ଭୁବନେଶ୍ୱର,୧୫।୧୦(ବ୍ୟୁରୋ): ସୋମବାର ମଧ୍ୟାହ୍ନ। ସ୍ଥାନ ରବୀନ୍ଦ୍ର ମଣ୍ଡପ ଛକରୁ ୧୨୦ ବାଟାଲିୟନ ରାସ୍ତା। ବିହାରର ଆଶିଷ କୁମାର ଏମ୍ଏଲ୍ଏ କ୍ୱାର୍ଟର୍ସ ସାମ୍ନା ଫୁଟ୍ପାଥରେ ମନସ୍ତାପରେ ବସିଥିଲେ। ତାଙ୍କର ବିଚଳିତ ଅବସ୍ଥା ଦେଖି ଆମ ପ୍ରତିନିଧିଙ୍କ ନଜର ପଡ଼ିଥିଲା। ସୈନ୍ୟବାହିନୀରେ ଭର୍ତ୍ତି ପାଇଁ ବହୁତ ଇଚ୍ଛା ଥିଲା। ଏଥିପାଇଁ ସେ ନିଜକୁ ପ୍ରସ୍ତୁତ କରି ବହୁ ଆଶା ନେଇ ଭୁବନେଶ୍ୱର ଧାଇଁ ଆସିଥିଲେ। ହେଲେ ପ୍ରଥମ ରାଉଣ୍ଡ୍ ଦୌଡ଼ ପରୀକ୍ଷାରେ ଅକୃତକାର୍ଯ୍ୟ ହୋଇଥିଲେ। ହେଲେ ଏଥିପାଇଁ ସେ ଭାଗ୍ୟକୁ ଯେତିକି ଦୋଷ ଦେଉଥିଲେ, ବ୍ୟବସ୍ଥାକୁ ସେତିକି ଦାୟୀ କରୁଥିଲେ। ରେଳ ଷ୍ଟେଶନରେ ପହଞ୍ଚତ୍ ସିଧା ପରୀକ୍ଷାସ୍ଥଳ ବାଟାଲିୟନ ନିକଟକୁ ଯାଇଥିଲେ। ସେଠାରେ ମୁଣ୍ଡ ଗୁଞ୍ଜିବାକୁ କୌଣସି ଶେଡ୍ ନ ଥିଲା। ରାତି ପାହିଲେ ପରୀକ୍ଷା। ଅନ୍ୟମାନେ ଫୁଟ୍ପାଥରେ ଖୁନ୍ଦାଖୁନ୍ଦି ହୋଇ ରହିଥିବା ଦେଖି ଆଶିଷ ମଧ୍ୟ ବାଟାଲିୟନ ମୁଖ୍ୟ ଗେଟ୍ ନିକଟ ଫୁଟ୍ପାଥ୍ରେ ଶୋଇପଡ଼ିଥିଲେ। ହଠାତ୍ ବିଳମ୍ବିତ ରାତିରେ ବର୍ଷା ହେଲା। ମୁଣ୍ଡ ଗୁଞ୍ଜିବାକୁ ଜାଗା ନ ପାଇ ଅନ୍ୟମାନଙ୍କ ଭଳି ସେ ମଧ୍ୟ ଓଦା ହୋଇଗଲେ। ସାର୍ଟିଫିକେଟକୁ ପେଟ ତଳେ ଦେଇ ସେମିତି ରାତି ବିତାଇଲେ। ରାତି ଅନିଦ୍ରା ସହ ବର୍ଷାରେ ଭିଜି ଯାଇଥିବାରୁ ଜ୍ୱର ଆସିଯାଇଥିଲା। ଏପରି ଅସୁସ୍ଥତା ଭିତରେ ଦୌଡ଼ ପରୀକ୍ଷାର ଅଧାରୁ ଫେରିବାକୁ ପଡ଼ିଲା। କେବଳ ଆଶିଷ ନୁହନ୍ତି, ତାଙ୍କ ଭଳି ହଜାର ହଜାର ପରୀକ୍ଷାର୍ଥୀ ଏବେ ଖୋଲା ଆକାଶ ତଳେ ରହି ବର୍ଷା ଓ କାକରରେ ଭିଜି ଦିନ ରାତି କାଟୁଛନ୍ତି। ଏଭଳି ଅବ୍ୟବସ୍ଥା ଭିତରେ ନାନା ହଟହଟା ହୋଇ ଆର୍ମି ପରୀକ୍ଷା ଦେଉଛନ୍ତି। ଅକୃତକାର୍ଯ୍ୟ ହୋଇ ତିକ୍ତ ଅନୁଭୂତି ନେଇ ଫେରୁଛନ୍ତି।
ସୂଚନାଯୋଗ୍ୟ, ୭ ରାଜ୍ୟ ପାଇଁ ସୋମବାରଠାରୁ ଭୁବନେଶ୍ୱରରେ ଆରମ୍ଭ ହୋଇଛି ବିହାର ରେଜିମେଣ୍ଟର ଟେରିଟୋରିଆଲ ଆର୍ମି ନିଯୁକ୍ତି ରାଲି ବା ପରୀକ୍ଷା। ୮ ବର୍ଗର ମୋଟ ୮୩ ପଦବୀ ପାଇଁ ୨୦ ତାରିଖ ପର୍ଯ୍ୟନ୍ତ ପରୀକ୍ଷା ଚାଲିବ। ପ୍ରଥମଦିନର ପରୀକ୍ଷା ପାଇଁ ୮ହଜାରରୁ ଊର୍ଦ୍ଧ୍ୱ ପିଲା ଏଠାକୁ ଆସିଥିବାବେଳେ ଧୀରେ ଧୀରେ ଅନ୍ୟ ରାଜ୍ୟର ପରୀକ୍ଷାର୍ଥୀଙ୍କ ଆଗମନ ଜାରି ରହିଛି। ଏମାନଙ୍କ ରହଣି ପାଇଁ ରାଜ୍ୟ ସରକାର କିମ୍ବା ସେନା ପକ୍ଷରୁ ଆବଶ୍ୟକ ବ୍ୟବସ୍ଥା ନାହିଁ। ସେମାନେ ଭୁବନେଶ୍ୱର ମୁଖ୍ୟ ରେଳ ଷ୍ଟେଶନଠାରୁ ବାଟାଲିୟନ, ରାଜଭବନଠାରୁ ଜୟଦେବ ବିହାର, ସିଆର୍ପି ଛକ ପର୍ଯ୍ୟନ୍ତ ରାସ୍ତା ପାର୍ଶ୍ୱରେ ଆଶ୍ରୟ ନେଇଛନ୍ତି। ନାନା ହଟହଟା ଭିତରେ ସମୟ ବିତାଉଛନ୍ତି। ରାସ୍ତା ପାର୍ଶ୍ୱ ଓ ରେଳ ଷ୍ଟେଶନ ନିକଟବର୍ତ୍ତୀ ଅଞ୍ଚଳରେ ପରିସ୍ରା କରିବା ସହ ଶୌଚ ହେଉଛନ୍ତି। ଫଳରେ ସହରର ରାସ୍ତାଘାଟ ଦୁର୍ଗନ୍ଧରେ ଫାଟି ପଡୁଛି। ଷ୍ଟେଶନ ପରିସରରେ ଏପରିସ୍ଥିତି ସୃଷ୍ଟି ହେବାରୁ ରେଳ କର୍ତ୍ତୃପକ୍ଷ ମଧ୍ୟ ସେମାନଙ୍କୁ ଘଉଡ଼ାଇଥିଲେ। ଫଳରେ ସେମାନଙ୍କ ମଧ୍ୟରୁ ୧ହଜାରରୁ ଊର୍ଦ୍ଧ୍ୱ ପ୍ଲାଟ୍ଫର୍ମ ଟିକେଟ କରି ଭିତରକୁ ପଶି ସ୍ଥାନ କବ୍ଜା କରିଥିଲେ। ପରିସ୍ଥିତି ଏପରି ହୋଇଥିଲା ରେଲ୍ଓ୍ବେ କର୍ତ୍ତୃପକ୍ଷ ନାନା ଆଶଙ୍କା କରି ଅଧିକ ଫୋର୍ସ ମୁତୟନ କରିଥିଲେ। ଆର୍ମି ନିଯୁକ୍ତି ସମୟରେ ରାଜଧାନୀରେ ପରୀକ୍ଷାର୍ଥୀମାନେ ଏଭଳି ଦୟନୀୟ ଅବସ୍ଥାରେ ରହୁଛନ୍ତି। ସହରରେ ଥିବା ବଡ଼ ବଡ଼ ପଡ଼ିଆ ଓ ଖୋଲା ସ୍ଥାନରେ ସେମାନଙ୍କ ପାଇଁ ଶେଡ୍ କିମ୍ବା ଅସ୍ଥାୟୀ ବିଶ୍ରାମ ସ୍ଥଳର ବ୍ୟବସ୍ଥା କରାଯାଉ। ଏଥିସହ ପିଇବା ପାଣି, ଶୌଚାଳୟ ଆଦିର ସୁବିଧା ଯୋଗାଇ ଦିଆଯିବାକୁ ପରୀକ୍ଷାର୍ଥୀମାନେ ଦାବି କରିଛନ୍ତି।
ଏନ୍ଏଚ୍ଆର୍ସିରେ ପିଟିଶନ
ସେନାରେ ଯୋଗଦେବାକୁ ଆସିଥିବା ପରୀକ୍ଷାର୍ଥୀମାନେ ରାଜଧାନୀର ରାସ୍ତା କଡ଼ରେ ପଡ଼ିରହିବା ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଛି। ଏନେଇ ଆଇନଜୀବୀ ବିଶ୍ୱପ୍ରିୟ କାନୁନ୍ଗୋ, ବିଜୟ କୁମାର ପଣ୍ଡା, ସୁବାଶିଷ ପଣ୍ଡା, ଗୋଲକ ବିହାରୀ ନାୟକ ଓ ପ୍ରକାଶଚନ୍ଦ୍ର ଦାଶ ଜାତୀୟ ମାନବିକ ଅଧିକାର କମିଶନ (ଏନ୍ଏଚ୍ଆର୍ସି)ରେ ପିଟିଶନ କରିଛନ୍ତି। ପରୀକ୍ଷାର୍ଥୀଙ୍କ ପାଇଁ ଅସ୍ଥାୟୀ ରାତ୍ର ଆଶ୍ରୟସ୍ଥଳ ତିଆରି କରିବାକୁ ୧୨୦ ବାଟାଲିୟନ ମୁଖ୍ୟ ଓ ରାଜ୍ୟ ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେବା ପାଇଁ ସେମାନେ କମିଶନଙ୍କୁ ନିବେଦନ କରିଛନ୍ତି।