ଅନୁଗୋଳ ଅଫିସ, ୧୭।୧୦- ଅନୁଗୋଳ ବ୍ଲକ ବେଡ଼ାଶାସନ ପଞ୍ଚାୟତରେ ୩ଟି ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ଅଭିଯୋଗର ତଦନ୍ତ ରିପୋର୍ଟ ଆସିବା ପରେ ଉକ୍ତ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ)ଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ତୁରନ୍ତ ଏହାର ଉତ୍ତର ଦେବା ପାଇଁ ଅନୁଗୋଳ ବିଡିଓ ମାୟାଧର ବେହେରା ନିର୍ଦ୍ଦେଶ ଦେଇଛନ୍ତି। ଏଥିସହ ବେଡ଼ାଶାସନ ପଞ୍ଚାୟତ ନିର୍ବାହୀ ଅଧିକାରୀ ପଦରୁ ଜେନାମଣି ଗଡ଼ନାୟକଙ୍କୁ ବିରତି ଦିଆଯାଇଛି ବୋଲି ବିଡିଓ କହିଛନ୍ତି।
ଉକ୍ତ ଅଭିଯୋଗର ତଦନ୍ତ ପାଇଁ ଅନୁଗୋଳ ବିଡିଓ ଏକ ୪ ଜଣିଆ ଟିମ୍ ଗଠନ କରିଥିଲେ। ଗତ ୩ ତାରିଖରେ ରିପୋର୍ଟ ଆସିବା ପରେ ବୁଧବାର ପିଇଓଙ୍କୁ କାରଣ ଦର୍ଶାଅ ନୋଟିସ୍ କରାଯାଇଛି। ଏଥିସହ ଦୁଇଟି ଘର ପାଇଁ ଦିଆଯାଇଥିବା ପ୍ରଥମ କିସ୍ତିର ଟଙ୍କା ଫେରସ୍ତ ନିମନ୍ତେ ମଧ୍ୟ ନିର୍ଦ୍ଦେଶ ଦିଆଯାଇଛି। ଅନ୍ୟ ଏକ ଘରର କାର୍ଯ୍ୟାଦେଶକୁ ବାତିଲ କରାଯାଇଥିବା ବିଡିଓ ବେହେରା କହିଛନ୍ତି। ତେବେ ଟଙ୍କା ଫେରସ୍ତ ପରେ ଉକ୍ତ ଦୁଇଟି ଘରର କାର୍ଯ୍ୟାଦେଶ ବାତିଲ କରାଯିବ ବୋଲି ସେ ସୂଚନା ଦେଇଛନ୍ତି। ସୂଚନାଯୋଗ୍ୟ ଯେ, ୨୦୧୯-୨୦ ବର୍ଷରେ ଉକ୍ତ ପଞ୍ଚାୟତକୁ ବଣ୍ଟାଯାଇଥିବା ଆବାସ ଯୋଜନାରେ ଦୁର୍ନୀତି ହୋଇଥିବା ଅଭିଯୋଗ ଆସିଥିଲା। ବଣ୍ଟାଯାଇଥିବା ୩୩ଟି ଆବାସ ଯୋଜନାରେ ୩ ଅଯୋଗ୍ୟଙ୍କୁ ଯୋଗ୍ୟ କରାଯାଇଥିବା ତଦନ୍ତ ରିପୋର୍ଟରୁ ଜଣାପଡ଼ିଥିଲା।