ଭୁବନେଶ୍ୱର,୨୨।୫(ବ୍ୟୁରୋ): ଆସନ୍ତା ଜୁନ୍ ପହିଲାରୁ ଟ୍ରେନ୍ ସେବା ଆରମ୍ଭ ହେବ। ଏଥିପାଇଁ ଗୁରୁବାରଠାରୁ ୨ଶହ ଟ୍ରେନ୍ ପାଇଁ ଟିକେଟ୍ ବୁକିଂ ଆରମ୍ଭ ହୋଇଛି। ପ୍ରଥମ ଦିନରେ ୬୧ଟି ଟ୍ରେନ୍ରେ ୪ ଲକ୍ଷ ୨୩ ହଜାର ୫୫୦ ସିଟ୍ ପାଇଁ ବୁକିଂ ହୋଇଛି। ଆଇଆର୍ସିଟିସି ୱେବ୍ସାଇଟ୍ ଏବଂ ଆପ୍ ଜରିଆରେ ପ୍ରଥମ ୩ ଘଣ୍ଟାରେ ୧.୭୯ ଲକ୍ଷ ଯାତ୍ରୀ ଟିକେଟ୍ କ୍ରୟ କରିଛନ୍ତି। ତେବେ କରୋନା ସଂକ୍ରମଣ ରୋକିବା ଓ ଯାତ୍ରୀଙ୍କ ସୁରକ୍ଷିତ ଯାତ୍ରା ପାଇଁ ରେଳ ମନ୍ତ୍ରଣାଳୟ ପକ୍ଷରୁ ସ୍ବତନ୍ତ୍ର ଗାଇଡ୍ଲାଇନ୍ ଜାରି କରାଯାଇଛି।
ନୂତନ ଗାଇଡ୍ଲାଇନ୍ ଅନୁଯାୟୀ, କେବଳ ସୁନିଶ୍ଚିତ ସଂରକ୍ଷିତ ଟିକେଟ ଥିଲେ ଯାତ୍ରୀଙ୍କୁ ରେଳ ଷ୍ଟେଶନରେ ପ୍ରବେଶ ଲାଗି ଅନୁମତି ମିଳିବ। ପ୍ରବେଶ ଏବଂ ଯାତ୍ରା ସମୟରେ ମୁହଁ ଘୋଡ଼ାଇବା ଓ ମାସ୍କ ପିନ୍ଧିବା ସମସ୍ତ ଯାତ୍ରୀଙ୍କ ପାଇଁ ବାଧ୍ୟତାମୂଳକ। ଥର୍ମାଲ ସ୍କ୍ରିନିଂ ପାଇଁ ଯାତ୍ରୀମାନେ ନିର୍ଦ୍ଧାରିତ ସମୟର ୯୦ ମିନିଟ ପୂର୍ବରୁ ଷ୍ଟେଶନରେ ପହଞ୍ଚତ୍ବେ। ଉଭୟ ଷ୍ଟେଶନ ଏବଂ ଟ୍ରେନରେ ଯାତ୍ରୀମାନେ ସାମାଜିକ ଦୂରତା ଅବଲମ୍ବନ କରିବେ। ଗନ୍ତବ୍ୟସ୍ଥଳରେ ପହଞ୍ଚତ୍ବା ପରେ ସେଠାକାର ରାଜ୍ୟ ଓ କେନ୍ଦ୍ରଶାସିତ ପ୍ରଦେଶ ସରକାରଙ୍କ ଦ୍ବାରା ଅନୁମୋଦିତ ସ୍ବାସ୍ଥ୍ୟ ନିରାପତ୍ତା ନିୟମ ଯାତ୍ରୀଙ୍କୁ ପାଳନ କରିବା ବାଧ୍ୟତାମୂଳକ। ତେବେ ସ୍କ୍ରିନିଂ ସମୟରେ ଯାତ୍ରୀଙ୍କ ଶରୀରରେ ଅଧିକ ତାପମାତ୍ରା ଥିଲେ କିମ୍ବା କୋଭିଡ୍-୧୯ ଲକ୍ଷଣ ଦେଖାଦେଲେ ଯାତ୍ରା ପାଇଁ ଅନୁମତି ମିଳିବ ନାହିଁ। ଯାତ୍ରୀଙ୍କ ଟିକେଟ ବାତିଲ କରାଯିବା ସହ ଅର୍ଥ ଫେରସ୍ତ କରାଯିବ। ଟ୍ରେନ ଭିତରେ ଚଦର, କମ୍ବଳ ଓ ପରଦା ଦିଆଯିବ ନାହିଁ। ଯାତ୍ରୀମାନେ ସାଙ୍ଗରେ ଚଦର ଆଣିବାକୁ କୁହାଯାଇଛି। ଏସି ବଗି ଭିତରେ ତାପମାତ୍ରାକୁ ନିୟନ୍ତ୍ରିତ କରି ରଖାଯିବ। ଭିଡ଼ କମ୍ କରିବା ପାଇଁ ପୃଥକ ପ୍ରବେଶ ଓ ପ୍ରସ୍ଥାନ ଗେଟ୍ ପ୍ରସ୍ତୁତ ଲାଗି ଆଞ୍ଚଳିକ ରେଳ କାର୍ଯ୍ୟାଳୟଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ସମସ୍ତ ଷ୍ଟେଶନରେ ସାମାଜିକ ଦୂରତ୍ୱ ସହ ନିରାପତ୍ତା ଓ ସ୍ବଚ୍ଛତା ନିୟମ ପାଳନ କରାଯିବ।
ନିୟମିତ ଟ୍ରେନ ଢାଞ୍ଚାରେ ଏହି ସ୍ବତନ୍ତ୍ର ଟ୍ରେନ ଚାଲିବ ଏବଂ ଏଥିରେ ଉଭୟ ଏସି ଓ ନନ୍-ଏସି ବର୍ଗ ରହିବ। ସାଧାରଣ ବଗିରେ ବସିବା ପାଇଁ ମଧ୍ୟ ସଂରକ୍ଷିତ ସିଟ୍ ରହିବ। ଟ୍ରେନରେ କୌଣସି ଅସଂରକ୍ଷିତ ବଗି ରହିବ ନାହିଁ। ସାଧାରଣ ବଗି ଭଳି ଟିକେଟ ଦର ମଧ୍ୟ ସାଧାରଣ ରହିବ। ସଂରକ୍ଷିତ, ଦ୍ବିତୀୟ ଶ୍ରେଣୀ ସିଟ୍ ପାଇଁ ଭଡ଼ା ଆଦାୟ କରାଯିବ। କୌଣସି ରେଳ ଷ୍ଟେଶନ କାଉଣ୍ଟର କିମ୍ବା ଏଜେଣ୍ଟଙ୍କ ଜରିଆରେ ଟିକେଟ ବୁକିଂ ହେବ ନାହିଁ। କେବଳ ଆଇଆର୍ସିଟିସି ୱେବ୍ସାଇଟ ଓ ମୋବାଇଲ ଆପ୍ ଜରିଆରେ ଇ-ଟିକେଟ ବୁକିଂ କରାଯିବ। ତେଣୁ ସମସ୍ତ ଯାତ୍ରୀ ଆରୋଗ୍ୟ ସେତୁ ଆପ୍ ଡାଉନଲୋଡ କରିବା ଏବଂ ବ୍ୟବହାର କରିବା ବାଧ୍ୟତାମୂଳକ। ଅଗ୍ରିମ ସଂରକ୍ଷିତ ଟିକେଟ(ଏଆରପି)ର ଅବଧି ସର୍ବାଧିକ ୩୦ ଦିନ ରହିବ। ୱେଟିଂ ଲିଷ୍ଟ ଟିକେଟ ଧାରୀ ଯାତ୍ରୀଙ୍କୁ ଟ୍ରେନରେ ଯାତ୍ରା ନିମନ୍ତେ ଅନୁମତି ମିଳିବ ନାହିଁ। କୌଣସି ତତ୍କାଳ କିମ୍ବା ପ୍ରିମିୟମ ତତ୍କାଳ ଟିକେଟ ସୁବିଧା ମଧ୍ୟ ମିଳିବ ନାହିଁ। ଷ୍ଟେଶନଗୁଡ଼ିକରେ ଥିବା ଫୁଡ୍ ପ୍ଲାଜାଗୁଡ଼ିକ ଖୋଲିବ। ସେଠାରେ ଯାତ୍ରୀଙ୍କୁ କେବଳ ପାର୍ସଲ ଯୋଗାଣ ହେବ। ଆଗୁଆ ମିଲ୍ ବୁକିଂ ଏବଂ ଇ-କ୍ୟାଟରିଂ ପାଇଁ ଥିବା ବିକଳ୍ପକୁ ହଟାଇ ଦିଆଯିବ। ପ୍ୟାଣ୍ଟ୍ରି କାର ସଂଯୁକ୍ତ ଥିବା ସୀମିତ ସଂଖ୍ୟକ ଟ୍ରେନରେ ଏହି ସେବା ମିଳିବ। ତେଣୁ ଯାତ୍ରୀଙ୍କୁ ସାଥୀରେ ଖାଦ୍ୟ ଓ ପାନୀୟ ଜଳ ନେଇ ଆସିବା ଲାଗି କୁହାଯିବ।