ସଇଁତଲା, ୫-୨ (ଡି.ଏନ.ଏ.):ମଙ୍ଗଳବାର ବଲାଙ୍ଗୀର ଜିଲା ସଇଁତଲା ବ୍ଲକ ଷାଣ୍ଡପାଲି ଛକରେ ବାଇକରୁ ପଡ଼ି ଜଣେ ମହିଳା ଆହତ ହୋଇଥିଲେ। ତାଙ୍କୁ ଉଦ୍ଧାର କରି ଟିଟିଲାଗଡ଼ ବିଧାୟିକା ତଥା ମହିଳା, ଶିଶୁ ବିକାଶ ଓ ମିଶନ ଶକ୍ତି ମନ୍ତ୍ରୀ ଟୁକୁନୀ ସାହୁ ନିଜ ଗାଡ଼ିରେ ଆଣି ଡ଼ାକ୍ତରଖାନାରେ ଭର୍ତ୍ତି କରି ମାନବିକତାର ପରିଚୟ ଦେଖାଇଛନ୍ତି। ସୂଚନା ଅନୁଯାୟୀ, ଦେଓଗାଁ ବ୍ଲକ ଉଡ଼ାର ପଞ୍ଚାୟତ ଲୁହୁରେନପାଲି ଗ୍ରାମର ସଞ୍ଜୁ ଜାଲ (୨୮) ସ୍ବାମୀ ସୁବାସଙ୍କ ସହ ବାଇକରେ ସମ୍ପର୍କୀୟଙ୍କ ବିବାହ ଉତ୍ସବରେ ଯୋଗଦେବାକୁ ମାୟାମୁଣ୍ଡା ଗ୍ରାମକୁ ଯାଉଥିଲେ। ଷାଣ୍ଡପାଲି ଛକଠାରେ ହଠାତ ସଞ୍ଜୁ ବାଇକରୁ ପଡ଼ିଥିଲେ। ଏହି ସମୟରେ ମନ୍ତ୍ରୀ ସାହୁ ଗୁଡ଼ଭେଲା ବ୍ଲକକୁ ଏକ ଘରୋଇ କାମରେ ଯାଉଥିବା ସମୟରେ ଦୁର୍ଘଟଣାଗ୍ରସ୍ତ ମହିଳାଙ୍କୁ ଉଦ୍ଧାର କରି ନିଜ ଗାଡ଼ିରେ ସଇଁତଲାସ୍ଥିତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ସ୍ବାସ୍ଥ୍ୟକେନ୍ଦ୍ରରେ ଉପସ୍ଥିତ ଥିବା ଡା. ସୌମ୍ୟ ରଞ୍ଜନ ନାୟକ ଆହତଙ୍କ ଚିକିସତ୍ା କରିଥିଲେ। ଯଦି ମହିଳାଙ୍କ ଅବସ୍ଥା ଗୁରୁତର ଥାଏ ତେବେ ତାଙ୍କୁ ବଲାଙ୍ଗୀର ଭୀମଭୋଇ ମେଡ଼ିକାଲକୁ ପଠାଯିବା ସହ ଯାହା ଖର୍ଚ୍ଚ ହେବ ତାହା ସରକାର ବହନ କରିବେ ବୋଲି ମନ୍ତ୍ରୀ ସାହୁ କହିଥିଲେ। ମହିଳାଙ୍କ ସ୍ବାସ୍ଥବସ୍ଥା ଠିକ୍ ଥିବା ଡ଼ା. ନାୟକ କହିଛନ୍ତି ।