ଆମ ଗଁା ଆମ ବିକାଶ ଯୋଜନାରେ ଚଞ୍ଚକତା: କ୍ଷେତ୍ରୀୟ ତଦନ୍ତ କଲେ ଅମ୍ବୁଡସ୍ମ୍ୟାନ
07 ଭଦ୍ରକ ଅଫିସ, ୧।୯- ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ନୂଆଗଁା ପଞ୍ଚାୟତ ଜନ୍ତୁଆଳି ଗ୍ରାମରେ ‘ଆମ ଗଁା ଆମ ବିକାଶ’ ଯୋଜନାରେ ୪ ଲକ୍ଷ ଟଙ୍କାର ଦୁର୍ନୀତି ଓ ଚଞ୍ଚକତା ନେଇ ଅଭିଯୋଗ ହୋଇଥିଲା। ଜିଲା ଅମ୍ବୁଡସ୍ମ୍ୟାନ ଲଳିତା ମିଶ୍ର ଏହି ଗଁାକୁ ଆସି କ୍ଷେତ୍ରୀୟ ତଦନ୍ତ କରି ଫେରିଛନ୍ତି। ତଦନ୍ତ ପରେ ଜିଲାପାଳ ଓ କମିଶନରଙ୍କୁ ଲିଖିତ ଭାବେ ଜଣାଇ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ସେ ଗ୍ରାମବାସୀଙ୍କୁ ପ୍ରତିଶ୍ରୁତି ଦେଇଥିଲେ। ଅମ୍ବୁଡସମ୍ୟାନଙ୍କ ତଦନ୍ତ ବେଳେ ଜନ୍ତୁଆଳି ଗ୍ରାମର ବହୁ ଲୋକ ଉପସ୍ଥିତ ରହି ନିଜ ନିଜର ବୟାନ ଦେଇଥିଲେ।
ଉଲ୍ଲେଖନୀୟ ଯେ, ପୋଖରୀସାହି ସ୍ଥିତ ତାରିଣୀ କମ୍ୟୁନିଟି ସେଣ୍ଟର ଓ ମଣ୍ଡପ ଗୃହ ନିର୍ମାଣ ପାଇଁ ୨୦୧୮-୧୯ ଆର୍ଥିକ ବର୍ଷରେ ୪୦ ଲକ୍ଷ ଟଙ୍କା ବ୍ୟୟ ଅଟକଳ ହୋଇଥିଲା। କିନ୍ତୁ ବିଭାଗୀୟ ଅଧିକାରୀମାନେ ଚଞ୍ଚକତା କରି କେତେକ ମୁଷ୍ଟିମେୟ ଲୋକଙ୍କ ପ୍ରରୋଚନାରେ ଜନ୍ତୁଆଳି ନୂଆସାହିସ୍ଥିତ ଏକ ଗ୍ରାମ୍ୟ ଜଙ୍ଗଲ ଜମିରେ ବେଆଇନ ଭାବେ ପକ୍କାଗୃହ ନିର୍ମାଣ କରିଥିଲେ। ଯେଉଁଥିରେ ପ୍ରାୟ ୧ ଲକ୍ଷ ୨୦ ହଜାର ଟଙ୍କା ଖର୍ଚ୍ଚ ହୋଇଥିବା ବେଳେ ୨ ଲକ୍ଷ ୮୦ ହଜାର ଟଙ୍କା ବାଟମାରଣା କରାଯାଇଥିଲା। ଏହି ବେଆଇନ ପକ୍କାଗୃହ ଜନ୍ତୁଆଳି ଗ୍ରାମର ପାରମ୍ପରିକ ଗ୍ରାମ୍ୟ ଜଙ୍ଗଲରେ ତିଆରି କରାଯାଇଥିବା ଅଭିଯୋଗ କରି ଏହାକୁ ଭାଙ୍ଗିବା ପାଇଁ ଗ୍ରାମବାସୀ ଅମ୍ବୁଡସ୍ମ୍ୟାନଙ୍କୁ ଦାବି ଜଣାଇଥିଲେ। ଏହି ୪ ଲକ୍ଷ ଟଙ୍କା ବିଭାଗୀୟ ଅଧିକାରୀମାନଙ୍କ ପାଖରୁ ଆଦାୟ କରାଯାଇ ସରକାରଙ୍କ ରାଜସ୍ବ ପାଣ୍ଠିକୁ ଫେରାଇ ଅଣାଯିବାକୁ ଗ୍ରାମବାସୀ ଦାବି କରିଥିଲେ।