ନୂଆଦିଲ୍ଲୀ,୨୯ା୨(ପି.ଟି.): ଆସନ୍ତା ମାସରେ ଇଣ୍ଡିଆନ୍ ଓପନ୍ ବ୍ୟାଡ୍ମିଣ୍ଟନ ପ୍ରତିଯୋଗିତା ରାଜଧାନୀ ନୂଆଦିଲ୍ଲୀରେ ଖେଳାଯିବ। ଏଥିରେ ଭାଗ ନେବାକୁ ଥିବା ଚାଇନା ଖେଳାଳିଙ୍କ ସ୍ବାସ୍ଥ୍ୟାବସ୍ଥାର ସ୍ପଷ୍ଟ ଚିତ୍ର ଜଣାଇବା ଲାଗି ଆୟୋଜକ ବ୍ୟାଡ୍ମିଣ୍ଟନ ଆସୋସିଏଶନ ଅଫ୍ ଇଣ୍ଡିଆ (ବାଇ)କୁ କହିଛନ୍ତି। ଟୋକିଓ ଅଲିମ୍ପିକ୍ସ କ୍ୱାଲିଫିକେଶନ ପାଇଁ ଏହି ସୁପର ୫୦୦ ଟୁର୍ନାମେଣ୍ଟ ଏକ ଗୁରୁତ୍ୱପୂର୍ଣ୍ଣ ଇଭେଣ୍ଟ। ଟୁର୍ନାମେଣ୍ଟରେ ଖେଳିବା ଲାଗି ଭାରତ ଆସିବା ପୂର୍ବରୁ ଚାଇନା ଖେଳାଳିଙ୍କ ସ୍ବାସ୍ଥ୍ୟ ସମ୍ପର୍କରେ ଟିକିନିଖି ବିବରଣୀ ଜାଣିବାକୁ ଚାହିଁଛି କେନ୍ଦ୍ର ବହିର୍ବ୍ୟାପାର ମନ୍ତ୍ରଣାଳୟ। ମନ୍ତ୍ରଣାଳୟ ପକ୍ଷରୁ ବାଇକୁ କେତେକ ପ୍ରଶ୍ନର ଉତ୍ତର ଦେବା ଲାଗି କୁହାଯାଇଛି। ଯଥା ଚାଇନା ଖେଳାଳି/ଅଫିସିଆଲ ସେମାନଙ୍କ ଦେଶର କେଉଁ ଅଞ୍ଚଳରୁ ଆସିଛନ୍ତି। କେତେଜଣ ଖେଳାଳି/ଅଫିସିଆଲଙ୍କ ମେଡିକାଲ ଚେକ୍ଅପ୍ ହୋଇଛି ଏବଂ ସେମାନଙ୍କୁ ମେଡିକାଲ ସାର୍ଟିଫିକେଟ ଇସ୍ୟୁ ହୋଇଛି କି ନା ? ଅନ୍ୟ ଦେଶଗୁଡ଼ିକରୁ କେତେଜଣ ଖେଳାଳି/ଅଫିସିଆଲ ଆସୁଛନ୍ତି ଇତ୍ୟାଦି…। ଏହି ପ୍ରଶ୍ନାବଳୀକୁ ଚାଇନିଜ ବ୍ୟାଡ୍ମିଣ୍ଟନ ଆସୋସିଏଶନ ନିକଟକୁ ପଠାଇ ଦିଆଯାଇଛିି ଏବଂ ଆମେ ଉତ୍ତର ଅପେକ୍ଷାରେ ରହିଛୁ ବୋଲି ବାଇ ସମ୍ପାଦକ ଅଜୟ ସିଂଘାଣିଆ ପ୍ରକାଶ କରିଛନ୍ତି। ଉତ୍ତର ଆସିବା ପରେ ଆମେ ଏହାକୁ ମନ୍ତ୍ରଣାଳୟ ନିକଟକୁ ପଠାଇଦେବା ସହ ଭିଜା ପ୍ରକ୍ରିୟା ଆରମ୍ଭ କରିଦେବୁ ବୋଲି ସେ କହିଛନ୍ତି। ସ୍ଥାନୀୟ ଇନ୍ଦିରାଗାନ୍ଧୀ ଓପନ ଷ୍ଟାଡିୟମରେ ମାର୍ଚ୍ଚ ୨୪ରୁ ୨୯ ଇଣ୍ଡିଆନ ଓପନ ବ୍ୟାଡ୍ମିଣ୍ଟନ ଖେଳାଯିବ। ଏଥିରେ ବିଶ୍ୱର ନମ୍ବର ଓ୍ବାନ ଚେନ୍ ୟୁଫେଇ, ବିଶ୍ୱର ୮ ନମ୍ବର ହି ବିଙ୍ଗ୍ ଜାଓ ଏବଂ ପୂର୍ବତନ ଅଲ ଇଂଲଣ୍ଡ ଚାମ୍ପିୟନ ଶି ୟୁ କ୍ୱିଙ୍କ ସମେତ ବହୁ ଚାଇନିଜ ଖେଳାଳି ଭାଗନେବେ ବୋଲି ଆଶା କରାଯାଉଛି। ପ୍ରତିଯୋଗିତାରେ ଚାଇନାର ଅଂଶଗ୍ରହଣକୁ ନେଇ ବାଇ କିନ୍ତୁ ଆଶାବାଦୀ। କାରଣ ଚାଇନିଜ ବ୍ୟାଡ୍ମିଣ୍ଟନ ଖେଳାଳିମାନେ ଚଳିତ ମାସ ପ୍ରାରମ୍ଭରେ ୟୁରୋପରେ ବିଭିନ୍ନ ପ୍ରତିଯୋଗିତାରେ ଭାଗ ନେଇ ଫେରିଛନ୍ତି। ଚାଇନାର ଉହାନ ସହର ମାରାତ୍ମକ କରୋନା ଭାଇରସର ଉତ୍ପତ୍ତି ସ୍ଥଳ ହୋଇଥିବାବେଳେ ଏହି ମାରାତ୍ମକ ଭାଇରସ୍ରେ ପ୍ରାୟ ୩୦୦୦ ଲୋକ ପ୍ରାଣ ହରାଇ ସାରିଥିବାବେଳେ ବିଶ୍ୱବ୍ୟାପୀ ପାଖାପାଖି ୮୦,୦୦୦ ଲୋକ ସଂକ୍ରମିତ ହୋଇଛନ୍ତି। ସୂଚନାଯୋଗ୍ୟ, ସ୍ବାସ୍ଥ୍ୟ ବିପତ୍ତି ପାଇଁ ଚାଇନା ଓ ହଂକଂ ଯାତ୍ରାରେ ଭାରତ କଟକଣା ଜାରି କରିଛି।