ହାଇଦ୍ରାବାଦ,୧।୫: ଲକ୍ଡାଉନ ଯୋଗୁ ଦେଶର ବିଭିନ୍ନ ସ୍ଥାନରେ ଫସି ରହିଥିବା ଲକ୍ଷ ଲକ୍ଷ ଶ୍ରମିକଙ୍କୁ ନିଜ ଘରକୁ ଫେରାଇ ଆଣିବା କାର୍ଯ୍ୟ ଆରମ୍ଭ ହୋଇଛି। ସ୍ବରାଷ୍ଟ୍ର ମନ୍ତ୍ରଣାଳୟର ଅନୁମୋଦନ ପରେ ବିଭିନ୍ନ ରାଜ୍ୟ ସରକାର ନିଜ ରାଜ୍ୟର ଶ୍ରମିକମାନଙ୍କୁ ଫେରାଇ ଆଣିବାକୁ ଉଦ୍ୟମ ଚଳାଇଛନ୍ତି। ଇତିମଧ୍ୟରେ ଶ୍ରମିକଙ୍କୁ ଆଣିବା ପାଇଁ ତେଲେଙ୍ଗାନା ସରକାରଙ୍କ ଅନୁରୋଧକ୍ରମେ ଲିଙ୍ଗମ୍ପାଲିରୁ ଏକ ସ୍ବତନ୍ତ୍ର ଟ୍ରେନ୍ ଝାଡ଼ଖଣ୍ଡ ଅଭିମୁଖେ ବାହାରିଛି। ଶୁକ୍ରବାର ସକାଳ ୫ଟାରେ ଲିଙ୍ଗମ୍ପାଲିରୁ ଏହି ଟ୍ରେନ୍ ବାହାରିଥିବା ବେଳେ ରାତି ୧୧ଟା ସୁଦ୍ଧା ଝାଡଖଣ୍ଡର ହଟିଆ ଷ୍ଟେସନରେ ପହଞ୍ଚିବ ବୋଲି ରେଳ ବିଭାଗ ପକ୍ଷରୁ ସୂଚନା ମିଳିଛି। ଏହି ଟ୍ରେନ୍ରେ ୨୪ଟି କୋଚ୍ ଥିବା ବେଳେ ଏଥିରେ ପ୍ରାୟ ୧୨ଶହ ପ୍ରବାସୀ ଶ୍ରମିକ ଯାତ୍ରା କରିଛନ୍ତି। ପ୍ରତି କୋଚ୍ରେ ମାତ୍ର ୫୬ଜଣ ଯାତ୍ରୀ ରହିଛନ୍ତି। ତେବେ ସବୁ ଯାତ୍ରୀଙ୍କୁ ଯାତ୍ରା ପୂର୍ବରୁ ସ୍କ୍ରିନିଂ କରାଯିବା ସହ ଷ୍ଟେସନ ଓ ଟ୍ରେନ୍ରେ ସାମାଜିକ ଦୂରତ୍ୱର ନିୟମକୁ କଡ଼ାକଡ଼ି ପାଳନ କରିବାକୁ ନିର୍ଦ୍ଦେଶ ଦିଆଯାଇଛି।