ନୂଆଦିଲ୍ଲୀ,୧୧ା୭(ପି.ଟି.): ଆନୁଷ୍ଠାନିକ ଘରୋଇ ତଥା ଅନ୍ତର୍ଜାତୀୟ ମଧ୍ୟସ୍ଥତା ପାଇଁ ଏକ ସ୍ବାଧୀନ ତଥା ସ୍ବୟଂଚାଳିତ ସଂସ୍ଥା ଗଠନ ଲାଗି ଅଣାଯାଇଥିବା ବିଲ୍ ଲୋକ ସଭାରେ ବୁଧବାର ଗୃହୀତ ହୋଇଯାଇଛି। ନୂଆଦିଲ୍ଲୀ ଅନ୍ତର୍ଜାତୀୟ ଆର୍ବିଟ୍ରେଶନ୍ ସେଣ୍ଟର (ଏନ୍ଡିଆଇଏସି) ବିଲ୍, ୨୦୧୯ ଆଇନରେ ପରିଣତ ହେଲେ ଗତ ମାର୍ଚ୍ଚରେ ଜାରି ହୋଇଥିବା ଅଧ୍ୟାଦେଶ ସ୍ଥାନରେ କାର୍ଯ୍ୟକାରୀ ହେବ। ବିଲ୍ ସମ୍ପର୍କିତ ବିତର୍କରେ ଭାଗନେଇ ଆଇନ ମନ୍ତ୍ରୀ ରବିଶଙ୍କର ପ୍ରସାଦ କହିଥିଲେ, ବର୍ତ୍ତମାନର ଆର୍ବିଟ୍ରେଶନ ସଂସ୍ଥା ୨୫ ବର୍ଷ ମଧ୍ୟରେ ୫୫ରୁ ୪୫ଟି ମାମଲାର ସମାଧାନ କରିଛି। ୧୦ଟି ମାମଲା ବିଚାରାଧୀନ ରହିଛି। ବିଲ୍କୁ ବିଜୁ ଜନତା ଦଳ (ବିଜେଡି) ସମର୍ଥନ ଦେବା ସହ ଆଇନରେ ସଂଶୋଧନ ଆଣିବା ଲାଗି ଦାବି କରିଥିଲା। ଯଦି ଭାରତୀୟ ଆଇନ ଏବଂ ଆର୍ବିଟ୍ରେଶନ୍ ପ୍ରକ୍ରିୟାରେ ସଂଶୋଧନ ନ ହୁଏ ତେବେ ଦୀର୍ଘଦିନର ବିବାଦ ସେହିଭଳି ଗଡ଼ିଚାଲିଥିବ ବୋଲି ବିଜେଡି ସଂସଦୀୟ ଦଳ ନେତା ପିନାକୀ ମିଶ୍ର କହିଥିଲେ। ଉକ୍ତ ଆଇନରେ କଠୋର ସଂଶୋଧନ ଫଳରେ ଆର୍ବିଟ୍ରେଶନ୍ ସହଜ ହୋଇପାରିବ। ଲୋକ ସଭା ଭଙ୍ଗ ସହ ଏଥିରେ ପାସ୍ ବିଲ୍ଗୁଡିକ ରଦ୍ଦ ହୋଇଯାଉଛି। ଏଭଳି ବ୍ୟବସ୍ଥା ବନ୍ଦ ହେବା ଆବଶ୍ୟକ। କାରଣ ଏହା ଦ୍ୱାରା ଜନସାଧାରଣଙ୍କ ଅର୍ଥର ଅପଚୟ ହେଉଛି ବୋଲି ପିନାକୀ କହିଥିଲେ। ଷୋଡ଼ଶ ଲୋକ ସଭାରେ ଆର୍ବିଟ୍ରେଶନ୍ ବିଲ୍ ସମେତ ୨୮ଟି ବିଲ୍ ପାସ୍ ହୋଇଥିଲେ ହେଁ ତାହା ରାଜ୍ୟ ସଭାରେ ଗୃହୀତ ହୋଇ ନ ପାରି ରଦ୍ଦ ହୋଇଯାଇଛି।