ଓ୍ବାଶିଂଟନ,୧୨।୪: ଆମେରିକା କୋଭିଡ୍-୧୯ ସଂକ୍ରମଣର ବିଶ୍ୱ ହଟ୍ସ୍ପଟରେ ପରିଣତ ହୋଇଛି। ଏଠାରେ କରୋନା ସଂକ୍ରମଣରେ ୪୦ରୁ ଊର୍ଦ୍ଧ୍ୱ ଭାରତୀୟ ନାଗରିକ ତଥା ଭାରତୀୟ-ଆମେରିକୀୟଙ୍କର ମୃତ୍ୟୁ ଘଟିଲାଣି। ଏହି ଘାତକ ଭୂତାଣୁ ଦ୍ୱାରା ସେଠାରେ ୧୫୦୦ରୁ ଅଧିକ ଭାରତୀୟ ସଂକ୍ରମିତ ହୋଇଥିବା ଜଣାପଡିଛି। ଆମେରିକାରେ କରୋନା ସଂକ୍ରମିତଙ୍କ ସଂଖ୍ୟା ୫ ଲକ୍ଷ ଅତିକ୍ରମ କରିଥିବାବେଳେ ଗତ ୨୪ ଘଣ୍ଟାରେ ୨୧୦୮ ଜଣଙ୍କ ମୃତ୍ୟୁ ଘଟିଲାଣି। ନ୍ୟୁୟର୍କ ଓ ନ୍ୟୁଜର୍ସିରେ ସଂକ୍ରମଣ ମାତ୍ରା ସର୍ବାଧିକ ରହିଛି। ଆମେରିକାରେ କେରଳର ୧୭ ଜଣଙ୍କ ମୃତ୍ୟୁ ହୋଇଥିବାବେଳେ ଗୁଜରାଟରୁ ୧୦, ପଞ୍ଜାବରୁ ୪, ଆନ୍ଧ୍ରପ୍ରଦେଶରୁ ୨ ଏବଂ ଓଡ଼ିଶାରୁ ଜଣକର ମୃତ୍ୟୁ ଘଟିଛି। ଅଧିକାଂଶ ମୃତକଙ୍କ ବୟସ ୬୦ ବର୍ଷରୁ ଅଧିକ।