ଭୁବନେଶ୍ୱର, ୨୪ା୧୨ (ବ୍ୟୁରୋ) – ସାଂସ୍କୃତିକୀ ପକ୍ଷରୁ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ରରେ ବିଶ୍ୱ ଓଡ଼ିଶୀ ନୃତ୍ୟ ଉତ୍ସବ ଆରମ୍ଭ ହୋଇଛି। ଗୋଟିପୁଅ ନୃତ୍ୟଶିଳ୍ପୀ ସ୍ବର୍ଗତଃ ଗୁରୁ ବୀରବର ସାହୁଙ୍କ ଉଦ୍ଦେଶ୍ୟରେ ଉତ୍ସଗୀକୃତ ଏହି ଉତ୍ସବରେ ନୃତ୍ୟ ପରିବେଷଣ କରିବେ ୧୫ ଦେଶ ଓ ବିଭିନ୍ନ ରାଜ୍ୟର କଳାକାର। ମାଲେସିଆର ଇନ୍ଦ୍ରାଣୀ ଡ୍ୟାନ୍ସ ଏକାଡେମୀ ନିର୍ଦ୍ଦେଶିକା ଡ. ଇନ୍ଦ୍ରାଣୀଙ୍କ ନିର୍ଦ୍ଦେଶନାରେ ଦଳଗତ ନୃତ୍ୟ ପରିବେଷଣରୁ ଆରମ୍ଭ ହୋଇଥିଲା ଉଦ୍ଘାଟନୀ ସନ୍ଧ୍ୟା। ଜୟାତି ବସୁଙ୍କ ଦ୍ୱାରା ‘ଦୁର୍ଗାସ୍ତୁତି’, ଆମେରିକାରୁ ଆସିଥିବା ନୃତ୍ୟଶିଳ୍ପୀ କୌଉସ୍ତଭୀ ସରକାରଙ୍କ ଦ୍ୱାରା ଅଷ୍ଟପଦୀରେ ‘ସଖୀ ହେ’ ଓ ଶେଷରେ ତ୍ରିଧାରା ନୃତ୍ୟାନୁଷ୍ଠାନ ପକ୍ଷରୁ ଗୁରୁ ଗଜେନ୍ଦ୍ର ପଣ୍ଡାଙ୍କ ନିର୍ଦ୍ଦେଶନାରେ ଦଳଗତଭାବେ ମଙ୍ଗଳାଚରଣରେ ‘ଲକ୍ଷ୍ମୀ-ନୃସିଂହ ଧ୍ୟାନ’ ଓ ରାମ ଭଜନ ଓଡ଼ିଶୀ ନୃତ୍ୟ ପରିବେଷିତ ହୋଇଥିଲା। ଆମେରିକାର ଅଶିଂକା ରଥଙ୍କ ଦ୍ୱାରା ପ୍ରସ୍ତୁତ ‘ମଧୁରାଷ୍ଟକମ୍’ ଦର୍ଶକଙ୍କୁ ବିମୋହିତ କରିଥିଲା।
ପଣ୍ଡିତ ନିତ୍ୟାନନ୍ଦ ମିଶ୍ର, ଡ. ସଙ୍ଗୀତା ଗୋସାଇଁ, ଡ. ରୀନା ରାଉତରାୟ, ପଦ୍ମଶ୍ରୀ ଅରୁଣା ମହାନ୍ତି, ଏସ୍.କେ. ତାମୋଟିଆ, ଗୁରୁ ରତିକାନ୍ତ ମହାପାତ୍ର, ଗୁରୁ ଗଜେନ୍ଦ୍ର ପଣ୍ଡା, ଗୁରୁ କସ୍ତୁରୀ ପଟ୍ଟନାୟକ, ଗୁରୁ ରାମହରି ଦାଶ, କେଦାର ମିଶ୍ର ପ୍ରମୁଖ ଅତିଥିଭାବେ ଯୋଗ ଦେଇଥିଲେ। ଶ୍ୟାମହରି ଚକ୍ର କାର୍ଯ୍ୟକ୍ରମ ପରିଚାଳନା କରିଥିଲେ। କୁନି କୁନି ନୃତ୍ୟଶିଳ୍ପୀ ନୃତ୍ୟ ପରିବେଷଣ କରିଥିଲେ। ପ୍ରଥମ ପର୍ଯ୍ୟାୟରେ ‘ବର୍ତ୍ତମାନର ଓଡ଼ିଶୀ: ବିବିଧତା ଓ ସମ୍ଭାବନା’ ସମ୍ପର୍କିତ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଦ୍ୱିତୀୟ ପର୍ଯ୍ୟାୟରେ ବହୁ ନୃତ୍ୟଶିଳ୍ପୀ ନିଜର ନୃତ୍ୟକଳା ପ୍ରଦର୍ଶନ କରିଥିଲେ। ଏହି ଅବସରରେ ସମସ୍ତ ନୃତ୍ୟଶିଳ୍ପୀଙ୍କୁ ସମ୍ବର୍ଦ୍ଧିତ କରାଯାଇଥିଲା।
