ଭୁବନେଶ୍ୱର, ୨-୯(ବ୍ୟୁରୋ): ପୂର୍ବତଟ ରେଳପଥ ମୁଖ୍ୟାଳୟରେ ମଙ୍ଗଳବାର ରେଳ ସୁରକ୍ଷା ବଳ (ଆର୍ପିଏଫ୍)ର ୩୫ତମ ପ୍ରତିଷ୍ଠା ଦିବସ ପାଳିତ ହୋଇଯାଇଛି। ଆର୍ପିଏଫ୍ ଆଇଜି ରାଜା ରାମଙ୍କ ନେତୃତ୍ୱରେ ଆୟୋଜିତ ପରେଡରେ ପୂର୍ବତଟ ରେଳପଥ ମହାପ୍ରବନ୍ଧକ ବିଦ୍ୟାଭୂଷଣ ମୁଖ୍ୟ ଅତିଥି ଭାବେ ଯୋଗଦେଇ ଅଭିବାଦନ ଗ୍ରହଣ କରିଥିଲେ। ଯାତ୍ରୀଙ୍କ ସୁରକ୍ଷା ପ୍ରତି ଆର୍ପିଏଫ୍ ବିଶେଷ ଧ୍ୟାନ ଦେବା ଜରୁରୀ ବୋଲି ବିଦ୍ୟାଭୂଷଣ ଆହ୍ବାନ ଦେବା ସହ ରେଳ ସମ୍ପତ୍ତି ଓ ଯାତ୍ରୀଙ୍କ ପ୍ରତି ଯବାନଙ୍କ ନିଷ୍ଠାପର କର୍ତ୍ତବ୍ୟକୁ ପ୍ରଶଂସା କରିଥିଲେ। ଭୁବନେଶ୍ୱର ଆର୍ପିଏଫ୍ ପୋଷ୍ଟ ଆଇଆଇସି କାଳୁ ସେଠୀ କମାଣ୍ଡିଙ୍ଗ କରିଥିବାବେଳେ ମହିଳା ବାହିନୀର ନେତୃତ୍ୱ ନେଇଥିଲେ ଏସ୍ଆଇ ବିନୀତା ଶର୍ମା। ଏହି ଅବସରରେ ସନ୍ଧାନୀ କୁକୁରମାନେ କୌଶଳ ପ୍ରଦର୍ଶନ କରିଥିଲେ। ଏଥିସହ ଦୁଃସାହସିକ ମୋଟରସାଇକେଲ କ୍ରୀଡା ପ୍ରଦର୍ଶିତ ହୋଇଥିଲା। କାର୍ଯ୍ୟକ୍ରମରେ ବିଭାଗୀୟ ପ୍ରମୁଖ ତଥା ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। କର୍ତ୍ତବ୍ୟ ପରାୟଣ, ନିଷ୍ଠାପର ଓ ସାହସିକତା ପାଇଁ ୩୫ଜଣ ଆର୍ପିଏଫ୍ ଯବାନଙ୍କୁ ପୁରସ୍କୃତ କରାଯାଇଥିଲା। ସନ୍ଧ୍ୟାରେ ରଙ୍ଗାରଙ୍ଗ କାର୍ଯ୍ୟକ୍ରମ ସହ ବଡାଖାନା ଆୟୋଜିତ ହୋଇଥିଲା।