ଲଣ୍ଡନ/ନୂଆଦିଲ୍ଲୀ,୬।୫: ସାରା ପୃଥିବୀରେ ବିଶ୍ୱତାପନ ଯୋଗୁ ଜଳବାୟୁ ପରିବର୍ତ୍ତନ ହେବାରେ ଲାଗିଛି। ଏହାର ପ୍ରଭାବ ଯଦି ଜାରି ରୁହେ, ତେବେ ଆସନ୍ତା ୫୦ ବର୍ଷ ମଧ୍ୟରେ ଭାରତରେ ସାହାରା ମରୁଭୂମି ଭଳି ତାତି ଅନୁଭୂତ ହେବ। ଏହାଦ୍ୱାରା ୧୨୦ କୋଟି ଭାରତୀୟ ପ୍ରଭାବିତ ହେବେ ବୋଲି ବ୍ରିଟେନ୍ର ଏକ୍ସଟେର ବିଶ୍ୱବିଦ୍ୟାଳୟ ପକ୍ଷରୁ ହୋଇଥିବା ଏକ ଗବେଷଣା ରିପୋର୍ଟରେ ପ୍ରକାଶ ପାଇଛି। ବିଶ୍ୱତାପନର ପ୍ରଭାବ ଦ୍ୱାରା ଏଭଳି ସମସ୍ୟା ଦେଖାଯିବ ବୋଲି ରିପୋର୍ଟରେ ଦର୍ଶାଯାଇଛି। ଯାହାକି ଗତ ୬ ହଜାର ବର୍ଷ ମଧ୍ୟରେ ପୃଥିବୀରେ ଦେଖାଯାଇ ନ ଥିଲା ବୋଲି ଏଥିରେ ଦର୍ଶାଯାଇଛି। ଏହାଯୋଗୁ ନାଇଜେରିଆର ୪୮ କୋଟି ୫୦ ଲକ୍ଷ ଲୋକ ପ୍ରଭାବିତ ହେବେ। ସେହିପରି ପାକିସ୍ତାନର ୧୮ କୋଟି ୫୦ ଲକ୍ଷ, ଇଣ୍ଡୋନେସିଆର ୧୪ କୋଟି ୬୦ ଲକ୍ଷ, ଏବଂ ସୁଦାନର ୧୦ କୋଟି ୩୦ ଲକ୍ଷ, ନାଇଜରରେ ୧୦ କୋଟି ଜନସାଧାରଣଙ୍କୁ ପ୍ରବଳ ତାତିର ସମ୍ମୁଖୀନ ହେବାକୁ ପଡ଼ିବ। ସେହିପରି ଫିଲିପାଇନ୍ସ୍ର ୯ କୋଟି ୯୦ ଲକ୍ଷ, ବାଂଲାଦେଶର ୯ କୋଟି ୮୦ ଲକ୍ଷ, ବୁର୍କିନା ଫାସୋର ୬ କୋଟି ୪୦ ଲକ୍ଷ ଏବଂ ଥାଇଲାଣ୍ଡର ୬ କୋଟି ୨୦ ଲକ୍ଷ ଲୋକ ଏହା ଦ୍ୱାରା ପ୍ରଭାବିତ ହେବେ। ଲଣ୍ଡନର ନ୍ୟାଶନାଲ ଏକାଡେମୀ ଅଫ୍ ସାଇନ୍ସେଜ୍ ପକ୍ଷରୁ ପ୍ରକାଶିତ ରିପୋର୍ଟ ଅନୁସାରେ ମନୁଷ୍ୟ ସର୍ବନିମ୍ନ୍ ୬ ଡିଗ୍ରୀରୁ ଆରମ୍ଭ କରି ସର୍ବାଧିକ ୨୮ ଡିଗ୍ରୀ ସେଣ୍ଟିଗ୍ରେଡ୍ ତାପମାତ୍ରା ଅନୁଭୂତ ହେଉଥିବା ଅଞ୍ଚଳରେ ବସବାସ କରିବାକୁ ବିଶେଷ ଭାବେ ପସନ୍ଦ କରିଥାଏ। ବିଶ୍ୱତାପନ ଯୋଗୁ ପୃଥିବୀର ତାପମାତ୍ରାରେ ହାରାହାରି ୩ ଡିଗ୍ରୀ ବୃଦ୍ଧି ପାଇବାର ଆଶଙ୍କା ରହିଛି। ଭାରତରେ ସମ୍ପ୍ରତି ଖରାଦିନେ ହାରାହାରି ତାପମାତ୍ରା ୪୮ ଡିଗ୍ରୀ ରହୁଥିବାବେଳେ ଚଳିତ ଶତାବ୍ଦୀ ଶେଷ ବେଳକୁ ଏହା ବଢ଼ି ୫୫ରୁ ୫୬ ଡିଗ୍ରୀ ହୋଇଯିବ ବୋଲି ଅନୁମାନ କରାଯାଉଛି। ବେଜନିଜେନ୍ ବିଶ୍ୱବିଦ୍ୟାଳୟର ପ୍ରଫେସର ମାର୍ଟେନ୍ ଶେଫରଙ୍କ ଅନୁସାରେ ୨୯ ଡିଗ୍ରୀ ତାପମାତ୍ରାରେ ବସବାସ କରିବା ମନୁଷ୍ୟ ପାଇଁ ସମସ୍ୟା ସୃଷ୍ଟି କରିଥାଏ। ଏପରିସ୍ଥଳେ ହାରାହାରି ୫୦ ଡିଗ୍ରୀରୁ ଅଧିକ ତାପମାତ୍ରାରେ କିଭଳି ରହିହେବ ତାହା ବେଶ୍ ଚିନ୍ତା ଜନକ ବୋଲି ସେ କହିଛନ୍ତି।