ଭୁବନେଶ୍ୱର,୧୦ା୮:ହସ୍ତଶିଳ୍ପୀ ଆର୍ଟିଜାନ୍ସ ଏବଂ ଓ୍ବେଭର୍ସ ଓ୍ବେଲଫେୟାର ଆସୋସିଏଶନ ପକ୍ଷ ରୁ ସ୍ଥାନୀୟ ହୋଟେଲ ନ୍ୟୁ ମ୍ୟାରିୟନଠାରେ ସିଲ୍କ ଇଣ୍ଡିଆ ଏକ୍ସପୋ ଆରମ୍ଭ ହୋଇଛି। କାର୍ଯ୍ୟକ୍ରମକୁ ଏକ୍ସପୋର ଆୟୋଜକ ଅଭିନନ୍ଦ ଏବଂ ଓଡ଼ିଆ ଅଭିନେତ୍ରୀ ପୁନମ ମିଶ୍ର ଉଦ୍ଘାଟନ କରିଥିଲେ। ୧୦ ଦିନ ଧରି ଚାଲିବାକୁ ଥିବା ଏହି ଏକ୍ସପୋରେ ଗ୍ରାହକମାନେ ବିଭିନ୍ନ ଡିଜାଇନର ଶାଢି ପାଇପାରିବେ। ଏକ୍ସପୋରେ ୬୫ ଷ୍ଟଲ ସ୍ଥାପନ କରାଯାଇଛି। ଏଠାରେ ଗ୍ରାହକମାନେ ହ୍ୟାଣ୍ଡ ବ୍ଲକ ପ୍ରିଣ୍ଟ ଶାଢି, ସୁଟ ଏବଂ ସିଲ୍କ ବେଡ କଭର, ଡିଜାଇନ ଓ୍ବେର ଏବଂ ବର୍ଡର, କୁର୍ତ୍ତି, ହାତ ତିଆରି ମଟକା ପାଇପାରିବେ। ସେହିଭଳି ଦେଶର ବିଭିନ୍ନ ପ୍ରାନ୍ତରୁ ଶାଢି ତଥା ଅନ୍ୟାନ୍ୟ କଲେକ୍ସନ ଏଠାରେ ଉପଲବ୍ଧ ହେବ। ଏହା ମଧ୍ୟରେ ରହିଛି ଆସାମ ମୁଗା ଫ୍ୟାବ୍ରିକ, ଅପୂର୍ବା ସିଲ୍କ ଶାଢି, ବାଲୁଚୁରି ଶାଢି, ଏମ୍ବ୍ରୋଡରି ଡିଜାଇନ ସିଲ୍କ ଶାଢି, ଭାଗଲପୁରୀ ସୁଟ, ପ୍ରିଣ୍ଟେଡ ସିଲ୍କ ଶାଢି, ରେଶମୀ ପ୍ଲେନ ଏବଂ ବୁଟି ଶାଢି, କର୍ନାଟକ ସିଲ୍କ ଶାଢି ରହିଛି। ଏହା ବାଦ୍ ଚନ୍ଦେରୀ ସିଲ୍କ, କୋଟା ସିଲ୍କ, ମଲବେରୀ ସିଲ୍କ, ଟେମ୍ପଲ ବର୍ଡର, ବନାରସ ଜାମଦାନୀ, ମହୀଶୂର ସିଳ୍କ, କାଞ୍ଜିବରମ୍ ସିଲ୍କ ଭଳି ଅନେକ ଉତ୍ପାଦ ପ୍ରଦର୍ଶନୀରେ ଉପଲବ୍ଧ। ଏଠାରେ ବୁଣାକାରଙ୍କ ନିକଟରେ ଗ୍ରାହକମାନେ ସିଧାସଳଖ ସାମଗ୍ରୀ କ୍ରୟ କରିପାରିବେ ବୋଲି ଆୟୋଜକ ଅଭିନନ୍ଦ କହିଛନ୍ତି। ଗୋଟିଏ ଛାତ ତଳେ ସିଲ୍କ ଶାଢି ଏବଂ ଡିଜାଇନର ପରିଧାନଗୁଡିକର ସମ୍ଭାର ଦେଖି ଅତ୍ୟନ୍ତ ଖୁସୀ ବୋଲି ପୁନମ୍ ମିଶ୍ର କହିଛନ୍ତି।