ପଦ୍ମପୁର, ୯।୬ (ଡି.ଏନ.ଏ): ଫଲ ଭିତରେ ରଜା ହେଉଛେ ଆମ୍। ସାରା ବିଶ୍ୱରେ ଅମ୍ର ଚାହିଦା କାହିଁରେ କେତେ। ଆଘ ଗଁ।ଗଁଲିମାନକେ ଅନେକ କିସମର ଆମ୍ ଦେଖ୍ବାକେ ମିଲୁଥିଲା। ଲୋକ୍ ଆମ୍ ବୁରେଇ ତିଆର କରୁଥିଲେ। ରୁତୁ ସମିଆରେ ଆମ୍ ବୁରେଇରେ ଡେରା ପକେଇ ଜୁଗୁଥିଲେ। ଆମ୍ ବତର ହେଲେ ସେଟାକେ ବଜାରରେ ବିକି ଭଲ ଦୁଇପଏସା କମଉଥିଲେ। ଯେନ୍ଥିରେ ତାକର ପରିବାରର ବନେ ମାସ୍କେତେର ତେଲନୁନ୍ ବାହାରି ପଡ଼ୁଥିଲା। ହେଲେ ଆଏଜ୍କାଲି ହାତ୍ ଗନ୍ତି କେତେ ଗଁ।ଗଁଡ଼ାକେ ଛାଡ଼ିଦେଲେ ଆର ଆମ୍ବୁରେଇ ଦେଖ୍ବାକେ ନାଇଁମିଲବାର। ଆମ୍ ବଗିଚା କରବାରଟା ଆଏଜ୍କାଲି ବଡ଼ବଡ଼ିଆ ଲୋକ୍, ଚାଷୀକର ଗୁଟେ ସଉକରେ ପରିନତ୍ ହେଇଛେ। ବଗିଚାରେ ଭିନେ ଭିନେ କିସମର ଉନ୍ନତ ଧରନ୍ର ଆମ୍ ଗଛ ଲଗେଇ ଭଲ ଦୁଇ ପଏସା କମଉଛନ୍। ଆମର ରାଏଜେ, ଦେଶ୍ରେ ଆମ୍ର ବହୁତ୍ ଚାହିଦା ରହିଥିଲାବେଲେ ଭଲ କିସମର ଆମ୍ ବିଦେଶକେ ରପ୍ତାନୀ ହେଉଛେ। ସରକାର ଚାଷୀକୁ ଆମ୍ ବଗିଚା କରବାକେ ଅନେକ ପରକାର ସୁବିଧା ବି ଯୁଗେଇ ଦେଉଛନ୍। ଚାଷୀ ଇଥ୍ରେ ଭଲ ଦୁଇପଏସା କମାବାର ସଂଗେ ତାର ଆରଥିକ୍ ଥିତି ମଜବୁତ ହେଉଛେ। ଏନ୍ତା ଝନେ ସଫଲ ଆମ୍ ଚାଷୀକୁ ଦେଖ୍ବାକେ ମିଲିଛେ ବରଗଡ଼ ଜିଲା ପଦ୍ମପୁର ବ୍ଲକର ସତୀଭଟା ଗଁାରେ।
ସୂଚନା ହିସାବେ ସତୀଭଟା ଗଁ।ର ସୁବାଷ ପଟେଲ ଅଂଚଲରେ ଝନେ ସଫଲ ଆମ୍ ଚାଷୀ ବଲି ନଁା କମେଇଛନ୍। ସେ ବିଦ୍ୟୁତ୍ ବିଭାଗରୁ ଲାଇନ୍ମ୍ୟାନ ଚାକିରିରୁ ଅବସର ନେଲା ଉତାରୁ ନିଜର ପଡ଼ିଆ ପଡ଼ିଥିବାର ୩ ଏକର ଜମିରେ ଗୁଟେ ଆମ୍ ବଗିଚା କରବାର ସଂଗେ ଉନିଆ ଗଛ୍ଖୁଟ ବି ଲଗେଇଛନ୍। ଏହେଦେ ସେ ପଡ଼ିଆ ଜମିରେ ସୁବାଷ ସୁନା ଫଲଉଛନ୍ କହିଲେ କିଛି କମ୍ ନାଇଁ ହୁଏ। ୨୦୦୩ ମସିହାରେ ସେ ପହେଲା ମୋଟ ୪୦ଟା ଆମ୍ ଗଛ ଲଗେଇଥିଲେ। ସେଠାନେ ପାଏନ୍ର ସୁବିଧା ନାଇଁଥିବାର ଲାଗି ନିଜର ମୋପେଡ ଗାଡ଼ିରେ ପାସର ବଁଧୁ ପାଏନ୍ ଆନି ଗଛ୍ ବଁଚେଇଥିଲେ। ପଛେ ଚାକିରିରୁ ଅବସର ନେଲା ଉତାରୁ ଜମିରେ ୨ଟା ଗଭୀର ନଲ୍ଚୁଅଁ। କୁଡ଼ି ଜମିରେ ବହୁତ୍ଟେ ଆମ୍ଗଛ ଲଗେଇଛନ୍। ସେ ତାକର ବଗିଚାରେ ମଲିକା, ଦସରୀ, ବାଇଗଣପଲେଇ, ଆମ୍ରପର୍ଲି ଲେଖେଁ ଉନ୍ନତ କିସମର ଆମ୍ ଗଛ ଲଗେଇଛନ୍। ଇ ବଗିଚା କରବାର ଲାଗି ପାସର ଉଦ୍ୟାନ ବିଭାଗର ତେଜରାଜ ପଟେଲ ତାହାକୁ ଉସ୍କେଇଥିଲେ ବଲି କହିଛନ୍ ସୁବାଷ। ଇ ଆମ୍ ଚାଷ୍ରୁ ବଛରକ ସେ ପାଖାପାଖି ୮୦ ହଜାର ଟଁକା ଲାଭ କରବାର ଆଶ୍ ରଖିଛନ୍। ଇତାର ବାହାରେ ଜଂଗଲରୁ ଲୋପ ପାଇଯାଉଥିବାର ଗଛ୍ ଯେନ୍ତା କି ଅଁଏଲା, ବାହାଡ଼ା ଲେଖେଁ ଗଛ୍ ଲଗେଇଛନ୍। ହେଲେ ଇ ସଫଲ ଆମ୍ ଚାଷୀ ଗୁଟେ ପେକ ହାଉସ ଦେବାର ଲାଗି ଉଦ୍ୟାନ ବିଭାଗରେ ବାରବାର ଗୁହାରି କରି ନିରାଶ ହେଇଥିବାର କହିଛନ୍। ଇତାର ସଂଗେ ଆମ୍ ବିକ୍ରି ଲାଗି ସରକାର ବେବସ୍ତା କରୁନ ବଲି ବି ସେ କହିଛନ୍।