ଲଣ୍ଡନ,୭।୧୦(ଏଏଫ୍ପି): ଇଂଲଣ୍ଡ ଦଳର ମୁଖ୍ୟ କୋଚ୍ ଭାବେ ଖ୍ରିସ ସିଲଭରଉଡ୍ ନିଯୁକ୍ତ ହୋଇଛନ୍ତି। ସେ ଏବେ ଟ୍ରେଭର ବାଇଲିସଙ୍କ ସ୍ଥାନ ନେବେ। ଗତ ମାସରେ ଚୁକ୍ତି ଶେଷ ହେବା ପରେ ବାଇଲିସ ଇସ୍ତଫା ଦେଇଥିଲେ। ୪୪ ବର୍ଷୀୟ ସିଲଭରଉଡ୍ ଗତ ଦୁଇ ବର୍ଷ ହେଲା ଦଳର ବୋଲିଂ କୋଚ୍ ଦାୟିତ୍ୱ ସମ୍ଭାଳିଥିଲେ। ନ୍ୟୁଜିଲାଣ୍ଡ ବିପକ୍ଷରେ ଖେଳାଯିବାକୁ ଥିବା ସିରିଜ୍ରୁ ସିଲଭରଉଡ କୋଚ୍ ଭାର ସମ୍ଭାଳିବେ। ଏହି ଗସ୍ତରେ ୫ ଟି୨୦ ଓ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳାଯିବ। ପୂର୍ବତନ ଭାରତ ଓ ଦକ୍ଷିଣ ଆଫ୍ରିକା କୋଚ୍ ଗ୍ୟାରି କର୍ଷ୍ଟେନ ଏବଂ ସରେ କ୍ରିକେଟ ଡାଇରେକ୍ଟର ଆଲେକ ଷ୍ଟଓ୍ବୋର୍ଟ ମଧ୍ୟ କୋଚ୍ ପଦ ଦୌଡ଼ରେ ଥିଲେ। ୪୪ ବର୍ଷୀୟ ସିଲଭରଉଡ୍ ୧୯୯୬ରୁ ୨୦୦୦ ମଧ୍ୟରେ ୬ ଟେଷ୍ଟ ଓ ୭ ଦିନିକିଆ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ। କୋଚ୍ ଭାବେ ତାଙ୍କ ନେତୃତ୍ୱରେ ଏସ୍ସେକ୍ସ କାଉଣ୍ଟି ଚାମ୍ପିୟନଶିପ ଟାଇଟଲ ହାସଲ କରିଥିଲା। ଉଲ୍ଲେଖଥାଉ କି, ଇଂଲଣ୍ଡ ଆଇସିସି ବିଶ୍ୱକପ୍ ଜିତିବା ପରେ ଅଷ୍ଟ୍ରେଲିଆ ବିପକ୍ଷ ଆଶେସ ଟେଷ୍ଟ ୨-୨ରେ ବରାବର ରହିଥିଲା।