ବାଲେଶ୍ୱର ଅଫିସ, ୩୧।୧୨-ବାଲେଶ୍ୱର ଜିଲା ଇଟାଭାଟି ଶ୍ରମିକ ଓ ମାଲିକ ସଂଘ ପକ୍ଷରୁ ସୋମବାର ପୂର୍ବାହ୍ନରେ ୫ହଜାରରୁ ଊର୍ଦ୍ଧ୍ୱ ଶ୍ରମିକ ଓ ମାଲିକ ମିଳିତ ଭାବେ ସହର ପରିକ୍ରମା କରି ଜିଲାପାଳଙ୍କ ଅଫିସ୍ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ବିକ୍ଷୋଭ ସଭାରେ ପୂର୍ବତନ ବିଧାୟକ ତଥା ବରିଷ୍ଠ ଶ୍ରମିକନେତା ଅରୁଣ ଦେ ଯୋଗଦେଇ ଜିଲାରେ ୧୪୦ରୁ ଊର୍ଦ୍ଧ୍ୱ ଇଟାଭାଟିରେ ୨୫ହଜାର ମହିଳା ଓ ୨୦ହଜାର ପୁରୁଷ ଶ୍ରମିକ କାର୍ଯ୍ୟ କରୁଥିବାବେଳେ ପ୍ରଶାସନ ଇଟାଭାଟିକୁ ବନ୍ଦ କରିବା ପାଇଁ ଚେଷ୍ଟା କରି ସେମାନଙ୍କ ପେଟକୁ ନାତ ମାରୁଥିବା ଅଭିଯୋଗ କରିଛନ୍ତି। ଏ ଦିଗରେ ଉଚିତ୍ ବିଚାର ନ କଲେ ଆଗାମୀ ଦିନରେ ସମସ୍ତ ଆଇନଶୃଙ୍ଖଳାକୁ ଅମାନ୍ୟ କରିବା ପାଇଁ ବାଧ୍ୟ ହେବେ ବୋଲି ଚେତାବନୀ ଦେଇଥିଲେ। ଆୟୋଜିତ ବିକ୍ଷୋଭ ସଭାରେ ସଂଘର ଉପଦେଷ୍ଟା ରଞ୍ଜନ ପ୍ରଧାନ ସଭାପତିତ୍ୱ କରିଥିବା ବେଳେ ରେମୁଣାର ପୂର୍ବତନ ବିଧାୟକ ସୁଦର୍ଶନ ଯେନା, ବରିଷ୍ଠ ଖବରଦାତା ରଞ୍ଜନ ବାଗ ପ୍ରମୁଖ ଯୋଗଦେଇ ଜିଲାରେ ଇଟାଭାଟି ଏକ କ୍ଷୁଦ୍ରଶିଳ୍ପ ହେଲେ ମଧ୍ୟ ହଜାର ହଜାର ପରିବାରଙ୍କୁ ଭରଣପୋଷଣର ସହାୟ ହେଉଛି। ତେଣୁ ଇଟାଭାଟି ଉଚ୍ଛେଦ ନ କରି ପ୍ରଶାସନ ସେମାନଙ୍କୁ ଆବଶ୍ୟକ ସମୟ ଦେବା ସହ ଉକ୍ତ ଶିଳ୍ପକୁ ବଞ୍ଚାଇ ରଖିବା ପାଇଁ ସହାୟକ ହେବା ଜରୁରୀ ବୋଲି ବକ୍ତବ୍ୟ ରଖିଥିଲେ। ଜିଲାରେ ସଦର, ରେମୁଣା, ନୀଳଗିରି, ଜଳେଶ୍ୱର, ବସ୍ତା ବ୍ଲକର ୧୪୦ରୁ ଊର୍ଦ୍ଧ୍ୱ ଚିମିନି ଇଟାଭାଟି ରହିଛି। ଏଥିରେ ପ୍ରତ୍ୟକ୍ଷ ଭାବେ ୪୦ହଜାର ଲୋକ ନିଯୁକ୍ତି ପାଇଥିବାବେଳେ ପରୋକ୍ଷ ଭାବରେ ୨ଲକ୍ଷରୁ ଊର୍ଦ୍ଧ୍ୱ ଲୋକ ପେଟପାଟଣା ପୋଷୁଛନ୍ତି। ଟ୍ରକ୍, ଟ୍ରାକ୍ଟର, ଡମ୍ପର, ଠିକାଦାରଙ୍କଠାରୁ ଆରମ୍ଭ କରି ଶ୍ରମିକମାନଙ୍କର ଏକମାତ୍ର ରୋଜଗାର ପନ୍ଥା ଇଟାଭାଟି। ଇଟାଭାଟିର ମାଲିକମାନେ ବାର୍ଷିକ ହାରାହାରି ଦେଢ଼ଲକ୍ଷ ଟଙ୍କା ରୟାଲ୍ଟି ଦେଉଥିବା ବେଳେ ଜିଲାରେ ଚାଲୁଥିବା ଆହାର କେନ୍ଦ୍ର ପାଇଁ ୨୦ହଜାର ଏବଂ ରେଡ଼କ୍ରସ୍ ପାଇଁ ୧ହଜାର ଟଙ୍କା ଜିଲାପାଳଙ୍କ ନିର୍ଦ୍ଦେଶରେ ପ୍ରଦାନ କରୁଛନ୍ତି। ୨୦ବର୍ଷରୁ ଅଧିକ ସମୟ ଇଟାଭାଟି କରି ପେଟପାଟଣା ପୋଷି ଆସୁଥିବା ବେଳେ ଏନ୍ଟିଜି (ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ) ବାହାନାରେ ଜିଲାପାଳ ପ୍ରଶାସନ ସହ ମିଶି ଜିଲାରେ ଥିବା ଇଟାଶିଳ୍ପକୁ ଧ୍ୱଂସ କରିବାକୁ ଚେଷ୍ଟା କରୁଛି ବୋଲି ସଂଘର ଉପଦେଷ୍ଟା ପ୍ରଧାନ ଅଭିଯୋଗ କରିଥିଲେ।