ନୂଆଦିଲ୍ଲୀ,୧୩।୯(ପିଟି): ଇଂଲଣ୍ଡରେ ଖେଳାଯିବାକୁ ଥିବା ୫ ମ୍ୟାଚ୍ ବିଶିଷ୍ଟ ସିରିଜ୍ ପାଇଁ ଷ୍ଟାର ଫରଓ୍ବାର୍ଡ ରାଣୀ ରାମ୍ପାଲଙ୍କ ନେତୃତ୍ୱରେ ୧୮ ଜଣିଆ ଭାରତୀୟ ମହିଳା ଦଳ ଘୋଷିତ ହୋଇଯାଇଛି। ଏହି ସିରିଜ୍ ଚଳିତ ମାସ ୨୭ରୁ ଅକ୍ଟୋବର ୪ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ। ଗୋଲକିପର ସବିତା ଉପ-ଅଧିନାୟକ ଭାର ସମ୍ଭାଳିବେ। ଦଳରେ ୪ ଓଡ଼ିଆ ଖେଳାଳି ସ୍ଥାନ ପାଇଛନ୍ତି। ସେମାନେ ହେଲେ ଦୀପ ଗ୍ରେସ ଏକ୍କା, ଲିଲିମା ମିଞ୍ଜ ଓ ନମିତା ଟପ୍ପୋ। ସବିତା ଓ ରଜନୀ ଇତିମାର୍ପୁ ଦଳରେ ସ୍ଥାନ ବଜାୟ ରଖିଛନ୍ତି। ଡିଫେଣ୍ଡରଙ୍କ ମଧ୍ୟରେ ଦୀପ ଗ୍ରେସ୍ ଏକ୍କା, ଗୁରଜିତ କୌର, ରିନା ଖୋଖାର ଓ ସାଲିମା ଟେଟେ ସ୍ଥାନ ପାଇଛନ୍ତି। ଅଭିଜ୍ଞ ନମିତା ଟପ୍ପୋ ଦଳକୁ ଫେରିଛନ୍ତି। ୨୦୧୮ ଏସିଆନ୍ ଗେମ୍ସଠାରୁ ଆହତ ସମସ୍ୟା ଯୋଗୁ ସେ ଦଳରୁ ବାଦ୍ ପଡ଼ିଥିଲେ ବୋଲି ହକି ଇଣ୍ଡିଆ ପକ୍ଷରୁ କୁହାଯାଇଛି। ମିଡ୍ଫିଲ୍ଡ ବିଭାଗରେ ସୁଶୀଲା ଚାନୁ ପୁଖରାମବାମ, ନିକ୍କି ପ୍ରଧାନ, ମୋନିକା, ନେହା ଗୋୟଲ ଓ ଲିଲିମା ମିଞ୍ଜଙ୍କ ଭଳି ଅଭିଜ୍ଞ ଖେଳାଳି ରହିଛନ୍ତି। ଫରଓ୍ବାର୍ଡ ଲାଇନରେ ଅଧିନାୟକ ରାନୀ, ବନ୍ଦନା କାଟାରିୟା, ନବନୀତ କୌର, ଲାଲରେସିଆମି, ନବଜୋତ କୌର ଓ ଅଲିମ୍ପିକ୍ସ ଟେଷ୍ଟ ଇଭେଣ୍ଟରେ ଅନ୍ତର୍ଜାତୀୟ ପ୍ରଦାର୍ପଣ କରିଥିବା ଯୁବା ଶର୍ମିଲା ଦେବୀଙ୍କୁ ସ୍ଥାନ ଦିଆଯାଇଛି। ଗତ ଟୁର୍ନାମେଣ୍ଟ ଭଳି ଚଳିତ ଥର ମଧ୍ୟ ମିଶ୍ରିତ ଖେଳାଳି ଆମ ଦଳରେ ରହିଛନ୍ତି। ଅଲିମ୍ପିକ୍ସ ୨୦୨୦ର ଯୋଗ୍ୟତା ଲକ୍ଷ୍ୟରେ ଥିବା ଦଳ ପାଇଁ ଏହା ଗୁରୁତ୍ୱପୂର୍ଣ୍ଣ ସିରିଜ୍। ଏସିଆନ୍ ଗେମ୍ସ ପରେ ନମିତା ପ୍ରଥମ ଥର ପାଇଁ ଦଳକୁ ଫେରିଛନ୍ତି। ଇଂଲଣ୍ଡ ଗସ୍ତ ପୂର୍ବରୁ ଆମ ନିକଟରେ ଟ୍ରେନିଂ ପାଇଁ ୧୦ ଦିନ ରହିଛି। ମୁଁ ନିଶ୍ଚିତ ଆଗାମୀ ମ୍ୟାଚ୍ଗୁଡ଼ିକ ଏଫ୍ଆଇଏଚ୍ ହକି ଅଲିମ୍ପିକ୍ କ୍ୱାଲିଫାୟର୍ସ ଲାଗି ଭଲ ପ୍ରସ୍ତୁତି ସାବ୍ୟସ୍ତ ହେବ ବୋଲି କୋଚ୍ ଜୋର୍ଡ ମାରିଜନେ କହିଛନ୍ତି।
ଭାରତୀୟ ମହିଳା ହକି ଦଳ:
ଗୋଲକିପର: ସବିତା (ଉପ-ଅଧିନାୟକ) ଓ ରଜନୀ ଇତିମାର୍ପୁ।
ଡିଫେଣ୍ଡର: ଦୀପ୍ ଗ୍ରେସ୍ ଏକ୍କା, ଗୁରଜିତ କୌର, ରିନା ଖୋଖାର ଓ ସାଲିମା ଟେଟେ।
ମିଡ୍ଫିଲ୍ଡର: ସୁଶିଲା ଚାନ୍ନୁ ପୋଖରାମବାମ, ନିକ୍କି ପ୍ରଧାନ, ମୋନିକା, ନେହା ଗୋୟଲ, ଲିଲିମା ମିଞ୍ଜ ଓ ନମିତା ଟପ୍ପୋ।
ଫରଓ୍ବାର୍ଡ: ରାଣୀ (ଅଧିନାୟକ), ବନ୍ଦନା କାଟାରିଆ, ନବନୀତ କୌର, ଲାଲରେସିଆମି, ନବଜୋତ କୌର ଓ ଶର୍ମିଲା ଦେବୀ।