ଭୁବନେଶ୍ୱର,୯ା୧(ବ୍ୟୁରୋ): ରାଜ୍ୟରେ ଇକୋ ଟୁରିଜମ୍ ବା ପରିବେଶ ପର୍ଯ୍ୟଟନର ବିକାଶକୁ ଦୃଷ୍ଟିରେ ରଖି ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ଏବଂ ଜଙ୍ଗଲ ଓ ପରିବେଶ ବିଭାଗ ମିଳିତ ଭାବେ ୨ଟି ସ୍ବତନ୍ତ୍ର ଟୁର୍ ପ୍ୟାକେଜ୍ର ଶୁଭାରମ୍ଭ କରିଛନ୍ତି। ଏଣିକି ଓଟିଡିସି ପକ୍ଷରୁ ପ୍ରତି ଶନିବାର ଏବଂ ରବିବାର ଦୁଇଟି ସ୍ବତନ୍ତ୍ର ପ୍ୟାକେଜ୍ ଟୁର୍ର ବ୍ୟବସ୍ଥା ଯୋଗାଇ ଦିଆଯିବ। ଆସନ୍ତା ୧୧ ତାରିଖରୁ ଉଦ୍ଘାଟିତ ହେବାକୁ ଥିବା ଏହି ପ୍ୟାକେଜ୍ରେ ପର୍ଯ୍ୟଟକ ପ୍ରତି ଶନିବାର ଭିତରକନିକା ଏବଂ ରବିବାର ସାତକୋଶିଆ ପରିଦର୍ଶନରେ ଯାଇପାରିବେ। ଏହି ଦିନିକିଆ ପ୍ୟାକେଜ୍ରେ ୨ଟି ସ୍ବତନ୍ତ୍ର ବସ୍ ଯାତ୍ରୀମାନଙ୍କୁ ଭୁବନେଶ୍ୱର ପାନ୍ଥନିବାସରୁ ନେଇ ବାହାରିବ। ଭିତରକନିକା ପାଇଁ ପାନ୍ଥନିବାସରୁ ସକାଳ ୫ଟା ୩୦ରେ ବସ୍ ବାହାରି ରେଳଷ୍ଟେଶନ, ବାଣୀବିହାର ଛକ ଦେଇ ଭୁବନେଶ୍ୱର ଛାଡ଼ିବ ଏବଂ ରାତି ୯ଟାରେ ପ୍ରତ୍ୟାବର୍ତ୍ତନ କରିବ। ସେହିଭଳି ସାତକୋଶିଆ ପାଇଁ ରବିବାର ଭୁବନେଶ୍ୱର ପାନ୍ଥନିବାସରୁ ସକାଳ ୭ଟାରେ ବସ୍ ବାହାରି ସମାନ ରାସ୍ତାରେ ଖଣ୍ଡଗିରି ଛକ ଦେଇ ସାତକୋଶିଆ ଅଭିମୁଖେ ଯାତ୍ରା କରିବ। ସାତକୋଶିଆ ଭ୍ରମଣ ସହିତ ନୟାଗଡ଼ରେ ଥିବା ଲଡ଼ୁବାବାଙ୍କ ଦର୍ଶନ କରି ସନ୍ଧ୍ୟା ୬ଟାରେ ଭୁବନେଶ୍ୱରରେ ପହଞ୍ଚିବ। ଏହି ପ୍ୟାକେଜ୍ଗୁଡ଼ିକରେ ଶୀତତାପ ନିୟନ୍ତ୍ରିତ ଗାଡ଼ି ସହିତ ମଧ୍ୟାହ୍ନ ଭୋଜନ, ବୋଟିଂ ଆଦି ରହିବ। ଭିତରକନିକା ପାଇଁ ଜଣକ ପିଛା ପ୍ୟାକେଜ୍ର ଦାମ ୧୭୦୦ ଟଙ୍କା ରହିଥିବାବେଳେ ସାତକୋଶିଆ ପାଇଁ ୧୪୯୦ ଟଙ୍କା ରହିଛି। ପ୍ୟାକେଜ୍ ପାଇଁ ପର୍ଯ୍ୟଟକ ପାନ୍ଥନିବାସ ଓ୍ବେବ୍ସାଇଟ୍ www.panthanivas.comରେ ବୁକିଂ କରିପାରିବେ।