ବ୍ରହ୍ମପୁର ଅଫିସ,୧୯ା୭- ବ୍ରହ୍ମପୁର ବିଶ୍ୱବିଦ୍ୟାଳୟ ଅବସରପ୍ରାପ୍ତ କର୍ମଚାରୀଙ୍କ ବିଭିନ୍ନ ଦାବି ପୂରଣ ନେଇ ପ୍ରଶାସନିକ ଭବନ ଆଗରେ ଧାରଣା ଦିଆଯାଇଛି। ୬ ଦଫା ଦାବି ପୂରଣ ନେଇ ସଂଘ ପକ୍ଷରୁ ଦିଆଯାଇଥିବା ଶାନ୍ତିପୂର୍ଣ୍ଣ ଧାରଣା ଗୁରୁବାର ଦ୍ୱିତୀୟ ଦିନରେ ପହଞ୍ଚିଥିଲେ ମଧ୍ୟ ଆଲୋଚନା ପାଇଁ ବିଶ୍ୱବିଦ୍ୟାଳୟର କୌଣସି ପ୍ରଶାସନିକ ଅଧିକାରୀ ଆସି ନ ଥିବା କର୍ମଚାରୀମାନେ ଅଭିଯୋଗ କରିଛନ୍ତି। ଅବସରପ୍ରାପ୍ତ କର୍ମଚାରୀଙ୍କ ପିଛିଲା ଦିନର ବକେୟା ଅର୍ଥ ପ୍ରାପ୍ୟ ରାଜ୍ୟ ଉଚ୍ଚନ୍ୟାୟାଳୟ ନିର୍ଦ୍ଦେଶ ଅନୁଯାୟୀ ପ୍ରଦାନ କରିବା, ପରିବର୍ତ୍ତିତ ଲିଭ ଏନ୍କେସମେଣ୍ଟ, ପରିବର୍ତ୍ତିତ ଗ୍ରାଚୁଇଟି ପରିବର୍ତ୍ତିତ କମ୍ୟୁଟେଶନ ପ୍ରଦାନ କରିବା, ୨୦୧୫ ପରଠାରୁ ପେନସନ ଓ ବକେୟା ପେନସନ ପ୍ରଦାନ ଭଳି ୬ ଦଫା ଦାବି ନେଇ କର୍ମଚାରୀମାନେ ଏହି ଧାରଣା ଦେଇଛନ୍ତି। ଆନ୍ଦୋଳନରେ ସଂଘ ସଭାପତି ଗୋବିନ୍ଦ ଚନ୍ଦ୍ର ସାହୁ, ସମ୍ପାଦକ ରାଧାଶ୍ୟାମ ପଟ୍ଟନାୟକ ପ୍ରଫୁଲ୍ଲ ଦଳାଇ, ରାମକୃଷ୍ଣ ସେନାପତି, ଈଶ୍ୱରୀ ଚନ୍ଦ୍ର ସାହୁ, ଗଣପତି ପ୍ରସାଦ ଚୌଧୁରୀଙ୍କ ସମେତ ୫୦ରୁ ଊର୍ଦ୍ଧ୍ୱ ଅବସରପ୍ରାପ୍ତ କର୍ମଚାରୀ ଧାରଣା ଦେଇଛନ୍ତି।