ଭଣ୍ଡାରିପୋଖରୀ, ୧୭ା୧୨(ଡି.ଏନ୍.ଏ.)- ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ଜଗନ୍ନାଥପ୍ରସାଦ ନୋଡାଲ ଉଚ୍ଚ ବିଦ୍ୟାଳୟରେ ଜଣେ ଶିକ୍ଷକଙ୍କୁ ଡେପୁଟେଶନରେ ଅନ୍ୟ ସ୍କୁଲକୁ ପଠାଯିବା ଏପ୍ରତିବାଦରେ ଛାତ୍ରୀଛାତ୍ର ଓ ଅଭିଭାବକମାନେ ବିଦ୍ୟାଳୟ ଫାଟକରେ ତାଲା ପକାଇ ଆନ୍ଦୋଳନ ଜାରି ରଖିଛନ୍ତି। ମଙ୍ଗଳବାର ଏହି ଆନ୍ଦୋଳନ ଚତୁର୍ଥ ଦିନରେ ପହଞ୍ଚତ୍ଛି। ଛାତ୍ରୀଛାତ୍ର, ଅଭିଭାବକ, ସ୍କୁଲ ପରିଚାଳନା କମିଟି ସଦସ୍ୟମାନେ ଫାଟକ ସମ୍ମୁଖରେ ଧାରଣା ଦେଇ ବସି ରହିଛନ୍ତି। ଶିକ୍ଷା ବିଭାଗ ପକ୍ଷରୁ ମଙ୍ଗଳବାର ଆନ୍ଦୋଳନକାରୀଙ୍କ ସହ ଆଲୋଚନା କରାଯାଇଥିଲେ ବି କୌଣସି ସୁଫଳ ମିଳି ନାହିଁ ।
ଉଲ୍ଲେଖନୀୟ ଯେ, ଛାତ୍ରୀଛାତ୍ର ଓ ଅଭିଭାବକ ସ୍କୁଲ ଗେଟ୍ରେ ତାଲା ପକାଇବା ଖବର ପାଇ ବ୍ଲକ ଶିକ୍ଷାଧିକାରୀ ଦୀପକ କୁମାର ପାଢୀ ଏହାର ତଦନ୍ତ ଲାଗି ନିର୍ଦ୍ଦେଶ ଦେଇଥିଲେ। ତଦନୁଯାୟୀ ମଙ୍ଗଳବାର ଅତିରିକ୍ତ ବ୍ଲକ ଶିକ୍ଷାଧିକାରୀ ପୁରୁଷୋତ୍ତମ ଧଳ, ପରମାନନ୍ଦପୁର କ୍ଲଷ୍ଟର ଶିକ୍ଷା ସଂଯୋଜକ ଉମାକାନ୍ତ ସାହୁ, ସ୍ଥାନୀୟ ଥାନାର କନଷ୍ଟେବଳ ଜଗନ୍ନାଥପ୍ରସାଦ ନୋଡାଲ ଉଚ୍ଚ ବିଦ୍ୟାଳୟରେ ପହଞ୍ଚି ଧାରଣାରତ ଅଭିଭାବକ ଓ ସଦସ୍ୟଙ୍କ ସହ ଆଲୋଚନ କରିଥିଲେ । ଧାରଣାକାରୀମାନେ ଛାତ୍ରୀଛାତ୍ରଙ୍କ ସ୍ବାର୍ଥ ଦୃଷ୍ଟିିରୁ ସମ୍ପୃକ୍ତ ଶିକ୍ଷକଙ୍କ ଡେପୁଟେଶନ ନାକଚ କରି ତାଙ୍କୁ ବିଦ୍ୟାଳୟରେ ରଖାଯାଉ ବୋଲି ଦାବି ଧରିଥିଲେ। ଅଧିକାରୀମାନେ ଆଇନକୁ ହାତକୁ ନିଅ ନାହିଁ କହିଥିଲେ ମଧ୍ୟ ଧାରଣାକାରୀ ଜିଦ୍ରେ ଅଟଳ ରହିବାରୁ ଆଲୋଚନା ଫେଲ୍ ମାରିଥିଲା। ଏହାପରେ ଅଧିକାରୀମାନେ ବିଇଓ ବୁଧବାର ଅଫିସ୍ ଆସିଲେ ଯାହାକିଛି ପଦକ୍ଷେପ ନିଆଯିବ ବୋଲି କହି ପଳାଇ ଯାଇଥିଲେ। ଆନ୍ଦୋଳନକାରୀମାନେ କହିଛନ୍ତି ଯେ, ବିଭାଗୀୟ କର୍ତ୍ତୃପକ୍ଷ ଏହି ସରକାରୀ ବିଦ୍ୟାଳୟ ସମସ୍ୟାର ସମାଧାନ ପାଇଁ ଆବଶ୍ୟକ ପଦକ୍ଷେପ ନ ନେବାରୁ ୪ ଦିନ ହେଲା ତାଲା ପଡ଼ି ରହିବା ଏକ ବିଡ଼ମ୍ବନା। ଏନେଇ ଅଞ୍ଚଳରେ ଅସନ୍ତୋଷ ବଢିବାରେ ଲାଗିଛି।