କେନ୍ଦୁଝର, ୭।୪(ସ୍ବ.ପ୍ର./ ଡି.ଏନ୍.ଏ.)-କେନ୍ଦୁଝର ସଦର ରେଞ୍ଜ ଅନ୍ତର୍ଗତ ଜଂଘିରା ନିକଟ ତେନ୍ତଳାପଶି ପଞ୍ଚାୟତ ଅଧୀନ ମଶୀନାବିଲା ଗ୍ରାମରୁ ବନ ବିଭାଗ ଏକ କ୍ଷତ ବିକ୍ଷତ ଅଣ୍ଡିରା ହରିଣ ଉଦ୍ଧାର କରିଛି। ହରିଣଟି ସୋମବାର ସକାଳ ୯ଟାରେ ପାଖ ଜଙ୍ଗଲରୁ ଗ୍ରାମକୁ ଚାଲିଆସିଥିବା ବେଳେ ଗ୍ରାମବାସୀ ଧରି ବନ ବିଭାଗକୁ ହସ୍ତାନ୍ତର କରିଥିଲେ। ବନ ବିଭାଗ କର୍ମଚାରୀମାନେ ଏହାର ଚିକିତ୍ସା କରି ମଧ୍ୟାହ୍ନରେ ତେଲକୋଇ ରେଞ୍ଜ ସୀମାନ୍ତ କାଳିଆହୋତା-ରଙ୍ଗମାଟିଆ ଜଙ୍ଗଲରେ ଛାଡି ଦେଇଥିଲେ। ତେବେ କିଛି ବାଟ ଚାଲିବା ପରେ ହରିଣଟି ଟଳି ପଡିଥିଲା। ଲୋକମାନେ ଧରପଗଡ଼ କରିବାରୁ ଅଧିକ ଭୟଭୀତ ହୋଇ ଏଣେ ତେଣେ ଦୌଡିବା କାରଣରୁ ହୃଦଘାତ ଯୋଗୁଁ ମୃତ୍ୟୁବରଣ କରିଥିବା ସନ୍ଦେହ କରାଯାଉଛି। ହରିଣଟିକୁ ବ୍ୟବଚ୍ଛେଦ ପାଇଁ କେନ୍ଦୁଝରକୁ ନିଆଯାଇଛି।