ଅନୁଗୋଳ ଅଫିସ, ୯।୯: ଅନୁଗୋଳ ବ୍ଲକ ବେଡ଼ାଶାସନ ପଞ୍ଚାୟତର ଦୁଇଟି ଗାଁରେ ଆବାସ ଯୋଜନାରେ ଦୁର୍ନୀତି ହୋଇଥିବା ନେଇ ବିଡିଓଙ୍କ ନିକଟରେ ଅଭିଯୋଗ ହୋଇଥିଲା। ଏହି ଘଟଣାରେ ଅନୁଗୋଳ ବିଡିଓ ୪ ଜଣିଆ ଟିମ୍ ଗଠନ କରି ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ। ପ୍ରାଥମିକ ରିପୋର୍ଟରେ ଆବାସ ଯୋଜନାରେ ଦୁର୍ନୀତି ଗନ୍ଧ ବାରି ହୋଇପଡ଼ିବା ପରେ ଏବେ କାର୍ଯ୍ୟାଳୟରେ ଉକ୍ତ ପଞ୍ଚାୟତର କାଗଜପତ୍ର ଯାଞ୍ଚ ଚାଲିଛି। ଯାଞ୍ଚ ସରିବା ପରେ ଗଢ଼ା ଯାଇଥିବା ଟିମ୍ ଗ୍ରାଉଣ୍ଡ ଜିରୋକୁ ଯାଇ ତଦନ୍ତ କରିବ ବୋଲି ବିଡିଓ ମାୟାଧର ବେହେରା କହିଛନ୍ତି।
ଅନୁଗୋଳ ବେଡ଼ାଶାସନ ପଞ୍ଚାୟତରେ ଆବାସ ଯୋଜନାର ଗୋଟିଏ ଘଟଣାରେ ଦୁର୍ନୀତି ହୋଇଥିବା ଆଭାସ ମିଳିଛି। ୨୦୧୩-୧୪ରେ ଜଣଙ୍କ ନାମରେ ଦୁଇ ଥର ଆବାସ ପ୍ରଦାନ କରାଯାଇଥିବା ପ୍ରାଥମିକ ତଦନ୍ତରୁ ସୂଚନା ମିଳିଛି। କିନ୍ତୁ ଦସ୍ତାବିଜ ଯାଞ୍ଚ ସରିବା ପରେ ସ୍ପଷ୍ଟ ହେବ ବୋଲି ବିଡିଓ ବେହେରା ସୂଚନା ଦେଇଛନ୍ତି। ଏଥିସହ ୨୦୧୯-୨୦ରେ ଉକ୍ତ ପଞ୍ଚାୟତରେ ପ୍ରଦାନ କରାଯାଇଥିବା ମୋଟ ୩୩ଟି ଘରର ଦସ୍ତାବିଜ୍ ମଧ୍ୟ ଯାଞ୍ଚ କରାଯାଉଛି। ଏହାପରେ ପଞ୍ଚାୟତ କାର୍ଯ୍ୟାଳୟରେ ଥିବା କାଗଜପତ୍ର ତନଖି କରାଯାଇ ଲୋକଙ୍କ ନିକଟରୁ ବୟାନ ରେକର୍ଡ କରାଯିବ। ଗୋଟିଏ ପରିବାରର ଏକାଧିକ ଲୋକ ଆବାସ ଯୋଜନାରେ ସାମିଲ ହେବା ଓ ଗୋଟିଏ ଲୋକ ଦୁଇଥର ଯୋଜନା ହାତେଇବା ଏକ ଆପରାଧିକ କାର୍ଯ୍ୟକଳାପ। ଏ ନେଇ ଉପଯୁକ୍ତ ପ୍ରମାଣ ମିଳିଲେ ଦାୟୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥିସହ ହିତାଧିକାରୀଙ୍କୁ ମଧ୍ୟ ଏହି ଯୋଜନାରୁ ବାଦ୍ ଦିଆଯିବ ବୋଲି ବିଡିଓ ବେହେରା ପ୍ରକାଶ କରିଛନ୍ତି।