ଜହ୍ନାପଙ୍କ, ୨୮।୮ (ଡି.ଏନ୍.ଏ.): ବୌଦ୍ଧ ଜିଲା ତେଲିବନ୍ଧ ପଁଚେତ୍ ଅଧୀନ ରାମପୁର ଗଁାର ପୂର୍ଣ୍ଣବାସୀ ଦାସ ଗୁଟେ ଭଂଗା ଦଦ୍ରା ଘରେ ଜୀବନ୍କେ ପାଏନ୍ ଛଡ଼େଇ ରହୁଛନ୍। ଇଆଡ଼େ କେନ୍ଦ୍ର ଆର ରାଏଜ୍ ସରକାର ଗରିବ୍ ଦୁଖି, ବାସହୀନ ପରିବାରମାନକୁ ଭିନେ ଭିନେ ଯୋଜନାରେ ପକାଘର ଯୁଗେଇ ଦେଉଛନ୍। ହେଲେ ବିଭାଗୀୟ ଅଧ୍କାରୀମାନକର ଉଦାସିନ୍ତା ଲାଗି ଏନ୍ତା ଅନେକ ହକ୍ଦାର ହିତାଧିକାରୀ ଯୋଜନାର ଲାଭ୍ ପାଏବାରୁ ବଁଚିତ୍ ହେଉଛନ୍।
ସୂଚନା ଅନ୍ସାରେ ରାମପୁର ଗଁାର ପୂର୍ଣ୍ଣବାସୀ ଦାସ ବିପିଏଲ୍ ଶ୍ରେଣୀରେ ରହିଛନ୍। ଆପ୍ନେ ୧୦ ବଛର ତଲେ ଆରପାରକେ ଚାଲିଯାଇଛନ୍। ଏନ୍ତାଥି ନିସାହା ବିଧବା ପୂର୍ଣ୍ଣବାସୀ ଭିଖ୍ ମାଗି ନିଜର ପେଟ୍ ପାଲୁଛନ୍। ଯେନ୍ଦିନ ଭିଖ୍ ମାଗିଯାଇ ନାଇଁପାରବାର ସେଦିନ ଖାଡ଼ା ଉପାସରେ ରହୁଛନ୍। ଇଆଡ଼େ ଜମିବାଡ଼ି ବଲି କିଛି ନାଇଁ। ସରକାରୀ ସାହାଯ୍ କହେଲେ ପୂର୍ଣ୍ଣବାସୀ ମାସିକ ପାଉଥିବାର ୩ଶହ ଟଁକା ବିଧବା ଭତା ଆର ପଁଚେତ୍ରୁ ମିଲୁଥିବାର ୧୦ କେ.ଜି. ଚାଉଲ ନ ସାହାଭରସା। ଏନ୍ତାଥି ସେ ରହୁଥିବାର ଝାଟିମାଟି ଘରଟା ବି ମରାମତି କରି ନାଇଁ ପାରବାର। ଅଲପ୍ ବରଷାରେ ବି ଘରଟା ଦରୋ ଦରୋ ଗଲୁଛେ। ସେ ରହୁଥିବାର ଘରଟା ଗୁଟେ ଗାଈ ଗୁହାଲନୁ ହୀନ ଅବସ୍ତାରେ ରହିଛେ। କେତେବେଲେ ଘରଟା ମାଡ଼ି ବସବା କିଛି କହି ନାଇଁ ହେବାର। ଏନ୍ତାଥି ପୂର୍ଣ୍ଣବାସୀ ଉପେ ଶୂଇନ୍ ହେଇ, ଜୀବନ୍କେ ପାଏନ୍ ଛଡ଼େଇ ସେ ଭଂଗା ଦଦ୍ରା ଘରେ ରହୁଛନ୍। ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ପୂର୍ଣ୍ଣବାସୀ ପଁଚେତ୍ନୁ ବ୍ଲକ ତକ୍ ଗୁହାରି କରି ନିରାଶ ହେଇଥିବାର କହିଛନ୍। ଇ ବାବ୍ଦେ ମତାମତ ଲାଗି ତେଲିବନ୍ଧ ପଁଚେତ୍ କାର୍ଯ୍ୟନିର୍ବାହୀ ଅଧ୍କାରୀକୁଁ ଯୋଗାଯୋଗ କରାଯାଇଥିଲେ ବି କେହେନ୍ସି କାରନ୍ରୁ ସେ ଫୋନ୍ ନାଇଁ ଉଠେଇ। ଯେନ୍ଥିରଲାଗି ତାକର ମତାମତ ନାଇଁ ମିଲିପାରି।