ଜଗତ୍ସିଂହପୁର ଅଫିସ,୩୧ା୧୨
ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସେସୁ ଜଗତ୍ସିଂହପୁର-୨ କନିଷ୍ଠ ଯନ୍ତ୍ରୀ ଦୀପ୍ତି ପ୍ରକାଶ ସ୍ବାଇଁଙ୍କ ଘରେ ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଛି। ଭିଜିଲାନ୍ସର ୫ଟି ଦଳ ସ୍ବାଇଁଙ୍କ ଘର, କାର୍ଯ୍ୟାଳୟ ସମେତ ୫ଟି ସ୍ଥାନରେ ପୃଥକ ଭାବେ ଚଢ଼ାଉ କରି ଅନେକ କିଛି ତଥ୍ୟ ପାଇଛନ୍ତି। ପ୍ରତି ଦଳରେ ୫/୬ ଜଣ ଲେଖାଏଁ କର୍ମଚାରୀ ସୋମବାର ସକାଳୁ ଚଢ଼ାଉରେ ସାମିଲ ଥିଲେ। ବିଶେଷକରି ସ୍ବାଇଁଙ୍କ ସ୍ଥାନୀୟ ଗୋପାଳସାଗରସ୍ଥିତ ନୂଆ ବାସଭବନ, ଗାନ୍ଧୀ ଛକରେ ଥିବା ମାର୍କେଟ୍ କମ୍ପ୍ଲେକ୍ସ, ଜଗତ୍ସିଂହପୁର ବ୍ଲକ ବିସିପାତାଳସ୍ଥିତ ପୈତୃକ ଘର, ଜଗତ୍ସିଂହପୁର ବସ ଷ୍ଟପ୍ ନିକଟ କାର୍ଯ୍ୟାଳୟ ଓ ଶ୍ୱଶୁର ଘରେ ଏହି ଚଢ଼ାଉ ହୋଇଥିଲା।
ଏ ସମ୍ପର୍କରେ ଜଗତ୍ସିଂହପୁର ଭିଜିଲାନ୍ସ କାର୍ଯ୍ୟାଳୟର ଭାରପ୍ରାପ୍ତ ଡିଏସ୍ପି ତଥା ଇନ୍ସପେକ୍ଟର ହେମନ୍ତ କୁମାର ମହାନ୍ତି କହିଛନ୍ତି, ସ୍ବାଇଁଙ୍କ ଗୋପାଳସାଗରସ୍ଥିତ ଘରୁ ନଗଦ ୨୩,୮୦୦ ଟଙ୍କା ମିଳିଛି। ଏଥିସହ ଆସବାବପତ୍ର ୨,୯୦,୦୦୦ ଟଙ୍କା ଓ ୫ଟା ବ୍ୟାଙ୍କରେ ୨,୯୩,୦୦୦ ଟଙ୍କାର ଜମା ସଂକ୍ରାନ୍ତୀୟ କାଗଜପତ୍ର ଜବତ ହୋଇଛି। ଏହି ବିଲ୍ଡିଂର ମୂଲ୍ୟ ୨୯,୯୦,୦୦୦ ଟଙ୍କା ହୋଇଥିବାବେଳେ ସୁନା ୬୭,୦୦୦, ୨ଟି ବାଇକ୍ ମଧ୍ୟରୁ ଗୋଟିଏ ୧,୦୦,୦୦୦ ଓ ଅନ୍ୟଟି ୭୦,୦୦୦ ଟଙ୍କାର ବୋଲି ଜଣାଯାଇଛି। ବସ ଷ୍ଟପ୍ ନିକଟ କାର୍ଯ୍ୟାଳୟରୁ ୫ ଲକ୍ଷ ଟଙ୍କାର ବୀମା କାଗଜପତ୍ର ଜବତ ହୋଇଛି। ପୈତୃକ ଘର ବିସିପିତଳରୁ ନଗଦ ୩ ଲକ୍ଷ ଟଙ୍କା ଜବତ ହୋଇପାରିଛି। ସ୍ବାଇଁଙ୍କ ଗାନ୍ଧୀ ଛକରେ ଥିବା ମାର୍କେଟ କମ୍ପ୍ଲେକ୍ସର ମୂଲ୍ୟ ୫୧ ଲକ୍ଷ ଟଙ୍କା ବୋଲି ଆକଳନ କରାଯାଇଛି। କିନ୍ତୁ ଶ୍ୱଶୁର ଘରୁ କିଛି ମିଳିପାରିନାହିଁ। କଟକରେ ୧୩ ଲକ୍ଷରୁ ଅଧିକ ଟଙ୍କାର ଏକ ଜମି ଅଛି, ଯାହା ସ୍ବାଇଁଙ୍କ ବାପାଙ୍କ ନାଁରେ ଥିବା ଜଣାଯାଇଛି। ୨୦୧୧ ମସିହାରୁ ସ୍ବାଇଁ ଚୁକ୍ତିଭିତ୍ତିରେ କନିଷ୍ଠ ଯନ୍ତ୍ରୀ ନିଯୁକ୍ତି ପାଇଛନ୍ତି। ପ୍ରଥମେ କମ ଦରମା ପାଉଥିଲେ। ଏବେ ପାଖାପାଖି ୧୫,୦୦୦ ଟଙ୍କା ପାଉଥିବା ଜଣାଯାଇଛି। ତେବେ ମାତ୍ର ୮ ବର୍ଷରେ ସେ ଆୟଠାରୁ ଅଧିକ ସମ୍ପତ୍ତି ହାତେଇଥିବା ସଂକ୍ରାନ୍ତରେ ହୋଇଥିବା ଅଭିଯୋଗକୁ ଭିତ୍ତିକରି କଟକ ଭିଜିଲାନ୍ସ ଏସ୍ପିଙ୍କ ନିର୍ଦ୍ଦେଶପ୍ରକାରେ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ଅନ୍ୟମାନଙ୍କ ମଧ୍ୟରେ ବିଭାଗୀୟ ଯାଜପୁର ଡିଏସ୍ପି ବନମାଳୀ ଧଳ, କେନ୍ଦ୍ରାପଡ଼ା ଡିଏସ୍ପି ଏସ୍. ଏନ୍. ରାଉଗୁରୁ ପ୍ରମୁଖ ସାମିଲ ହୋଇଥିଲେ।