କୋଏମ୍ବାଟୁର,୨୬।୮: ତାମିଲନାଡୁରେ ବାବା ସାହେବ ଭୀମରାଓ ଆମ୍ବେଦକରଙ୍କ ମୂର୍ତ୍ତି ଭାଙ୍ଗିବା ପରେ ଉତ୍ତେଜନା ଥମିବାର ନାଁ ନେଉନି। ଏନେଇ ସୋମବାର କୋଏମ୍ବାଟୁରର ବସ୍ଷ୍ଟାଣ୍ଡରେ ଏକ ତାମିଲ ସମ୍ପ୍ରଦାୟ ପକ୍ଷରୁ ପଥରମାଡ଼ କରାଯାଇଛି। ଏହି ଘଟଣାରେ ଦୁଇଟି ବସ୍ର କାଚ ଭାଙ୍ଗିଯାଇଛି। ଗୋଟିଏ ବସ୍ ଉଟି ଯାଉଥିବା ବେଳେ ଅନ୍ୟଟି କୋଣ୍ଡମପାଲୟମ ଯାଉଥିଲା। ତେବେ ଏହି ପଥରମାଡ଼ରେ କେହି ମୃତାହତ ହୋଇ ନ ଥିବା ସୂଚନା ମଳିଛି। ଏଥିସହ ବସ୍ ଉପରକୁ ଫୋପାଡ଼ାଯାଇଥିବା ପଥର ସହ ଏକ ଚିଠି ମଧ୍ୟ ଜବତ କରାଯାଇଛି। ଏହି ଚିଠିରେ ଉକ୍ତ ଘଟଣା ପାଇଁ ଏକ ତାମିଲ ସମ୍ପ୍ରଦାୟ ନିଜକୁ ଦାୟି କରିବା ସହ ଆମ୍ବେଦକରଙ୍କ ମୂର୍ତ୍ତି ଭଙ୍ଗାଯିବା ଘଟଣାକୁ ନିନ୍ଦା କରିଛି। ସୂଚନାଯୋଗ୍ୟ, ରବିବାର ସନ୍ଧ୍ୟାରେ ନାଗପଟ୍ଟିନମ୍ର ବେଦାରଣ୍ୟରେ ଦୁଇ ସମ୍ପ୍ରଦାୟ ମଧ୍ୟରେ ଉତ୍ତେଜନା ଦେଖାଦେଇଥିଲା। ଏହାପରେ ଏକ ସମ୍ପ୍ରଦାୟ ପକ୍ଷରୁ କାର୍ରେ ନିଆଁ ଲଗାଯିବା ସହ ସ୍ଥାନୀୟ ଥାନାରେ ପଥରମାଡ଼ କରାଯାଇଥିଲା। ଏହାକୁ ବିରୋଧ କରି ଅନ୍ୟ ସମ୍ପ୍ରଦାୟର ଲୋକମାନେ ଆମ୍ବେଦକରଙ୍କ ପ୍ରତିମାକୁ କ୍ଷତି ପହଞ୍ଚାଇଥିଲେ। ଏହାକୁ ନେଇ ସହରରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି। ଉକ୍ତ ସହର ଓ ଆଖପାଖ ଅଞ୍ଚଳରେ ବ୍ୟାପକ ଅଞ୍ଚଳରେ ପୋଲିସ ଫୋର୍ସ ମୁତୟନ କରାଯାଇଛି।
