ଝାରସୁଗୁଡ଼ା ଅଫିସ,୧୭।୩: ସମଗ୍ର ବିଶ୍ୱରେ କରୋନା ଭୂତାଣୁ ବ୍ୟାପି ଚାଲିଥିବା ବେଳେ ଓଡ଼ିଶାରେ ମଧ୍ୟ ରୋଗୀ ଚିହ୍ନଟ ହୋଇ ସାରିଛି। ତେବେ ଜଣେ ବିଦେଶ ଫେରନ୍ତା ଯୁବତୀଙ୍କୁ ନେଇ ଝାରସୁଗୁଡ଼ା ଜିଲାରେ ଚର୍ଚ୍ଚା ଚାଲିଛି। ଏହି ଯୁବତୀ ଜଣକ ନିକଟରେ ଇଟାଲୀରୁ ଫେରିଛନ୍ତି। ଯୁବତୀ କିମ୍ବା ଯୁବତୀଙ୍କ ପରିବାର ପକ୍ଷରୁ ଜିଲା ସ୍ବାସ୍ଥ୍ୟ ବିଭାଗକୁ ସୂଚନା ଦିଆଯାଇ ନ ଥିବାବେଳେ ସୋମବାର କେହି ଜଣେ ସ୍ଥାନୀୟ ଜିଲା କଣ୍ଟ୍ରୋଲ ରୁମକୁ ଫୋନ୍ ଯୋଗେ ସୂଚନା ଦେଇଥିଲେ। ପରେ ସୋମବାର ରାତିରେ ସ୍ଥାନୀୟ ଏକ ମେଡିକାଲ ଟିମ ଯୁବତୀଙ୍କ ଘରକୁ ଯାଇ ତାଙ୍କ ସ୍ବାସ୍ଥ୍ୟ ପରୀକ୍ଷା କରିଥିଲା। ସେହିପରି ଏହି ଘଟଣାରେ ସୂଚନା ଦେଇ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ଜଗଦୀଶ ଚନ୍ଦ୍ର ବାରିକ କହିଛନ୍ତି ଯେ, ଯୁବତୀ ଜଣକ ଗତ ଫେବୃୟାରୀ ମାସରେ ବିଦେଶରୁ ଫେରିଛନ୍ତି ଓ ସୁସ୍ଥ ଅଛନ୍ତି। ତଥାପି ମଙ୍ଗଳବାର ସକାଳୁ ଏକ ଜିଲା ସ୍ତରୀୟ ମେଡିକାଲ ଟିମ ତାଙ୍କ ଘରକୁ ପଠାଯାଇଛି ଏବଂ ତାଙ୍କ ସ୍ବାସ୍ଥ୍ୟାବସ୍ଥା ପରୀକ୍ଷା କରାଯିବ।
