ଗୋବିନ୍ଦପାଲ୍ଲୀ, ୧୪ା୮(ଡି.ଏନ.ଏ.): ଇଚ୍ଛାଶକ୍ତି, ଦୃଢ ମନୋବଳ ଆଗରେ ସବୁକିଛି ସମ୍ଭବ । ଏହାକୁ ଜଣେ ଚାଷୀ କ୍ଷେତରେ ପ୍ରମାଣିତ କରି ଦେଖାଇଛନ୍ତି। ତାଙ୍କ ନାଁ ସନ୍ୟା ଗୁଟା। ମାଲକାନଗିରି ଜିଲା ଖଇରପୁଟ ବ୍ଲକ ମାଝିଗୁଡା ଗ୍ରାମରେ ତାଙ୍କ ଘର। ତେବେ ସନ୍ୟା ଜଣେ ଦିବ୍ୟାଙ୍ଗ। ଗୋଟିଏ ଗୋଡ ନାହିଁ ତାଙ୍କର। ତଥାପି ସେ ଭାଙ୍ଗିପଡିନାହାନ୍ତି। ଜମିରେ ଫସଲ ଉପଜାଇ ନିଜ ସଂସାର ଚଳାଉଛନ୍ତି। ଅନ୍ୟମାନଙ୍କ ପାଇଁ ସେ ପାଲଟିଛନ୍ତି ଉଦାହରଣ। ତାଙ୍କୁ ଦେଖିଲେ ହୁଏତ କେହି ବି ବିଶ୍ୱାସ କରିପାରିବେ ନାହିଁ ଯେ, ସେ ଜଣେ ଦିବ୍ୟାଙ୍ଗ । ସକାଳ ହେଲେ କଟା ଗୋଡରେ କୃତ୍ରିମ ଗୋଡ ଲଗାଇ ହଳ ଲଙ୍ଗଳ ଧରି ସେ ବାହାରି ପଡନ୍ତି ଜମିକୁ। ଜମିରେ ଭାଗମାପ ଅନୁସାରେ ସେ କରନ୍ତି ସବୁ କାମ। ଆଗରୁ ଏପରି ଦିବ୍ୟାଙ୍ଗ ନ ଥିଲେ ସନ୍ୟା। ଅନ୍ରମାନଙ୍କ ଭଳି ସେ ଥିଲେ ଜଣେ ସୁସ୍ଥ ସବଳ ମଣିଷ। ଦିନେ ସେ ହାଟ ସାରି ଗାଡିରେ ଘରକୁ ଫେରୁଥିବାବେଳେ ଗାଡି ଓଲଟିପଡିବାରୁ ନିଜ ବାମଗୋଡ ହରାଇଥିଲେ ସେ। କୋରାପୁଟ ଜିଲାର ସହକାରୀ ଜିଲାପାଳ ଆଲୋକ ଅନୁଗୁଳିଆ ଓ ଖଇରପୁଟ ଅଞ୍ଚଳର ସମାଜସେବୀ ଆନନ୍ଦ ଚାର୍କିଙ୍କ ସହଯୋଗରେ କଟକ ଓଲଟପୁରରୁ ଏକ କୃତ୍ରିମଗୋଡ ଆଣି ବ୍ୟବହାର କରୁଛନ୍ତି। ଗଭୀର ଆତ୍ମବିଶ୍ୱାସ ଏବଂ ସ୍ବାବଲମ୍ବୀ ହେବାର ଅଦ୍ୟମ ଇଚ୍ଛା ଯୋଗୁ ସେ ଦିବ୍ୟାଙ୍ଗ ହେଲେ ମଧ୍ୟ କେବେ ଭାଙ୍ଗିପଡିନାହାନ୍ତି।