ଛତ୍ରପୁର,୨୭।୬(ଡି.ଏନ.ଏ)-ଗଞ୍ଜାମ ଜିଲା ବ୍ୟାଙ୍କ ପରାମର୍ଶଦାତା କମିଟି ବୈଠକ ବୁଧବାର ଛତ୍ରପୁରସ୍ଥିତ ଡିଆରଡିଏ ସମ୍ମିଳନୀ ଗୃହରେ ଅନୁଷ୍ଠିତ ହୋଇଥିଲା। ଏଥିରେ ଜିଲାପାଳ ବିଜୟ ଅମୃତା କୁଲାଙ୍ଗେ ଅଧ୍ୟକ୍ଷତା କରିଥିଲେ। ବ୍ୟାଙ୍କଗୁଡିକ କୌଣସି ମେଳା କିମ୍ବା ସଚେତନତା କାର୍ଯ୍ୟକ୍ରମ କରୁ ନ ଥିବାରୁ ବହୁ ଚାଷୀ ଋଣ ପାଇବାରୁ ବଞ୍ଚିତ ହେଉଛନ୍ତି। ସରକାରଙ୍କ ବିଭିନ୍ନ ଯୋଜନା ଲୋକଙ୍କ ନିକଟରେ ପହଞ୍ଚି ପାରୁ ନାହିଁ। ଏଣୁ ଆଗାମୀ ଦିନରେ ଋଣ ମେଳା କରିବାକୁ କୁହାଯାଇଥିଲା। ବୈଠକରେ ଅଧିକାଂଶ ବ୍ୟାଙ୍କ ଅଧିକାରୀ ଅନୁପସ୍ଥିତ ଥିବାରୁ ଜିଲାପାଳ ବିରକ୍ତି ପ୍ରକାଶ କରିଥିଲେ ା ବ୍ୟାଙ୍କ ଗୁଡିକ ସହଯୋଗ କରୁ ନ ଥିବାରୁ ଜିଲା ପ୍ରଶାସନ ପକ୍ଷରୁ ଆରବିଆଇଙ୍କୁ ଚିଠି ଲେଖାଯିବ ବୋଲି ଜିଲାପାଳ କହିଥିଲେ। ଖରିଫ ଋତୁ ସମୟରେ କେଉଁ ବ୍ୟାଙ୍କ ଚାଷୀମାନଙ୍କୁ କେତେ ଋଣ ପ୍ରଦାନ କରଛନ୍ତି ତାର ହିସାବ ପ୍ରତି ବ୍ୟାଙ୍କ ମ୍ୟାନେଜର ଦେବାକୁ ଜିଲାପାଳ କହିଥିଲେ। ଚଳିତ ଆର୍ଥିକ ବର୍ଷ ୨୦୧୯-୨୦ର ବାର୍ଷିକ ଋଣ ଯୋଜନା ପୁସ୍ତକ ଉନ୍ମୋଚିତ ହୋଇଥିଲା। ଜିଲା ପାଇଁ ୫୯୨୫.୭୪ କୋଟି ଟଙ୍କାର ଋଣ ଲକ୍ଷ ଧାର୍ଯ୍ୟ କରାଯାଇଛି। ଏହି ବାର୍ଷିକ ଋଣ ଯୋଜନାରେ କୃଷିକୁ ଅଧିକ ପ୍ରଧାନ୍ୟ ଦେଇ ୨୮୧୯.୫୫ କୋଟି ଟଙ୍କା ଲକ୍ଷ ଧାର୍ଯ୍ୟ କରାଯାଇଛି। କ୍ଷୁଦ୍ର ଓ ମଧ୍ୟମମ ଶିଳ୍ପ କ୍ଷେତ୍ରରେ ୨୦୩୯.୬୫ କୋଟି ଟଙ୍କାର ଋଣ ଲକ୍ଷ୍ୟ ରହିଛି ା ବୈଠକରେ ଆରବିଆଇ ର ଏଲଡିଓ ନିର୍ମଳ ଚନ୍ଦ୍ର ପଟ୍ଟନାୟକ, ପ୍ରୋବେସନାଲ ଆଇଏଏସ୍ କିର୍ତୀ ଭାସନ ଭି, ଡୁଡା ପିଡି ସବ୍ୟସାଚୀ ହୋତା, ଡିଆରଡିଏ ଏପିଡି ଦେବବ୍ରତ ସାହୁ , ଲିଡ୍ ବ୍ୟାଙ୍କ ମ୍ୟାନେଜର ସୁରେନ୍ଦ୍ର କୁମାର ଚୈାଧୁରୀ, କୃଷି ଉପନିର୍ଦ୍ଦେଶକ ମନୋଜ କୁମାର ବେହେରା, ସମବାୟ ଉପନିବନ୍ଧକ ସୁଶାନ୍ତ ପଣ୍ଡାଙ୍କ ସମେତ ବିଭିନ୍ନ ବିଭାଗ ଓ ବ୍ୟାଙ୍କ ଅଧିକାରୀ ମାନେ ଯୋଗ ଦେଇଥିଲେ ା