ପୁରୁଣା ଭୁବନେଶ୍ୱର, ୨୭ା୨ (ଡି.ଏନ.ଏ.): ନରାଜ ଗାଁର ୨୧ ବର୍ଷର ଯୁବକ କାହ୍ନୁ ବେହେରାଙ୍କୁ ଏବେ ଲୋକେ ପିକ୍କ ମ୍ୟାନ ନାମରେ ଡାକୁଛନ୍ତି। କାହ୍ନୁ ବି ମୟୂରଙ୍କ ପ୍ରେମରେ ପଡ଼ିଛନ୍ତି। କାହ୍ନୁଙ୍କ ଆ’ ଡାକର ସ୍ବର ଶୁଣିବା ମାତ୍ରେ ପାହାଡ଼ ଉପରେ ନାଚି ଉଠି ୧୩୨ ମୟୂର ତାଙ୍କ ପାଖକୁ ଖାଦ୍ୟ ଖାଇବାକୁ ଆସୁଛନ୍ତି। କାହ୍ନୁ ଓ ମୟୂରଙ୍କ ମଧ୍ୟରେ ଏଭଳି ନିଆରା ସମ୍ପର୍କ ଦେଖିବାକୁ ମିଳିଛି ନରାଜ ପାହାଡ଼ରେ। ପକ୍ଷୀମାନଙ୍କ ସୁରକ୍ଷା ଓ ସେମାନଙ୍କ ସଂରକ୍ଷଣ ଚିନ୍ତାରେ କାହ୍ନୁଙ୍କ ସମର୍ପିତ ଭାବ ଦେଖିବା ପରେ ଭୁବନେଶ୍ୱରସ୍ଥିତ ବି.ଆଇ. ପ୍ରଫେସନାଲ୍ସ ତାଙ୍କୁ ଗତ ରବିବାର ଉତ୍ତରୀୟ, ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରିଛି। ପରିବେଶବିତ୍ ତଥା ସାମାଜିକ କର୍ମୀ ସୁଶାନ୍ତ ସାହୁ କହିଛନ୍ତି ଯେ, ପିକ୍କ ଭ୍ୟାଲି କୁହାଯାଉଥିବା ନରାଜ ପାହାଡ଼ ୧୯୯୯ରେ ଏକ ପ୍ରକାର ମୟୂର ଶୂନ୍ୟ ହୋଇଯାଇଥିଲା। କାହ୍ନୁଙ୍କ ଜେଜେବାପା ପାଣୁ ୩ଟି ମୟୂରଙ୍କୁ ଠାବ କରି ସେମାନଙ୍କର ସୁରକ୍ଷା ଓ ଯତ୍ନ ନେଇଥିଲେ। ୨୦୧୭ରେ ପାଣୁଙ୍କ ଦେହାନ୍ତ ହେଲାବେଳକୁ ମୟୂରଙ୍କ ସଂଖ୍ୟା ଶତାଧିକ ହୋଇଥିଲା। ଜେଜେବାପାଙ୍କ ସହ ପାହାଡ଼ ଉପରେ ମୟୂରଙ୍କୁ ଖାଦ୍ୟ ଦେବାର ଆନନ୍ଦ ନେଉଥିଲେ କାହ୍ନୁ। ଜେଜେବାପାଙ୍କ ମୃତ୍ୟୁ ପରେ ମୟୂରଙ୍କ ସୁରକ୍ଷା ଓ ସଂରକ୍ଷଣ ଦାୟିତ୍ୱ କାହ୍ନୁ ନିଜ କାନ୍ଧକୁ ନେଇଛନ୍ତି।
୨୦୧୩ରୁ ଜେଜେବାପାଙ୍କ ସହ ମୟୂରଙ୍କ ଦେଖାରଖା କାମରେ ନିୟୋଜିତ କାହ୍ନୁ କଟକ ରଘୁନାଥ ଜୀଉ ମହାବିଦ୍ୟାଳୟରୁ ବାଣିଜ୍ୟରେ ପାଠ ପଢା ପରେ ବି ମୟୂରଙ୍କ ସୁରକ୍ଷା ଦାୟିତ୍ୱରୁ ଓହରି ଯାଇନାହାନ୍ତି। ବିନା ସରକାରୀ ସହାୟତା ଓ ପ୍ରୋତ୍ସାହନରେ ୭ ବର୍ଷ ହେଲା କାହ୍ନୁଙ୍କ ଏଭଳି ମୟୂରଙ୍କୁ ନିଚ୍ଛକ ଭଲ ପାଇବାର ନିଦର୍ଶନ ଏକ ନୂଆ ଅଧ୍ୟାୟ ସୃଷ୍ଟି କରିଛି। ଏଭଳି କହିଛନ୍ତି, ସାମାଜିକ କର୍ମୀ ପ୍ରିୟବ୍ରତ ପଣ୍ଡା, ତ୍ରିଲୋଚନ ବେଉରା, ଧଉଳି ଚାରୁକଳା ମହାବିଦ୍ୟାଳୟର ଅଧ୍ୟକ୍ଷ ପଞ୍ଚାନନ ସାମଲ, ବି.ଆଇ. ପ୍ରଫେସନାଲ୍ସର ଇଂ. ଧୀରେନ୍ଦ୍ର କର, ଇଂ. ସୁବ୍ରତ କୁମାର ବଳ, ଇଂ. ଭାଗ୍ୟଶ୍ରୀ ମିଶ୍ର, ଇଂ. ସୁଶାନ୍ତ ସାହୁ, ଇଂ. ଶୁଚିସ୍ମିତା ସେନାପତି ପ୍ରମୁଖ।
