ନୂଆଦିଲ୍ଲୀ,୩୧।୫: ଦ୍ୱିତୀୟ ବିଶ୍ୱଯୁଦ୍ଧରେ ଶହୀଦ ହୋଇଥିବା ପାଲୁରାମଙ୍କ ଅସ୍ଥି ୭୫ ବର୍ଷ ପରେ ଭାରତ ଫେରିବାର ସୌଭାଗ୍ୟ ଲାଭ କରିଛି। ପାଲୁରାମ ହିସାରର ବାସିନ୍ଦା ହୋଇଥିବା ବେଳେ ୭୫ ବର୍ଷ ହେବ ତାଙ୍କ ପରିବାର ଲୋକେ ପାଲୁରାମଙ୍କ ଅସ୍ଥି ପାଇବା ପାଇଁ ଅନାଇ ବସିଛନ୍ତି। ସୂଚନାଯୋଗ୍ୟ, ଦ୍ୱିତୀୟ ବିଶ୍ୱଯୁଦ୍ଧ ସମୟରେ ୧୯୪୪ ସେପ୍ଟେମ୍ବର ୧୩ରେ ପାଲୁରାମ ଇଟାଲୀରେ ଶହୀଦ ହୋଇଯାଇଥିଲେ। ହରିୟାଣା ହିସାର ଜିଲା ନଂଗତଲା ଗାଁର ବାସିନ୍ଦା ହେଉଛନ୍ତି ପାଲୁରାମ। ୨ ଜୁନ୍ରେ ଇଟାଲୀରୁ ତାଙ୍କ ଅସ୍ଥି ଭାରତ ଆସିବାର ଯୋଜନା ରହିଛି। ୩ ଜୁନରେ ଏହି ଅସ୍ଥିକୁ ପୁରା ସମ୍ମାନର ସହ ତାଙ୍କ ଗାଁ ନଂଗତଲାରେ ପରିବାର ଲୋକଙ୍କୁ ହସ୍ତାନ୍ତର କରାଯିବ। ବ୍ରିଟିଶ ସେନାରେ କାମ କରୁଥିବା ପାଲୁରାମ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଶହୀଦ ହୋଇ ଯାଇଥିଲେ। ମାତ୍ର ୧୯ ବର୍ଷ ବୟସରେ ପାଲୁରାମ ୧୯୪୪ରେ ସେପ୍ଟେମ୍ବର ୧୩ରେ ଶହୀଦ ହୋଇଥିଲେ। ତେବେ ତାଙ୍କ କଙ୍କାଳ ଫ୍ଲୋରେନ୍ସ ନିକଟ ପୋଗିଓଁ ଅଲଟୋରେ ମିଳିଥିଲା। ଏହାର ଚିହ୍ନଟ ପ୍ରକ୍ରିୟା ୨୦୧୦ ପର୍ଯ୍ୟନ୍ତ ଚାଲିଥିଲା। ୨୦୧୨ରେ ଡିଏନ୍ଏ ଟେଷ୍ଟ ମାଧ୍ୟମରେ ଏହା ପାଲୁରାମଙ୍କର ବୋଲି ଚିହ୍ନଟ କରାଯାଇଥିବା ବେଳେ ଏବେ ତାହା ଭାରତକୁ ପଠାଯିବାର ଯୋଜନା କରାଯାଇଛି।