ବେଙ୍ଗାଲୁରୁ: ବେଙ୍ଗାଲୁରୁ ନିକଟ ଏକ ଛୋଟ ଗାଁରେ ଜନ୍ମିତ ଝିଅ ମାଳବିକା କୃଷି ଓ ପରିବେଶ ଲାଗି କାର୍ଯ୍ୟ କରି ପରିବର୍ତ୍ତନ ଆଣିବେ ବୋଲି କେହି ବିଶ୍ୱାସ କରି ନ ଥିଲେ। କିନ୍ତୁ ଏବେ ତାହା ସେ ସମ୍ଭବ କରିପାରିଛନ୍ତି ଓ ଏଥିଲାଗି ତାଙ୍କୁ କୁହାଯାଉଛି ଇକୋ- ଓ୍ବାରିୟର। ପରିବେଶ ଉପଯୋଗୀ ଜୈବିକ କୃଷିର ଏକ ନୂଆ ପଥ ଦେଖାଇ ସେ କୃଷକମାନଙ୍କୁ ସଶକ୍ତକରିବାରେ ଲାଗିଛନ୍ତି। ମାଳବିକା ଶେଲାଙ୍କି ସ୍ବେଚ୍ଛାସେବୀ ସଂଗଠନ ‘ସ୍ବୟମ୍’ ମାଧ୍ୟମରେ ପଡିଆ ଜମିକୁ ସବୁଜ କ୍ଷେତରେ ପରିଣତ କରୁଛନ୍ତି। ଗାଁରେ ରହିବା ସମୟରେ ମାଳବିକା ଧାନ ବୁଣୁଥିଲେ, ପନିପରିବା ଚାଷ କରୁଥିଲେ, ମଇଁଷି ଦୁହଁୁଥିଲେ। ପରେ ସପରିବାର ବେଙ୍ଗାଲୁରୁ ଆସିବା ପରେ ତାଙ୍କ ଜୀବନ ଘାତ ପ୍ରତିଘାତ ମଧ୍ୟରେ ଗତି କରିଥିଲା। ତୃଣମୂଳ ସ୍ତରରେ ମହିଳା ଓ ଶିଶୁମାନେ ସମ୍ମୁଖୀନ ହେଉଥିବା ପରିବେଶ,ସ୍ବାସ୍ଥ୍ୟ, ଜୀବିକା ତଥା ଲିଙ୍ଗଗତ ସମସ୍ୟା ସୁଧାରିବା ଲାଗି ନିଜେ କାର୍ଯ୍ୟ ଆରମ୍ଭ କରିଥିଲେ। ପରେ ‘ମାୟା’ ଏନ୍ଜିଓରେ କାର୍ଯ୍ୟ କରୁଥିବା ସମୟରେ ମାଳବିକାଙ୍କ ଜୀବନର ମୋଡ ବଦଳିଯାଇଥିଲା। ୨୦୧୧ରେ ସେ ‘ସ୍ବୟମ୍’ ନାମକ ଏକ ସ୍ବେଚ୍ଛାସେବୀ ସଂଗଠନ ଗଠନ କରି ପ୍ରାକୃତିକ ଫାର୍ମିଂ ପଦ୍ଧତି ଉପରେ ଗୁରୁତ୍ୱ ଦେଉଛନ୍ତି। ମାତ୍ର ଦୁଇ ବର୍ଷ ମଧ୍ୟରେ ସେ ବେଙ୍ଗାଲୁରୁର ୫ ଏକର ଏକ ପଡିଆ ଜମିରେ ୪୦୦ ପ୍ରକାରର ବିଭିନ୍ନ ଫଳ, କୋଳି ଓ କାଠ ଉପଯୋଗୀ ୫ ହଜାର ଗଛ ରୋପଣ କରି ସବୁଜ ପରିବେଶ ସୃଷ୍ଟି କରିଛନ୍ତି । ଏହା ଥିଲା ତାଙ୍କ ସବୁଜ ସଂଗ୍ରାମର ପ୍ରାରମ୍ଭିକ ସଫଳତା। ମାଳବିକା ଓ ତାଙ୍କ ଟିମ୍ ସଦସ୍ୟମାନେ‘୧୦୦୦ ଟ୍ରି ପ୍ରୋଜେକ୍ଟ’ ଅଭିଯାନରେ ବେଙ୍ଗାଲୁରୁର କୃଷକମାନଙ୍କୁ ସଶକ୍ତ କରିବାରେ ଲାଗିଛନ୍ତି। ମଧ୍ୟମ ତଥା କ୍ଷୁଦ୍ର ଚାଷୀଙ୍କୁ ନେଇ ଗ୍ରୁପ ଗଠନ କରି ସେମାନଙ୍କୁ ସହାୟତା ଯୋଗାଇ ଦେଉଛନ୍ତି। ମାତ୍ର ତିନି ବର୍ଷ ମଧ୍ୟରେ୨୦ଟି କୃଷକ ପରିବାରର ୫୦ ଏକର ଜମିରେ ସ୍ଥାନୀୟ ସଂଶାଧନ ଉପଯୋଗରେ ଜୈବିକ କୃଷି କରି ସେମାନଙ୍କୁ ଲାଭ ଦେଇପାରିଛନ୍ତି। ବେଙ୍ଗାଲୁରୁ ବାହାରେ ଥିବା ୧.୩ ଏକର ବିଶିଷ୍ଟ ଫାର୍ମରେ ସେ ୨୦ ପ୍ରକାର ଶସ୍ୟ ଉପତ୍ାଦନ କରୁଛନ୍ତି। ତାଙ୍କ ସଂଗଠନ ଦ୍ୱାରା ବର୍ଷକୁ ଆୟୋଜିତ ହେଉଥିବା ୪ରୁ ୫ଟି କର୍ମଶାଳାରେ ଯୋଗ ଦେଉଥିତ୍ବା ଚାଷୀମାନଙ୍କ ୭୦ ପ୍ରତିଶତ ଖାଦ୍ୟ ଆବଶ୍ୟକତା ଏହି ଫାର୍ମ ପୂୂରଣ କରିପାରୁଛି। ପ୍ରାକୃତିକ କୃଷି ଦ୍ୱାରା ସୁସ୍ଥ ଜୀବନ ସମ୍ଭବ ବୋଲି କୁହନ୍ତି ମାଳବିକା।