ଲାଠୋର, ୨୪।୨ (ଡି.ଏନ୍.ଏ.)- ବଲାଙ୍ଗୀର ଜିଲା ତୁରେକେଲା ବ୍ଲକ ହଲନଭଟା ପଁଚେତ୍ ଅଧୀନ ଖର୍ଲି ଗଁାର ଟୁନକୁ ଭଇଁଷାଲ। କୁଟୁମ ବସିଆ ସେ ଗୁଟେ ଭଂଗା ଦଦ୍ରା ମାଏଟ୍ ଖପର ଘରେ ରହୁଛନ୍। ସରକାରୀ ଯୋଜନାରେ ଘର ଖଁଡ଼େ ପାଏବାର ଲାଗି ସେ ବାରବାର ଆବେଦନ କରି ନିରାଶ ହେଇଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ ଖର୍ଲି ଗଁାର ଟୁନକୁ ଭଇଁଷାଲକଁର ପରିବାର କହେଲେ ମାଏକିନା ହଂସା, ଝି’ ସବିତା ଆର ପୁଓ ସମିରକେ ନେଇ ତାକର ସଁସାର। ପୁରଖାପାତିନୁ ଜମିବାଡ଼ି ଟିକେ ଅଛେ, ହେଲେ ଅଭାବ ଅନାଟନରୁ ସେଟା ବି ଠିକ୍ରେ ଚାଷବାସ କରି ନାଇଁପାରବାର। ଜମିରୁ ଚାଏର ମାସର ଖାଏବାରଟା ବାହାରୁଛେ। ବାକି ସମିଆ କୁଲିମଜୁରି କରି ସେ କୁଟୁମ୍ ପୁଷୁଛନ୍। ଝି’ ସବିତା ମାଟ୍ରିକ ପାସ୍ କରିଥିଲେ ବି ଅଭାବ ଅନାଟନରୁ ତାକର ପାଠ୍ପଢ଼ାରେ ଗଏଁଠ୍ ପଡ଼ିଛେ। ସେନ୍ତା ପୁଓ ସମିର ଏହେଦେ ନବମ ଶ୍ରେଣୀରେ ପଢ଼ୁଛନ୍। ଇଆଡ଼େ ପରିବାରରେ ୪ ପରାନୀ ଥିଲାବେଲେ ସରକାରୀ ସାହାଯ୍ ହିସାବେ ମାସିକ ୧୫ କେ.ଜି. ନ ଚାଉଲ ମିଲୁଛେ। ଘରଟା ଭଂଗା ଦଦ୍ରା ଅବସ୍ତାରେ ଥିଲେ ବି ଅଭାବ ଅନାଟନ ଲାଗି ଟୁନକୁ ମରାମତି କରି ନାଇଁପାରବାର। ଏନ୍ତାଥି ସେ ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ଅନେକ ଥର ଦରକାରୀ କାଗଜପତର ଦେଇ ପଁଚେତ୍ରେ ଆବେଦନ କରିଛନ୍। ହେଲେ ପଁଚେତ୍ କତୁରପକ୍ଷ ଆଏଜ୍ ହେବା କାଏଲ୍ ହେବା କହି ସମିଆ ଗଡ଼ଉଥିବାର ଟୁନକୁ ଅଭିଯୋଗ କରିଛନ୍। ବଛରର ବାକି ସମିଆ ଦୁଖେ କଷ୍ଟେ ଚଲିଯାଉଥିଲାବେଲେ ବରଷା ଚାଏର ମାସକ ପରିବାରର ଦୁଖ୍ ଗାଉନି ଯାଉଛେ ବଲି କହିଛନ୍। ବରଷା ପାଏନ୍ରେ ଘରଟା ଦର୍ହ ଛୁଟିଯାଉଛେ। ଘରେ ଚୁଲି ଜାଲବାର ଲାଗି ଜାଗାଠାନ୍ ନାଇଁ ରହିବାର ବଲି ଟୁନକୁ କହିଛନ୍। ବ୍ଲକ ପରଶାସନ ଘଟନାର ତଦଁତ୍ କରି ଇ ଗରିବ୍ ପରିବାରକେ ଆବାସ ଯୋଜନାରେ ଘର ଖଁଡ଼େ ଯୁଗେଇ ଦେବାକେ ସାଧାରନରେ ଦାବି ହେଉଛେ।