ପାଲଲହଡ଼ା, ୧୨ା୩(ଡି.ଏନ.ଏ.): ୬ ଦଫା ଦାବି ନେଇ ଅନୁଗୋଳ ଜିଲା ପାଲଲହଡ଼ା ଉପଖଣ୍ଡର କେନ୍ଦୁପତ୍ର ତୋଳାଳିମାନେ ବୁଧବାର ୪୯ନଂ. ଜାତୀୟ ରାଜପଥର ଶିବ ମନ୍ଦିର ଛକ ଓ ୧୪୯ ନଂ. ବାଇପାସ୍ ରାସ୍ତା ଅବରୋଧ ବେଳେ ଏକ ଅଭାବନୀୟ ଘଟଣା ଦେଖିବାକୁ ମିଳିଥିଲା। ରୋଗୀ ନେଇ ମେଡିକାଲ ଯାଉଥିବା ଏକ ଆମ୍ବୁଲାନ୍ସ ଓ ଅସୁସ୍ଥ ଶିଶୁକନ୍ୟାକୁ ବାପା ନିଜ ଗାଡ଼ିରେ ଡାକ୍ତରଖାନା ନେଉଥିବା ବେଳେ ସେମାନଙ୍କୁ ଆନ୍ଦୋଳନକାରୀ ଅଟକାଇ ଦେଇଥିଲେ। ବାରମ୍ବାର ଅନୁରୋଧ ସତ୍ତ୍ୱେ ଗାଡ଼ି ଆଗକୁ ନ ଛାଡ଼ିବାରୁ ଶିଶୁକନ୍ୟାକୁ ଧରି ବାପା ଗାଡ଼ିରୁ ବାହାରି ହାତଯୋଡ଼ି ଅନୁରୋଧ କରିଥିଲେ। ଉକ୍ତ ଦୃଶ୍ୟ ଦେଖି ସେଠାରେ ଥିବା ଜନସାଧାରଣ ଏହାର ପ୍ରତିବାଦ କରିବାରୁ ଉତ୍ତେଜନା ପ୍ରକାଶ ପାଇଥିଲା। ଅଧଘଣ୍ଟା ପରେ ପୋଲିସ ସହଯୋଗରେ ଗାଡ଼ି ଦୁଇଟି ଡାକ୍ତରଖାନା ଅଭିମୁଖେ ଯାଇଥିଲା।
ପ୍ରତ୍ୟକ୍ଷଦର୍ଶୀଙ୍କ ସୂଚନା ମୁତାବକ, ୬ ଦଫା ଦାବି ନେଇ କେନ୍ଦୁପତ୍ର ତୋଳାଳିମାନେ ୩ ଘଣ୍ଟା ଧରି ରାସ୍ତା ଅବରୋଧ ସହ ବିକ୍ଷୋଭ ପ୍ରଦର୍ଶନ କରିଥିଲେ। ଏହି ସମୟରେ ରାଉରକେଲା ପଟୁ ଆସୁଥିବା ଏକ ଆମ୍ବୁଲାନ୍ସ ବାଇପାସ ଦେଇ ଯାଉଥିବାବେଳେ ସେଠାରେ ଆନ୍ଦୋଳନକାରୀ ତାହାକୁ ଅଟକାଇଥିଲେ। ସେହିପରି ଶିଶୁକନ୍ୟାକୁ ନେଇ ମେଡିକାଲ ଯାଉଥିବା ତାଙ୍କ ବାପାଙ୍କ ଗାଡ଼ିକୁ ମଧ୍ୟ ଶିବ ମନ୍ଦିର ନିକଟରେ ଅଟକାଯାଇଥିଲା।