ଜୟପୁର,୨୫।୩(ଡି.ଏନ୍.ଏ.): ରାଜ୍ୟର ସମସ୍ତ ଜିଲାରେ ଲକ୍ଡାଉନ୍ ନେଇ ସରକାରଙ୍କ ପକ୍ଷରୁ ଘୋଷଣା କରାଯାଇଛି। ଏହାର ସୁଯୋଗ ନେଇ କିଛି ଅସାଧୁ ବ୍ୟବସାୟୀ ଅତ୍ୟାବଶ୍ୟକୀୟ ସାମଗ୍ରୀର ଦର ବୃଦ୍ଧି କରିଛନ୍ତି। ଏଥିନେଇ କୋରାପୁଟ ଜିଲା ଜୟପୁର ସହରରେ ଆଳୁ କିଲୋପିଛା ୧୦ଟଙ୍କା ଏବଂ ପିଆଜ ୧୦ଟଙ୍କା ଅଚାନକ ବୃଦ୍ଧି କରାଯାଇ ବିକ୍ରି କରାଯାଉଥିବା ନେଇ ପ୍ରଶାସନ ନିକଟରେ ଅଭିଯୋଗ ହୋଇଥିଲା। ବୁଧବାର ଜିଲା ପ୍ରଶାସନର ନିର୍ଦ୍ଦେଶକ୍ରମେ ଯୋଗାଣ ବିଭାଗ ପକ୍ଷରୁ ଜୟପୁର ସହରର ବିଭିନ୍ନ ଆଳୁ ଓ ପିଆଜ ଗୋଦାମ ଉପରେ ଚଢ଼ାଉ କରାଯାଇଥିଲା। ପିଆଜ କିଲୋ ପିଛା ୩୦ ଟଙ୍କା ଏବଂ ଆଳୁ କିଲୋ ପିଛା ୨୧ରୁ୨୨ ଟଙ୍କାରେ ବିକ୍ରି କରିବା ନେଇ ନିର୍ଦ୍ଦେଶ ଦିଆଯାଇଛି। ଏହିପରି ସରକାରଙ୍କ ପକ୍ଷରୁ ଅତ୍ୟାବଶ୍ୟକୀୟ ସାମଗ୍ରୀ ଦୋକାନ ଖୋଲାଯିବା ନେଇ ନିର୍ଦ୍ଦେଶ ରହିଛି। କିନ୍ତୁ ଗ୍ରାହକ ଏବଂ ସାଧାରଣଲୋକ ପରିବହନ ସମସ୍ୟା ଆଶଙ୍କା ନେଇ ବହୁମାତ୍ରାରେ ଏହି ସାମଗ୍ରୀ କ୍ରୟ କରୁଛନ୍ତି। ଫଳରେ କିଛି ଅସାଧୁ ବ୍ୟବସାୟୀ ଏହାର ସୁଯୋଗ ନେଇ ଦର ବଢ଼ାଇ ଚାଲିଛନ୍ତି। ଜିଲା ଯୋଗାଣ ଅଧିକାରୀ ତୁଳାରାମ ନାୟକଙ୍କ ନିର୍ଦ୍ଦେଶ ତଥା ଏସିଏସ୍ଓ ରବି ନାରାୟଣ ନନ୍ଦଙ୍କ ନେତୃତ୍ୱରେ ଏକ ଟିମ୍ ଏହି ଚଢ଼ାଉ କରିଥିଲା।