ନୂଆଦିଲ୍ଲୀ, ୧୮ା୪ (ପି.ଟି.)-କରୋନା ଭାଇରସ୍ ସଂକ୍ରମଣକୁ ରୋକିବା ଲାଗି ଦେଶରେ ଲକ୍ଡାଉନ୍ ଚାଲିଛି। ଏହି ସମୟରେ ଭାରତର କେତେଜଣ ଟପ୍ ବ୍ୟାଡ୍ମିଣ୍ଟନ ଖେଳାଳି ସେମାନଙ୍କ ନିଯୁକ୍ତିଦାତା ଇଣ୍ଡିଆନ ଅଏଲ୍ କର୍ପୋରେଶନ (ଆଇଓସି) ପକ୍ଷରୁ ହେବାକୁ ଥିବା ଅନ୍ଲାଇନ୍ ଟେଷ୍ଟ ଦେବାକୁ ପ୍ରସ୍ତୁତ ହେଉଛନ୍ତି। ଏଥିଲାଗି ଏହି ବ୍ୟାଡ୍ମିଣ୍ଟନ ଖେଳାଳିମାନଙ୍କୁ କିଛି ପାଠ୍ୟକ୍ରମ ଦିଆଯାଇଛି। ବିଷୟବସ୍ତୁଗୁଡ଼ିକ ମଧ୍ୟରେ ରହିଛି ସାଇବର ସିକ୍ୟୁରିଟି, ପ୍ଲାଷ୍ଟିକ୍ ଓ୍ବେଷ୍ଟ ମ୍ୟାନେଜମେଣ୍ଟ ଓ ପ୍ରଡକ୍ଟ ମ୍ୟାନେଜମେଣ୍ଟ ଇତ୍ୟାଦି। ଗତବର୍ଷ ପାର୍ଟନର ସାତ୍ତ୍ୱିକସାଇରାଜ ରାଙ୍କିରେଡ୍ଡୀ ସହ ଫ୍ରେଞ୍ଚ୍ ଓପନ୍ରେ ରନର୍ସଅପ୍ ଏବଂ ଥାଇଲାଣ୍ଡ ଓପନ ଜିତିଥିବା ହୋଇଥିବା ଭାରତର ଟପ୍ ବ୍ୟାଡ୍ମିଣ୍ଟନ ଖେଳାଳି ଚିରାଗ ଶେଟ୍ଟି କହିଛନ୍ତି ପାଠ୍ୟକ୍ରମ କଷ୍ଟସାଧ୍ୟ ହୋଇଥିଲେ ମଧ୍ୟ ଏଥିରୁ ଆମକୁ ଆନନ୍ଦ ମିଳୁଛି। ପାଠ୍ୟକ୍ରମ ପାଇଁ ଆମକୁ ମେ’ ମାସରେ ଏକ ମେଲ୍୍ ମିଳିଥିଲା। ପାଠ୍ୟକ୍ରମ ଶେଷ କରିବାମାତ୍ରେ ଏକ ଆସେସମେଣ୍ଟ ଟେଷ୍ଟ ଦେବେ। ପରୀକ୍ଷାରେ ତୁମକୁ ଅତିକମ୍ରେ ୮୦ ପ୍ରତିଶତ ସ୍କୋର କରିବାକୁ ପଡ଼ିବ ଯାହକି ସହଜ ନୁହେଁ। ତେଣୁ ଗୋଟିଏ ବିଷୟରେ ଉତ୍ତୀର୍ଣ୍ଣ ହେବାକୁ ହେଲେ ଏକାଧିକ ଥର ପରୀକ୍ଷା ଦେବାକୁ ପଡ଼ିବ। ବିଜ୍ଞାନ ପୃଷ୍ଠଭୂମି ଥିଲେ ଏହା ଅପେକ୍ଷକୃତ ସହଜ ହେବ। ପ୍ରଥମେ ଆମକୁ ଏପ୍ରିଲ ୧୪ ସୁଦ୍ଧା ଶେଷ କରିବାକୁ କୁହାଯାଇଥିଲା। ଲକ୍ଡାଉନ୍ ମିଆଦ ବୃଦ୍ଧି ପାଇବା ଦ୍ୱାରା ଆମକୁ ମେ ୩ ତାରିଖ ପଯ୍ରନ୍ତ ସମୟ ମିଳିଯାଇଛି ବୋଲି ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ା ରୌପ୍ୟ ବିଜେତା କହିଛନ୍ତି। ୨୨ବର୍ଷୀୟ ଚିରାଗ ଆଇଓସିରେ ଜଣେ ଗ୍ରେଡ୍ ଏ’ ଅଫିସର ଭାବେ କାର୍ଯ୍ୟକରୁଛନ୍ତି। ସେ କହିଛନ୍ତି, ଆଇଓସି ପକ୍ଷରୁ ଖେଳାଳିମାନଙ୍କୁ ଏକ ନିର୍ଦ୍ଦିଷ୍ଟ ଓ୍ବେବ୍ସାଇଟ ଲଗ୍ଇନ୍ କରିବାକୁ କୁହାଯାଇଛି। ସେଥିରେ ରହିଥିବା ଶତାଧିକ ବିଷୟରୁ ନିଜର ପସନ୍ଦ ଅନୁସାରେ ବିଷୟ ଚୟନ କରିବାକୁ କୁହାଯାଇଥିଲା। ୨୦୧୮ ରାଜ୍ୟ ଗୋଷ୍ଠୀ କ୍ରୀଡ଼ା ବ୍ରୋଞ୍ଜ ବିଜୟିନୀ ଭାରତୀୟ ମହିଳା ଡବଲ୍ସ ଖେଳାଳି ଏନ୍. ସିକ୍କି ରେଡ୍ଡୀ ଅଶ୍ପିନୀ ପୋନ୍ନାପ୍ପାଙ୍କ ସହିତ ପାଠ୍ୟକ୍ରମ ଶେଷ କରିବା ଲାଗି କିଛି ସମୟ ଦେଉଛନ୍ତି। ଅନ୍ଲାଇନ୍ରେ ପାଠପଢା ଓ ପରୀକ୍ଷା ପ୍ରକୃତରେ ମଜାଦାର ବୋଲି ସିକ୍କି ରେଡ୍ଡୀ କହିଛନ୍ତି।