ନୂଆଦିଲ୍ଲୀ,୭।୧୦: ସ୍କୁଲ ଶେଷ ହେବା ପରେ ମେକାନିକାଲ ଇଞ୍ଜିନିୟରିଂ କରିବା ପାଇଁ କଲେଜରେ ଆଡ୍ମିଶନ ନେଇଥିଲେ। କିନ୍ତୁ କ୍ରିକେଟରେ ତାଙ୍କ ମନ ଖୁବ୍ ଲାଗୁଥିଲା। ଏହା ଜାଣିପାରି ଫଟୋଗ୍ରାଫର ଭାବେ କାର୍ଯ୍ୟ କରୁଥିବା ବାପା କହିଥିଲେ, କ୍ରିକେଟ ଖେଳ। ଦେଶକୁ ବହୁତ ଇଞ୍ଜିନିୟର ମିଳିଯିବେ। ତୁମ କ୍ରିକେଟର ହୁଅ। ବାପାଙ୍କ ଏହି କଥା ଜାହିର ଖାନଙ୍କୁ ଦେଶର ଅନ୍ୟତମ ସଫଳ ଦ୍ରୁତ ବୋଲର ହେବାରେ ସାହାଯ୍ୟ କରିଥିଲା। ୧୯୭୮ ମସିହା ଅକ୍ଟୋବର ମାସ ଆଜିର ଦିନରେ ଜାହିର ମହାରାଷ୍ଟ୍ରର ଅହମଦନଗର ଜିଲାର ଶ୍ରୀରାମପୁର ଗ୍ରାମରେ ଜନ୍ମ ହୋଇଥିଲେ ଜାହିର। ସେ ୧୭ ବର୍ଷ ବୟସରେ ହିଁ ମୁମ୍ବାଇ ଚାଲିଆସିଥିଲେ। ପରେ ୧୯ ବର୍ଷରୁ କମ୍ ଭାରତୀୟ ଦଳରେ ତାଙ୍କର ଚୟନ ହୋଇଥିଲା। ଏହାପରେ ସେ ଗୋଟିଏ ପରେ ଗୋଟିଏ ସଫଳତାର ପାହଚ ଉଠି ୨୦୦୦ରେ କେନିଆ ବିପକ୍ଷରେ ଅନ୍ତର୍ଜାତୀୟ ପଦାର୍ପଣ କରିଥିଲେ। ଜାହିର ମୋଟ ଉପରେ ୯୨ ଟେଷ୍ଟ ଓ ୨୦୦ ଦିନିକିଆ ମ୍ୟାଚ୍ ଖେଳିଥିଲେ। ଏଥିରେ ସେ ଯଥାକ୍ରମେ ୩୧୧ ଓ ୨୮୨ ଉଇକେଟ ନେଇଥିଲେ। ୨୦୧୧ ବିଶ୍ୱକପ୍ ଚାମ୍ପିୟନ ଦଳର ସେ ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ। ସେ ବିଶ୍ୱକପ୍ରେ ସର୍ବାଧିକ ଉଇକେଟ ନେଇଥିଲେ। ଏହି ଚାମ୍ପିୟନ ପେସରଙ୍କୁ ଜନ୍ମଦିନ ଅବସରରେ ପୂର୍ବତନ ଖେଳାଳିମାନେ ଶୁଭେଚ୍ଛା ଜଣାଇଛନ୍ତି।