ଫୁଲବାଣୀ ଅଫିସ,୧ା୯- ଫୁଲବାଣୀ ଜିଲା ମୁଖ୍ୟ ଚିକିତ୍ସାଳୟରେ ଜଣେ ଆସନ୍ନ ପ୍ରସବାଙ୍କ ଅସ୍ତ୍ରୋପଚାର କକ୍ଷରେ ମୃତ୍ୟୁ ଘଟିଛି । ଏହାକୁ ନେଇ ପରିବାର ଲୋକଙ୍କ ପକ୍ଷରୁ ଚିକିତ୍ସାରେ ଅବହେଳା କରାଯାଇଥିବା ଅଭିଯୋଗ କରାଯାଇଛି। ଘଟଣା ଘଟିବା ପରେ ମୃତକଙ୍କ ପରିବାର ଲୋକ ଏବଂ ସମ୍ପର୍କୀୟଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା। ଘଟଣାରେ କେହି ଦାୟୀ ନୁହଁନ୍ତି, ଆନାସ୍ଥେସିଆ ଦିଆଯିବା ପରେ ତାଙ୍କର ହୃଦ୍ଘାତ ହୋଇଥିବା ମେଡିକାଲ କର୍ତ୍ତୃପକ୍ଷ କହିବା ପରେ ପରିସ୍ଥିତି ଶାନ୍ତ ପଡିଥିଲା। ମହିଳା ହେଲେ ଜି.ଉଦୟଗିରି ବ୍ଲକ ଟିଆଙ୍ଗିଆ ପଞ୍ଚାୟତ ବୁନ୍ଦୁଲିପଡାର ବିଜୟ କୁମାର ନାୟକଙ୍କ ସ୍ତ୍ରୀ ସ୍ବର୍ଣ୍ଣଲତା ସାନସେଟ୍। ମିଳିଥିବା ସୂଚନା ଅନୁଯାୟୀ, ସ୍ବର୍ଣ୍ଣଲତାଙ୍କ ପ୍ରସବ ଯନ୍ତ୍ରଣା ହେବାରୁ ଗତ ୨୭ ତାରିଖରୁ ମେଡିକାଲରେ ଆଡମିଶନ ହୋଇଥିଲେ। ଶୁକ୍ରବାର ଯନ୍ତ୍ରଣା ଅଧିକ ହେବାରୁ ତାଙ୍କର ଅସ୍ତ୍ରୋପଚାର କରାଯିବାକୁ ଡାକ୍ତର କହିଥିଲେ। ସେହି ଅନୁସାରେ ତାଙ୍କୁ ଅସ୍ତ୍ରୋପଚାର କକ୍ଷକୁ ନିଆଯାଇ ଆନାସ୍ଥେସିଆ ଦିଆଯିବା ପରେ ତାଙ୍କ ଶରୀରରେ ଅସ୍ବାଭାବିକ ପରିସ୍ଥିତି ସୃଷ୍ଟି ହୋଇଥିଲା ା କିଛି ସମୟ ମଧ୍ୟରେ ତାଙ୍କ ପ୍ରାଣବାୟୂ ଉଡି ଯାଇଥିଲା ା ଡାକ୍ତର ବହୂଚେଷ୍ଟା କରିଥିଲେ ମଧ୍ୟ ସଫଳତା ମିଳି ନ ଥିଲା ବୋଲି ଏଡିଏମ୍ଓ ମେଡିକାଲ ମନୋରଞ୍ଜନ ରାଉତ କହିଛନ୍ତି॥