ଭୁବନେଶ୍ୱର,୧୫-୧୦: ସ୍ଥାନୀୟ ଜନତା ମୈଦାନଠାରେ ଚାଲୁଥିବା ଭୁବନେଶ୍ୱର ଇଣ୍ଟରନ୍ୟାଶନାଲ ଟ୍ରେଡ ଫେୟାରକୁ ଗ୍ରାହକଙ୍କ ପକ୍ଷରୁ ଭଲ ରେସ୍ପନ୍ସ ମିଳୁଛି। ଚତୁର୍ଥଥର ପାଇଁ ଏହା ଆୟୋଜନ ହୋଇଥିବା ବେଳେ ଦେଶ ବିଦେଶର ବିଭିନ୍ନ ସାମଗ୍ରୀ କ୍ରୟ ଲାଗି ଏଠାରେ ଲୋକଙ୍କ ଭିଡ଼ ଜମୁଥିବା ଆୟୋଜକ ପ୍ରକାଶ କରିଛନ୍ତି। ପ୍ରତିଦିନ ୨୦-୩୦ ହଜାର ଲୋକ ଫେୟାର ବୁଲିବା ସହ ବିଭିନ୍ନ ସାମଗ୍ରୀ କ୍ରୟ କରିବାର ସୁଯୋଗ ପାଉଛନ୍ତି। ଭୁବନେଶ୍ୱର ବଜାରରେ ଉପଲବ୍ଧ ହେଉ ନ ଥିବା ବିଭିନ୍ନ ଜାତୀୟ ତଥା ଅନ୍ତର୍ଜାତୀୟ ବଜାରର ପ୍ରଡକ୍ଟ ଏଠାରେ ସ୍ଥାନିତ ଥିବାରୁ ଲୋକମାନେ ମେଳାକୁ ଆସି ମନ ପସନ୍ଦ ଅନୁସାରେ ସାମଗ୍ରୀ କ୍ରୟ କରୁଛନ୍ତି। ଦୈନିକ ପ୍ରାୟ ୨ କୋଟି ଟଙ୍କାର କାରବାର ଫେୟାରରେ ହେଉଥିବା ଆୟୋଜକ ଗୁପ୍ତା ଇଭେଣ୍ଟସ ମ୍ୟାନେଜମେଣ୍ଟ ପ୍ରାଇଭେଟ ଲିମିଟେଡର ସ୍ବତ୍ୱାଧିକାରୀ ସୁଜିତ କୁମାର ଗୁପ୍ତା କହିଛନ୍ତି। ମେଳାରେ ସବୁ ବର୍ଗକୁ ସୁହାଇଲା ଭଳି ପ୍ରଡକ୍ଟ ସାମିଲ କରାଯାଇଛି। ୫୦୦ ଷ୍ଟଲରେ ବିଭିନ୍ନ ବର୍ଗରେ ପ୍ରଡକ୍ଟ ଉପଲବ୍ଧ ହେଉଛି। ଲୋକଙ୍କର ମନୋରଞ୍ଜନ ଲାଗି ସାଂସ୍କୃତିକ କାର୍ଯ୍ୟକ୍ରମ, ଫୁଡ୍କୋର୍ଟ, ସେଲ୍ଫିଜୋନ, ଫନ୍ଜୋନ ରହିଛି। ଏହାବାଦ ସ୍ମାର୍ଟ ଶ୍ରୀମତି ଏବଂ ଲିଟିଲ କିଙ୍ଗ୍ ଓ କ୍ୱିନ ପ୍ରତିଯୋଗିତା ଆୟୋଜନ କରାଯିବା ନେଇ ନିଷ୍ପତ୍ତି ହୋଇଛି। ଏସିଡ୍ ସର୍ଭାଇଭରଙ୍କ ଲାଗି ଏକ ସ୍ବତନ୍ତ୍ର ଷ୍ଟଲ ସ୍ଥାପନ କରାଯାଇଛି। ମେଳାରେ ରହିଥିବା ପ୍ରପର୍ଟି ଏକ୍ସପୋ ଆକର୍ଷଣ ସାଜିଥିବା ଗୁପ୍ତା କହିଛନ୍ତି।