ଗରିବ୍ ଦୁଖି, ନିଅଁ।ସି, ଦିବ୍ୟାଙ୍ଗମାନକୁ ପ୍ରଧାନମନ୍ତ୍ରୀ ଆବାସ, ଇନ୍ଦିରା ଆବାସ, ବିଜୁ ପକାଘର ଯୋଜନାରେ ପକାଘର ଯୁଗେଇ ଦେଉଛନ୍। ହେଲେ ବୌଦ୍ଧ ଜିଲା ସଦର ବ୍ଲକରେ ଇ ଯୋଜନା ବାଟ୍ବନା ହେଇଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ବୌଦ୍ଧ ବ୍ଲକ ଲକ୍ଷ୍ମୀପ୍ରସାଦ ପଁଚେତ୍ ମନ୍ଦିର ସାହିର ଶମ୍ଭୁ ନାଏକକଁର ଝି’ ବାସନ୍ତୀ ନାଏକ(୩୮)। ଆଏଜ୍କେ ୨୦ ବଛର ତଲେ ସେ ଇ ପଁଚେତ୍ ଅଧୀନ ଡୁମ୍ବୁରିବେଡ଼ା ଗଁାରେ ବିହା ହେଇଥିଲେ। ବିହାର ମାସକେତେ ଉତାରୁ ବାସନ୍ତୀକଁର ମାନ୍ସିକ ଥିତି ଠିକ୍ ନାଇଁ ରହିଲା। ଏନ୍ତାଥି ପରିବାର ତରଫୁ ସମାଜର ବଇଠକ୍ ଡାକି ବାସନ୍ତୀକଁର ଛାଡ଼ପତର କରାଯାଇଥିଲା। ସେ ଦିନ୍ଠାନୁ ଆଏଜ୍କେ ୧୮ ବଛର ହେଲା ବାସନ୍ତୀ ବାପ୍ ଘରେ ଆଶ୍ରେ ନେଇଛନ୍। ମାନ୍ସିକ ଥିତି ବିଗିଡ଼ି ଯିବାର ଲାଗି ଏହେଦେ ବାସନ୍ତୀ ଦିବ୍ୟାଙ୍ଗ ଜୀବନ୍ ବିତଉଛନ୍। ଇଆଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ଶମ୍ଭୁ କୁଲିମଜୁରି କରି କୁଟୁମ୍ ପୁଷୁଛନ୍। ପରିବାରକେ ସରକାରୀ ଯୋଜନାରେ ମାସିକ ୧୫ କେ.ଜି. ଚାଉଲ ଆର ୧୫ଶହ ଟଁକା ଭତା ମିଲୁଛେ। ହେଲେ ଶମ୍ଭୁ ଦିବ୍ୟାଙ୍ଗ ଝି’କେ ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ଥାନୀଅ ସରପଁଚ୍ନୁ ବିଡିଓ ତକ୍ ଗୁହାରି କରି ନିରାଶ ହେଇଥିବାର କହିଛନ୍। ଇ ବାବ୍ଦେ ବୌଦ୍ଧ ବିଡିଓ ସନ୍ତୋଷ କୁମାର ଜାନୀକୁଁ ପଚ୍ରାଲାରୁ ଯଦି ଓ୍ବେଟିଂ ଲିଷ୍ଟରେ ତାକର ନଁା ଥିବା ତାହାକୁ ଘର ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ।