ନୂଆଦିଲ୍ଳୀ,୮।୯- ସ୍ତ୍ରୀ ହସିନ ଜାହାଁ ଘରୋଇ ହିଂସା ନେଇ ଦାଏର କରିଥିବା କେସ୍ର ସମ୍ମୁଖୀନ ହେବା ପାଇଁ ଭାରତୀୟ ତାରକା ଦ୍ରୁତ ବୋଲର ମହମ୍ମଦ ସାମି ଆଇନଗତ ପ୍ରସ୍ତୁତି ଆରମ୍ଭ କରିଛନ୍ତି। ଆମେରିକୀୟ ଆଇନଜୀବୀ ସଲିମ ରହମାନଙ୍କ ସହ ସେ କ୍ରମାଗତ ଭାବେ ପରାମର୍ଶ କରୁଛନ୍ତି। ସେ ମଧ୍ୟ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସହିତ ସମ୍ପର୍କରେ ରହିଛନ୍ତି। ସାମି ୧୨ ତାରିଖ ଦିନ ସ୍ବଦେଶ ପ୍ରତ୍ୟାବର୍ତ୍ତନ କରିବେ ବୋଲି ବିସିସିଆଇର ଜଣେ ଅଧିକାରୀ କହିଛନ୍ତି। ଟିମ୍ ଇଣ୍ଡିଆର ଓ୍ବେଷ୍ଟଇଣ୍ଡିଜ ଗସ୍ତ ପରେ ସାମି ଆମେରିକା ଯାଇଛନ୍ତି ଓ ସଲିମଙ୍କ ପରାମର୍ଶ ନେଉଛନ୍ତି। ହସିନଙ୍କ ଅଭିଯୋଗକୁ ଭିତ୍ତି କରି ସାମିଙ୍କ ବିରୋଧରେ ଆରେଷ୍ଟ ଓ୍ବାରେଣ୍ଟ ଜାରି କରାଯାଇଛି। ଫଳରେ ସାମି ଗିରଫ୍ ହେବାର ସମ୍ଭାବନା ସୃଷ୍ଟି ହୋଇଛି। ତେବେ ଚାର୍ଜସିଟ୍ ନ ଦେଖିଲା ପର୍ଯ୍ୟନ୍ତ ସାମିଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ବୋଲି ବୋର୍ଡ ତରଫରୁ ସ୍ପଷ୍ଟ କରାଯାଇଛି।